1 Ināianei ā nana, i pahawa ake, nā, ka rangona ēnei meatanga e ngā iwi katoa o te whenua, ā, i kitea hoki. Ā, whai muri iho i ēnei meatanga ka ngū te whenua mō te takiwā o ngā haora maha;

2 Nā te ohorere o te iwi i mutu ai te uhunga me te auē o te iwi mō te ngaronga atu o ō rātou huānga kua whakamatea nei; nō reira i ngū katoa te whenua mō te takiwā o ngā haora maha.

3 Ā, i pahawa ake, nā, ka tau mai tētahi reo anō ki te iwi, ā, ka rongo katoa te iwi, ā, i whakaatu anō rātou mō taua mea, e mea ana:

4 E koutou, e ngā iwi o ēnei pā nui kua hinga iho ki raro, e koutou ngā uri nō Hākopa, āe rā, e koutou nō te whare o Iharaira, anō te tini o aku whakamine i a koutou me te mea nei he heihei e whakaemiemi nei i āna pīpī i raro i ōna parerau, ā, kua atawhaitia koutou.

5 Hei āpiti anō, kua hia tāima anō i whakaemiemi au i a koutou me te mea nei he heihei e whakaemiemi ana i āna pīpī i raro i ōna parirau, āe rā, E koutou, e te iwi o te whare o Iharaira, kua hinga iho nei; āe rā, E koutou, e te iwi o te whare o Iharaira, e koutou e noho nei i Hiruharama, me koutou anō kua hinga; āe rā, kua hia tāima i whakaemiemi au i a koutou me te mea nei he heihei e whakaemiemi ana i āna pīpī, ā, kīhai rawa koutou i aro mai.

6 E koutou, e te whare o Iharaira nāku nei i tohu, ka hia tāima ka whakaemiemi au i a koutou me te mea nei he heihei e whakaemiemi ana i āna pīpī ki raro i ōna parirau, mēnā ka rīpenetā koutou me te hoki mai ki ahau i runga i te whakapaunga ake o te ngākau.

7 Engari ki te kore, E te whare o Iharaira, ka meinga ō koutou kāinga hei mea takoto kau noa tae noa atu ki te whakatutukitanga i te kawenata i kawenatatia ai ki ō koutou tūpuna.

8 Ināianei ā i pahawa ake, nā, whai muri iho i te rongonga o te iwi i ēnei kupu, nana, ka tīmata tā rātou uhunga me tā rātou auē anō nā te ngaronga atu o ō rātou huānga me ō rātou hoa.

9 Ā, i pahawa ake, nā, ka pēnei te pahemotanga atu o ngā rā e toru. Ā, i te ata, ā, ka mimiti atu te pōuritanga i te mata o te whenua, ā, ka mutu te whakangāueuetanga o te whenua, ā, ka mutu te wāwāhitanga o ngā kōhatu, ā, ka mutu anō ngā auētanga whakawehi, ā, ka pahemo atu ngā haruru kino katoa anō hoki.

10 Ā, ka piritahi anō te whenua, kia tū ai ia; ā, ka mutu te uhunga, me te tangi, me te auētanga o te iwi i tohua nei kia ora; ā, ka huri tā rātou uhunga ki te hari, me ā rātou auē ki te whakamoemiti ki te Ariki a Ihu Karaiti, tō rātou Kaihoko.

11 Ā pēnei noa tutuki ai ngā karaipiture i kōrerotia ai e ngā poropiti.

12 Ā, ko te wāhi tika ake o te iwi ngā mea i whakaorangia ai, ā, ko rātou te hunga i whiwhi ai i ngā poropiti, ā, kīhai nei rātou i āki atu i a rātou ki te kōhatu; ā, ko rātou anō te hunga kīhai nei i whakaheke i ngā toto o te hunga tapu, te hunga i tohua ai—

13 Ā, i tohua rātou, ā, kīhai i paremo iho, ā, i tāpuketia ake i te whenua; ā, kīhai rātou i tōremihia iho i ngā rirerire o te moana; ā, kīhai rātou i tahuna ki te ahi, kīhai rānei rātou i hinga iho, ā, i penupenua kia mate; ā, kīhai rātou i kahakina atu i roto i te āwhiowhio; kīhai rānei rātou i taea e te kapua auahi me te pōuritanga.

14 Ināianei ā, ko te tangata e pānui nei, tukua ia kia mārama; ko te tangata i a ia ngā karaipiture, tukua ia kia rapu i roto rā, ā, kia kitea, ā, kia tirohia ake mehemea ehara rānei ēnei matenga katoa me ēnei whakangaromanga katoa ki te ahi, ki te auahi hoki, ki te tūpuhi hoki, ki te āwhiowhio hoki, ki te tūwheratanga ake o te whenua kia whiwhi ai i a rātou, me ēnei mea katoa i te mea hei whakatutukitanga i ngā poropititanga a ngā poropiti tapu tokomaha.

15 Nana, ko taku kupu tēnei ki a koutou, Āe rā, he tokomaha ngā tāngata kua whakaatuhia mai nei mō ēnei mea hei te haerenga mai a te Karaiti, ā, i whakamatea rātou mō rātou i whakaatu atu i ēnei mea.

16 Āe rā, i whakaatu atu te poropiti a Hinohi mō ēnei mea, i kōrero anō hoki a Henoka e pā ana ki ēnei mea, nā te mea i whakaatu rawa rāua e pā ana ki a mātou, ko mātou nei ngā mōrehu o ō rāua uri.

17 Nana, i whakaatu atu anō hoki tō tātou tupuna a Hākopa e pā ana ki te toenga o ngā uri o Hōhepa. Ā, nana, ehara rānei tātou i te toenga o ngā uri o Hōhepa? Ā, koinei mea e whakaatu mai nei mō tātou, kāore rānei ērā mea i tuhia i runga i ngā papa parāhe i kawea mai nei e tō tātou tupuna a Rīhai i Hiruharama?

18 Ā, i pahawa ake i te pito whakamutunga o te tau toru ngahuru mā whā, nana, māku e whakakite atu ki a koutou, nā, i tohua te iwi o Nīwhai, me te hunga anō hoki i karangatia ai he Rāmana, kua tohua, he nui ngā mea pai i whakakitea atu nei ki runga i a rātou, ā, he nui anō ngā manaakitanga i riringihia iho ki runga i ō rātou māhunga, nā konā whai muri tata i te kakenga ake o te Karaiti ka whakakite tūturu nei ia i a ia anō ki a rātou—

19 E whakakite atu ana ia i tōna tīnana ki a rātou, e minita ana ki a rātou; ā, ka tukuna mai tētahi tuhinga mō tana minitatanga ā muri ake nei. Nō reira māku e whakakapi aku meatanga i tēnei wā.