1 Nana ināianei, māku koutou e whakaatu atu kīhai i whakapūmauhia e rātou tētahi kīngi i runga i te whenua; engari i tēnei tau anō, āe rā, te tau toru ngahuru, i whakangaromia e rātou i runga i te nohoanga-whakawā, āe rā, i kōhurutia e rātou te kaiwhakawā matua o te whenua.

2 Ā, ka weheruatia te iwi tētahi i tētahi; ā, ka wehewehe atu rātou tētahi i tētahi atu ki roto i ngā hapū, tēnā tangata me tēnā tangata e rite ana ki tōna whānau me ōna huānga me ōna hoa; ā pēnei tā rātou whakangaro i te kāwanatanga o te whenua.

3 Ā, ka whakatūria e tēnā hapū, e tēnā hapū he rangatira mō rātou; ā pēnei tā rātou hurihanga hei hapū, ā, hei rangatira hapū.

4 Nana ināianei, kāore he tangata i waenganui i a rātou ki te kore tōna whānau nui me ōna huānga me ōna hoa tokomaha; nō reira ka tino tokomaha haeretia ō rātou hapū.

5 Nā, i pēnei katoa tēnei, ā, kāore anō he pakanga i waenganui i a rātou; ā, ka tau iho tēnei ki runga i te iwi nā tō rātou tuku i a rātou anō ki te mana o Hātana.

6 Ā, ka whakangaromia ngā whakaritenga o te kāwanatanga, nā te whakakotahitanga huna o ngā hoa me ngā huānga o te hunga nāna nei ngā poropiti i kōhuru.

7 Ā, ka mea rātou i tētahi tautohetohenga nui i te whenua, nā konā kua tata kino haere te wāhi nui o te hunga tika; āe rā, he tokoiti noa iho ngā tāngata tika i waenganui i a rātou.

8 Ā pēnei kāore anō kia pahemo atu ngā tau e ono mai i te tahuritanga atu o te wāhi nui o te iwi i tō rātou tika, pērā i te kurī ki tōna ruaki, i te poaka rānei ki tana tītakatanga i te paru.

9 Nā, ko tēnei whakakotahitanga huna, kua tōia iho mai nei tētahi kino nui ki te iwi, ka whakahuihui ngātahi i a rātou anō, ā, ka whakanohoia i tō rātou upoko tētahi tangata i karangatia ake ko Hākopa;

10 Ā, ka karangatia ia e rātou ko tō rātou kīngi; nō reira ka meinga ia hei kīngi i runga i tēnei ope whakarihariha; ā, koia tētahi o ngā mea matua rawa i whakahēngia ai ngā poropiti nāna nei i whakaatu mō te Karaiti.

11 Ā, i pahawa ake, nā, kāore i rite tō rātou tokomahatanga pērā i ngā hapū o te iwi, i whakakotahitia ngātahitia ake engari nā ō rātou rangatira ō rātou ture i whakapūmau, tēnā me tēnā e rite ana ki tōna hapū; hei aha koa he hoariri rātou; ahakoa ehara rātou i te iwi tika, heoi kua whakakotahitia rātou i runga i te mauāhara ki te hunga i uru atu ai ki roto i tētahi kawenata ki te whakangaro i te kāwanatanga.

12 Nō reira, i te kitenga o Hākopa kua tokomaha ake ō rātou hoariri i a rātou, ko ia hoki te kīngi o te ope, nō reira ia whakahau ai i tana iwi kia rere atu ai ki te wāhi whakateraki rawa o te whenua, ā, i reira whakatū ake ai mō rātou anō tētahi kīngitanga, kia tae rawa ki te wā e hono atu ai ngā kaitītore ki a rātou, (nā te mea i whakapatipati ia i a rātou kia tokomaha rawa ai ngā kaitītore) ā, hei reira rātou kaha ai ki te tatau atu ki ngā hapū o te iwi; ā, i pērā rātou.

13 Anō te hohoro o tā rātou hīkoi kīhai i taea te whakaware kia puta rā anō atu rātou i te toronga o te iwi. Ā pēnei mutu ai te tau toru ngahuru; ā pēnei ngā āhuatanga o te iwi o Nīwhai.

