1 Ināianei ā i pahawa ake, nā, ka hokihoki te iwi o ngā Nīwhai ki ō rātou ake whenua i te tau rua ngahuru mā ono, ia tangata, ia tangata, me tōna whānau, āna kāhui o ia tū, o ia tū, ōna hōiho me āna kau, me ā rātou mea katoa.

2 Ā, i pahawa ake, nā, kāore rātou i kai katoa i ā rātou ō; nō reira ka haria atu e rātou ngā mea katoa kāore anō kia kaingia, nō ā rātou kākano o ia tū, o ia tū, nō ō rātou kōura, nō ō rātou hiriwā anō hoki, nō ō rātou mea utu nui katoa anō hoki, ā, ka hoki rātou ki ō rātou ake whenua me ō rātou rawa, i te raki me te tonga anō, i te whenua whakateraki me te whenua whakatetonga.

3 Ā, ka tukua aua kaipāhua nāna nei i uru ki roto i tētahi kawenata kia mau ai te rongo i te whenua, i te hiahia kia noho tonu ai hei Rāmana, he whenua, e rite ana ki ō rātou tokomahatanga, kia riro i a rātou, i runga i ā rātou mahinga, he mea hei oranga; ā pēnei whakapūmau ai i te rangimārie i te whenua katoa.

4 Ā, ka tīmata anō tā rātou whakakake me tā rātou kaha; ā, ka pahemo atu te rua ngahuru mā ono, mā whitu o ngā tau, ā, he nui anō te āta noho i te whenua; ā, kua hangaia ō rātou ture kia rite ai ki te mana taurite me te tika.

5 Ināianei ā, kāore he mea i te whenua katoa hei ārai atu i tā te iwi whakakake tonutanga, hāunga tā rātou takanga iho ki roto i te hē.

6 Ināianei ā, nā Kikironi, me te kaiwhakawā, a Rakoneu, me te hunga i whakataua hei kaiārahi, nā rātou i whakapūmau te rangimārie nui i te whenua.

7 Ā, i pahawa ake, nā, he maha ngā pā i whakahoutia, ā, he maha ngā pā tawhito i whakatikaia ake.

8 Ā, he maha ngā huanui i hangaia ake, ā, he maha ngā huarahi i hangaia ai, i ārahina atu i tētahi pā ki tētahi pā, ā, mai i tētahi whenua ki tētahi whenua, ā, mai i tētahi wāhi ki tētahi wāhi.

9 Ā pēnei pahemo atu ai te tau rua ngahuru mā waru, ā, hono tonu te rangimārie o te iwi.

10 Engari i pahawa ake i te tau rua ngahuru mā iwa ka tīmata ake ētahi tautohetohenga i waenganui i te iwi; ā, ka neke ake ētahi ki te whakapehapeha me te whakamanamana nā tō rātou whairawa tino nui, āe rā, tae atu ana ki te mahi tūkino nui;

11 Nā, he maha ngā kaihokohoko i te whenua, ā, he maha anō ngā rōia, ā, he maha anō ngā āpiha.

12 Ā, ka tīmata te whakatau i ngā karangatanga rangatiratanga i waenganui i te iwi, e rite ana ki ō rātou rawa me ō rātou āhei ki te ako; āe rā, he kuare ētahi nā tō rātou rawakoretanga, ā, ka whiwhi mātauranga nui ētahi atu nā tō rātou whairawatanga.

13 Ka neke ake ētahi i runga i te whakapehapeha, ā, he whakaiti anō ētahi atu; ka utu atu ētahi i te tāwai ki te tāwai, i ētahi atu pākia ai ki te tāwai me ngā tūmomo whakamamaetanga katoa, ā, kāore i tahuri atu ki te tāwai atu anō, engari i whakaiti, ā, i rīpenetā i te aroaro o te Atua.

14 Ā pēnei ka ai he rerekētanga nui puta noa i te whenua, nā konā tīmata ake tā te hāhi wāwāhitanga ake puta noa i te whenua hāunga i waenganui i ētahi o ngā Rāmana ruarua kua whakatahuritia ki te whakapono tūturu; ā, kua kore rātou e wehe atu i a ia, nā te mea he kaha rātou, he ū rātou, ā, he toka tū moana rātou, e hiahia ana i runga i tō rātou kaha katoa ki te pupuri i ngā whakahaunga a te Ariki.

15 Nā, ko te pūtaketanga o tēnei kino i te iwi ko tēnei—He nui tō Hātana mana, ki te whakaohotanga ake i te iwi ki te mahi i ngā tūmomo kino katoa o ia āhua, o ia āhua, me te whakapupuhitanga ake i a rātou ki te whakapehapeha, e whakawai ana i a rātou kia whai atu ai i te kaha me te mana, me ngā taonga, me ngā mea tekateka noa o te ao.

16 Ā pēnei tā Hātana ārahi atu i ngā ngakau o te iwi ki te mahi i ngā tūmomo āhuatanga katoa o te kino; nō reira kua mau tā rātou rongo mō ngā tau ruarua.

