1 Oh met, Ngehi, Nihpai me koskoasoaia duwen kokohp akan me ei pahpao koasoaiahier, duwen Sosep, me wisiklahngehr nan Isip.

2 Pwe kilang, e kohpada mehlel duwen kadaudoke kan. Kokohp malaulau me kesempwal sang dahme e ntingihdier. Oh e kohpada duwen kitail, oh neitail dih en mwuhr akan. Oh irail ntingdier nan pileit pirahs akan.

3 Eri, mwurin ei pahpao eh kaimwsekala ah koskoasoaia duwen ahn Sosep kokohp akan, e ekeralanein Laman seri kan, nah pwutak kan oh nah serepein kan, oh patohwanohng irail: Kilang, nei pwutak kan oh nei serepein kan, me wia nein nei mesenih seri kan, I men kumwail en rong ei kaweid.

4 Pwe Kauno Koht ketin mahsanih: Nin duwen amwail pahn kapwaiada ei kosonned akan kumwail pahn pweida nan sahpwo; oh nin duwen amwail sohte pahn kapwaiada ei kosonned akan kumwail pahn lekdeksang mwohn sihlahngi.

5 Ahpw kilang, nei pwutak kan oh nei serepein kan, I sohte kak kohdihla nan ei sousou lao I pahn kihong kumwail kapai. Pwe kilang, I ese me ma kumwail kaiahnda ni pwungin momour kumwail sohte pahn salongasang.

6 Eri, ma kumwail riahla, kilang, I kihong kumwail kapai, pwe amwail keriao en kohsang pohmwail oh mihla rehn amwail nohno oh pahpa kan.

7 Eri, pwehki ei kapaio, Kauno Koht sohte pahn mweidehng kumwail en kamwomwomwla; eri, e pahn ketin mahk ong kumwail oh kadaudokemwail kan kohkohlahte.

8 Kedekedeo mwurin ei pahpao eh kaimwsakalahr ah kaweid ong nein Laman pwutak kanoh serepein kan, e ahpw lukweriala reh nein Lemuel pwutak ko oh serepein ko.

9 Oh e patohwanohng irail, ketihtihki: Kilang, nei pwutak kan oh nei serepein kan, me wia nein nei keriemen en pwutak nah seri kan; kilang I kihong kumwail kapaiohte me I kihongehr nein Laman pwutak kooh serepein ko; eri, kumwail sohte pahn uhdahn kamwomwomwla; ahpw ni imwilao kadaudokemwail kan pahn kapaida.

10 Kedekedeo ni ahnsou me ei pahpao kaimwsakala eh kaweid ong irail, kilang, e uhd koasoaiehng nein Ismael nah pwutak ko, iei, oh tohn ihmweo koaros.

11 Oh mwurin eh kaimwsakalahr ah patohieng irail, e uhd patohwanohng Sam, ketihtihki: Meid pai kowe, oh kadaudokemw kan; pwe ke pahn sohsohki sahpwo duwehte riomw pwutak Nihpai. Oh kadaudokemw kan pahn kapatapatehng kadaudoke ko; oh ke pahn duwehte riomw pwutako, oh kadaudokemw kan pahn duwehte kadaudoke ko; oh ke pahn paiamwahu erein ahmw mour.

12 Kedekedeo mwurin ei pahpa Lihai, eh koasoaiengehr tohn imweo koaros, nin duwen pepehm en ah mohngiong oh Ngehn en Kauno me ketiket reh, e ahpw likeilapalahr. Kedekedeoh e kapilsalehdalahr, oh e ahpw seridi.

13 Kedekedeo mwurinte rahn kei me e kapilsalehdalao, Laman oh Lemuel oh nein Ismael pwutak ko ahpw lingeringerda pahi pwehki sapwellimen Kauno kaweid kan.

14 Pwe Ngehi, Nihpai, itoitehng I en kawehwehong irail duwen sapwellimenKauno mahsen; eri I kawehwehongirailehr soang tohto, oh ei pahpao pil koasoai ong irail mwohn eh kapilsalehdalao. Tohto dahme e ketihtihki ko ntingdi pohnnei pileit teiko; pwe pali laud en aht poadoapoad ntingdi pohn nei pileit teiko.

15 Oh pohn mehkan I ntingihdi soahng kan mepid palingeni, ohiren pwuhk sarawi tohtoh me ntingdier pohnpileit prahs kan. Pwehki palingeni kin perenki iren pwuhk sarawi kan, oh ei mohngiong kin doandoanropwe ire kan, oh I ntingihdi pwe nei seri kan en kak esehla oh paieki.

16 Kilang, palingeniet kin perenki soahng kan me sang rehn Kauno; oh ahnsou koaros I kin doandoaropwe nan ei mohngiong mehkoaros me I kilangehr oh rongehr.

