1 Oh met ngehi, Nihpai, sohte kak ntingihdi soahng koaros me padahk ong nei aramas akan; I pil sohte koahiek ni nting, duwehte koasoakoasoi; pwe ahnsou me aramas kin koasoai sang ni manaman en Ngehn Sarawio, manaman en Ngehn Sarawio kin wahwei nan mohngiong en aramas akan.

2 Ahpw kilang, me tohto kin kakeptakiala arail mwohngiong kan ong Ngehn Sarawio, ihme kin kahrehda eh sohte dewe loalerail; eri, irail kin kesehla soahng tohto me ntingdi oh kin wiahki mehkot mwahl.

3 Ahpw ngehi, Nihpai, ntingihdi dahme I ntingihdi, oh I kin kesempwaliki mehlel, ahpw ni mehlel ong nei aramas akan. Pwe I kin kapakapkin irail ahnsou koaros ni rahn, oh ulungei pil kin wisekesengkihla pilen mesei nihpwong koaros; oh I kin likwerih ei Koht sang ni pwoson, oh I ese me e pahn ketin karonge ei likwer.

4 Oh I ese me Kauno Koht pahn kasarawihala ei kapakap kan pwe en wia kamwahupen nei aramas akan. Oh mahsen akan me I ntingihdi sang ni ei soakoahiek e pahn wiahla mehn kakehlail ong irail; pwe e pahn kamantikih irail en wia me mwahu; e pahn kasalehiong irail duwen arail pahpa kahlap ko; oh e kin koasoakoasoaia duwen Sises, oh kamantikihong irail en kamehlele ih, oh dadaurete lel imwi, me iei mour soutuk.

5 Oh e kin ketin kalahdiki dihp, nin duwen padahk mehlel me sansal; eri, sohte aramas pahn lingeringerki mahsen kan me I ntingihdi ihte ma irail audaudki ngehn en tepil.

6 I kin pereniki [padahk] sansal kan; I kin pereniki padahk mehlel; I kin pereniki Sises, pwehki eh ketin doarehsang palingeniet sang ehl.

7 I ahneki limpoak unsek ong nei aramas akan, oh pwoson laud Krais me I pahn tuhwongdi aramas mwakelekel tohto ni mwoahl en kopwungo.

8 I ahneki limpoak unsek ong mehn Suhs akan—I nda mehn Suhs, me wehwehki irail akan me mihwasa me I kohsang ie.

9 I pil ahneki limpoak unsek ong Mehn Liki kan. Ahpw kilang, ei koapworopwor sohte pahn mie ong irail ma irail sohte pahn ehuong Krais, oh pidelong nan ewen kehl tehtiko, oh keid nan ahl ineno me kahluwahlahng mour, oh kekeidlahte nan ahlo lao lel imwin ahnsou en songosongo.

10 Oh met, riei ohl kesempwal akan, oh pil mehn Suhs kan, oh kumwail koaros me mih ni keimw en sampah, [kumwail] rong mahsen pwukat oh kamehlel Krais; oh ma kumwail sohte kamehlel mahsen pwukat [a kumwail] kahmehlele Krais. Oh ma kumwail pahn kamehlele Krais a kumwail pahn kamehlele mahsen pwukat, pwe re wia mahsen en Krais, oh e ketikihong ie mahsen pwukat; oh re kin padahkihong aramas me re pahn wia me mwahu.

11 Oh ma mahsen pwukat kaidehn mahsen en Krais, a kumwail tenekih—pwe Krais pahn kasalehiong kumwail, sang ni manaman oh lingan lapalap, me e wia sapwellime mahsen, ni imwin rahn; oh kumwail oh ngehi pahn kesihnen oh kilengpene mwohn mwoaleo; oh kumwail pahn ese me e ketin mahsenihong ie I en ntingihdi mepwukat, mehndahte ei soakoahiek.

12 Oh I kapakapiong Sahmo ni mwaren Krais maaramas tohto nanpwungatail, ma kaiden koaros, en kak komourla nan sapwellime wehi ni imwilahn rahn kesempwalo.

13 Oh met, riei ohl kesempwal akan, kumwail koaros me wia kisehn peneinei en Israel, oh kumwail koaros me mih ni imwin sampah, I koasoiong kumwail duwehte ngihlehu me peido sang nan pwelpar: Kaselel [ong kumwail] lao lel ni rahn kesempwalo.

14 Oh ong kumwail me sohte pahn alehda sapwellimen Koht kalahngan, oh wauniki mahsen kan en mehn Suhs akan, oh pil ei mahsen akan, oh pil mahsen akan me pahn pwilipwilsang nindauwasen Sihmpwul en Koht, kilang, I rahnmwahuihkin kumwail rahn mwahu poatoapoat, pwe mahsen pwukat pahn kadeik kumwailda ni imwilahn rahno.

15 Pwe dahme I pahn katengehdi pohn sampah wet, pahn kadeik kumwail ni mwoahl en kopwungo; pwe ih met me Kauno ketin mahsanih, oh I pahn kapwaiada. Ahmen.