17 Ā pēnei, i te tīmatanga o te tau toru ngahuru—kua whakaputaina ake te iwi mō te takiwā o te wā roa kia kahakina atu e ngā whakawainga o te rēwera ahakoa tāna i pai ai ki te kāhaki i a rātou ki hea, me te mahi i ngā kino katoa i hiahia ai ia hei mahi mā rātou—ā pēnei i te tīmatanga o tēnei, te tau toru ngahuru, kei roto rātou i tētahi āhuatanga whakarihariha.

18 Nā, kīhai i kuare tā rātou hara, nā te mea i mōhio rātou ki tā te Atua hiahia e pā ana ki a rātou, nā te mea kua whakaakona atu ki a rātou; nō reira i haututū rātou ki te Atua i runga i tō rātou ake hiahia.

19 Ināianei ā, i roto i ngā rā o Rakoneu, te tama a Rakoneu, nā te mea i whakakī a Rakoneu i te nohoanga o tōna matua, ā, i whakahaere i runga i te iwi i taua tau.

20 Ā, ka tīmata ētahi tāngata, he mea whakamana nā te Ariki, ā, ka tonoa atu, e tū ana ki waenganui i te iwi puta noa i te whenua katoa, e kauhau atu ana, ā, e whakaatu atu ana i runga i te māia mō ngā hara me ngā kino o te iwi, ā, e whakaatu ana ki a rātou e pā ana ki te hokonga e meatia ai e te Ariki mō tana iwi, hei kupu kē rānei, te aranga ake o te Karaiti; ā, i whakaatu māia rātou mō tana matenga me āna whakamamaetanga.

21 Nā, he tokomaha ngā tāngata i te tino pukuriri nā te hunga i whakaatu atu ai mō ēnei mea; ā, ko te nuinga o te hunga i pukuriri ai ko ngā kaiwhakawā matua, me te hunga kua whakatūria ai hei pirihi teitei, ā, hei rōia; āe rā, ko te hunga rōia katoa te hunga i pukuriri ai ki te hunga nāna nei i whakaatu mō ēnei mea.

22 Nā, kāore he rōia, he kaiwhakawā rānei, he pirihi teitei rānei i a ia te mana hei whakatau i te hē ki tētahi kia mate rawa hāunga taua whakataunga i waitohua nei e te kāwana i runga i te whenua.

23 Nā, he tokomaha te hunga i whakaatu nei e pā ana ki ngā mea o te Karaiti, arā te hunga i māia tā rātou whakaatu, nā, i kahakina atu rātou, ā, i whakamatea hunahia e ngā kaiwhakawā, kia kaua te rongo e tae atu ai ki te kāwana o te whenua e pā ana ki ō rātou matenga kia oti rā anō te whakamate i a rātou.

24 Nana ināianei, he tauaro tēnei ki ngā ture o te whenua, kia whakamatea tētahi tangata hāunga kua whakamanahia rātou e te kāwana o te whenua—

25 Nō reira ka tae atu tētahi amuamu ki te whenua o Harahemara, ki te kāwana o te whenua, e whakahē ana i ēnei kaiwhakawā mō rātou i whakahē ngā poropiti o te Ariki kia mate rawa, kāore e rite ana ki tā te ture.

26 I pahawa ianei ake, nā, kua kahakina rātou, ā, kua haria mai ki te aroaro o te kaiwhakawā, kia whakawākia ai e rite ana ki tō rātou hara i mahia nei e rātou, e rite ana ki te ture i homai ai e te iwi.

27 I pahawa ianei ake, nā, he tokomaha ngā hoa me ngā huānga ō ērā kaiwhakawā; ā, ko te toenga, āe rā, tata ko ngā rōia katoa me ngā pirihi teitei katoa, ka whakahuihui tahi i a rātou anō, ā, ka whakakotahi atu ki ngā huānga o aua kaiwhakawā e whakawākia ai e rite ana ki tā te ture.

28 Ā, ka uru atu rātou ki roto i tētahi kawenata tētahi ki tētahi, āe rā, ki roto i taua kawenata anō i hoatu ai e rātou te hunga onamata, ko taua kawenata i homai ai, ā, i whakahaeretia ai e te rēwera, hei whakakotahi atu hei pēhi i te tika katoa.

29 Nō reira ka whakakotahi atu rātou hei pēhi i te iwi o te Ariki, ā, ka uru atu ki roto i tētahi kawenata kia whakangaromia ai rātou, me te whakaputa i te hunga kaikōhuru i te ringa rapu o te tika, koia whano ka whakahaeretia nei e rite ana ki te ture.

30 Ā, kāore rātou i aro ki te ture me ngā tikanga o tō rātou whenua; ā, i kawenata rātou tētahi ki tētahi kia whakangaromia ai te kāwana, me te whakapūmau ake i tētahi kīngi i runga i te whenua, kia mutu ai te herekoretanga o te whenua engari kia uru ai ki raro i ngā kīngi.