17 Ahpw, mendahtekalahngan en Kauno eh kin ketin kasalehongie sapwellime doadoahk kaselel oh kapwuriamwei kan, nan mohngiongiet kin weriweriki: Ngehi aramas paisuwed men! Ei, mohngiongiet pahtou pwehki paliwereiet; palingeni nsensuwed pwehki ei sapwung kan.

18 Pwehki kasongosong kan oh dihp akan me kin mengei en kaluweteiehla eh kipeiehdier.

19 Oh ahnsou me I kin inangih peren, mohngiongiet kin mwahiei pwehki dipei kan; ahpw, I ese ihs me I pahn kopworopworki.

20 Ei Koht me wia kakehlepei; ih me ketin kahluwaie sang nan ei kahpwal akan nan sapwtehno; oh ketin doandoareie pohn sehd en nan madauo.

21 E ketin audehkinie sapwellime limpoak, lao ekipehdi paliwereiet.

22 E ketin kalowehdi ei imwintihtih kan, karehieng arail masepwehkada.

23 Kilang, e ketin karongehier ei pekipek nihrahn, oh e ketkihongiehier erepit nan ei ouraman kan nihpwong.

24 Oh nihrahn I kin eimahki ei kapakap mwohn silangi; iei, ngileiet kin leladahla powe; oh tohnleng kan ahpw kohdihdo oh seweseie.

25 Oh pohn pehnpihr kan en sapwellime Ngehno me e ketin wahkiniehdahla pohn nahna me uhdahn ileile kan. Oh meseikat kilangehr soahng kapwuriamwei kei, iei, me kapwuriamwei sang dahme aramas kak kilang; eri I keinepwdihsang I en ntingihraildi.

26 Eri maingko, ma I kilangehr soahng kapwuriamwei kan, ma Kauno ni eh ketdihdooh ketkihdi pein ih rehn aramas akan oh kasalehongirailkupwurkalahngan, dahme ei mohngiong pahn mwahieiki oh palingeni nsensuwedki, oh paliwereiet wiakaula, oh ei kehlail luwetkihla, pwehki ei kahpwal akan?

27 Oh dahme I pahn lohdihkinan dihp, pwehki paliwereiet? Iei, dahme I pahn mweidehngki kasongosong kan, en wiahda dowen me suwedo nan ei mohngiong pwehn kawehla ei onopek oh kahpwalihala palingeniet? Dahme ei imwintihtih kan pahn kahrehkihda ei lingeringer?

28 Palingeni, pwourda! Dehier pwurehng luwetla nan dihp. Mohngiongi, perenda oh dehier wiahda dewen imwintihti en palingeniet.

29 Dehr pwurehng lingeringer pwehki ei imwintihti kan. Dehr kaluwetehla ei kehl pwehki ei kahpwal akan.

30 Ei mohngiong perenda oh lukwerlahng Kauno, oh patohwan: Maingahi Kaun, I pahn kapinga komwi kohkohlahte; iei, palingeniet pahn pereperenkin komwi, maing Koht, komwi me wiaahi paipalap en komour.

31 Maing Kaun, komw kak ketin doarehla palingeniet? Komw kak ketin kapitiehsang ei imwintihti kan? Komw kak ketin seweseie pwe I en kak masak sansal en dihp?

32 Ewen kehl en ehl en kin ritidi mwohiahnsou koaros, pwehki mohngiongiet karakarahk oh ngehniet peik! Maing Kaun, komw dehr ketin ritingedihsangie ewen kehl en omwi pwung mwohi, pwe I en kak keid nan ahl en wahu karakarahk, pwe I en kak inenweite nan ahl patapat!

33 Maing Kaun, komw ketin kapelkiniepene sapwellimomwi likoun pwung! Maing Kaun, komw ketin kaunopada ahl me pahn kapitiehsang ei imwintihtih kan! Komw ketin kainenehla wasa I pahn weidie! Komw dehr ketin mweidehng takai en dipekelekel mwohi—ahpw komw ketin kamwakelehda mwohi, oh dehr ketin kerempwahla ei ahl, ahpw ahl en ei imwintihti kan.

34 Maing Kaun, Komwi me I kin likih, oh I pahn likih komwi kohkohlahte. I sohte pahn likih kehl en aramas; pwe I ese me mehmen me kin likialakehl en aramas ekin riahkihla. Iei, mehmen me kin likiala aramas de kehlkihla aramas e kin riahkihla.

35 Iei, I ese me mehmen me pahn peki, Koht pahn kupwur sapan oh ketkiheng ih. Iei, ei Koht pahn ketkihengie, ma I peki ni pwung; eri ngileiet pahn sansal ong komwi; iei, I pahn lukuwerwih komwi, ei Koht, me wia paipalap en ei pwung. Kilang, ngileiet pahn peidahwei rehmwi kohkohlahte, ei paipalap oh ei Kohtpoatoapoat. Ahmen.