14 Ā, i pahawa ake i te tau toru ngahuru mā tahi ka wehewehe rātou hei hapū, tēnā tangata me tēnā tangata e rite ana ki tōna whānau, ōna huānga me ōna hoa; hei aha koa i whakarite tikanga rātou kia kaua rātou e whawhai rātou ki a rātou anō; engari kīhai rātou i whakakotahi i runga i ō rātou ture, me te āhuatanga o ō rātou kāwanatanga, nā te mea i whakapūmauhia ērā e rite ana ki ngā whakaaro o ō rātou rangatira me ō rātou kaiārahi. Engari i whakapūmauhia ētahi ture uaua rawa kia kaua tētahi hapū e takahi i te mana o tētahi atu hapū, nā konā kua āhua mau te rongo i te whenua; hei aha koa, kua whakatahuritia atu ō rātou ngākau i te Ariki tō rātou Atua, ā, i ākina ngā poropiti e rātou ki te kōhatu, ā, i makaia atu rātou i waenganui i a rātou.

15 Ā, i pahawa ake, nā—kua torona a Nīwhai e ngā anahera me te reo o te Ariki anō hoki, nō reira i te mea kua kitea ngā anahera, ā, kua kite ā-kanohi anō ia, ā, kua homai he kaha ki a ia e mōhio ai ia e pā ana ki te minitatanga o te Karaiti, ā, kua kite ā-kanohi anō hoki ia ki tā rātou hokinga wawe atu i te tika ki tō rātou whakarihariha me ō rātou mōrikarika;

16 Nō reira, i te mea he pōuri ia nō te pakeke o ō rātou ngākau me te kāpō o ō rātou hinengaro—ka haere atu ia ki waenganui i a rātou i taua tau anō, ā, ka tīmata tana whakaatu atu, i runga i te māia, te rīpenetātanga me te murunga hara mā roto i te whakapono ki te Ariki a Ihu Karaiti.

17 Ā, he maha ngā mea i minitatia ai e ia ki a rātou; ā, tē taea ērā mea katoa te tuhi, ā, kāore i mātua tētahi wāhi o ērā, nō reira kāore ērā i tuhia ki roto i tēnei pukapuka. Ā, ka minita a Nīwhai i runga i te kaha me te mana nui.

18 Ā, i pahawa ake, nā, i te riri rātou ki a ia, nā te mea pū anō he nui ake tōna kaha i tō rātou, nā te mea kāore i taea e rātou te whakateka i āna kupu, nā te mea he nui tōna whakapono ki te Ariki a Ihu Karaiti, nā, ka minitatia ia e ngā anahera i ia rā, i ia rā.

19 Ā, i pei atu ia i ngā rēwera me ngā wairua poke i runga i te ingoa o Ihu; ā, ko tana teina pū anō nāna nei i mairanga ake i te mate, whai muri iho i te ākinga i a ia ki te kōhatu, ā, i whakamatea ia e te iwi.

20 Ā, i kite te iwi, ā, i whakaaturia e rātou taua mea, ā, i te riri anō rātou ki a ia nā tōna kaha; ā, he maha anō ngā merekara i mahia nei e ia, i mua i te tirohanga a te iwi, i runga i te ingoa o Ihu.

21 Ā, i pahawa ake, nā, ka pahemo atu te tau toru ngahuru mā tahi, ā, he tokoiti noa ngā mea i whakatahuritia mai ki te Ariki; engari ka tino whakaatu atu te hunga katoa i whakatahuritia ai ki te iwi, nā, kua torona iho rātou e te mana me te Wairua o te Atua, koia i roto nei i a Ihu Karaiti, i tō rātou i whakapono ai.

22 Ā, ko te hunga katoa i peia atu ai i a rātou ngā rēwera, me ngā mea i mahu ai i ō rātou māuiuitanga me ō rātou ngoikoretanga, i tino whakaatu pono atu rātou ki te iwi kua mahia rātou e te Wairua o te Atua, ā, kua mahu; ā, i whakakite atu rātou i ngā tohu anō hoki, ā, i mahi anō i ētahi merekara ki waenganui i te iwi.

23 Pēnei pahemo atu ai te tau toru ngahuru mā rua anō hoki. Ā, ka karanga atu a Nīwhai ki te iwi i te tīmatanga o te tau toru ngahuru mā toru; ā, i kauhau atu ia i te rīpenetātanga me te murunga hara ki a rātou.

24 Nā, e hiahia ana anō ahau kia mahara koutou, kāore he tangata kotahi i kūmea mai ai ki te rīpenetātanga kīhai nei i rūmakina ki te wai.

25 Nō reira, i reira whakamanaia ai e Nīwhai, he tangata ki roto i tana minitatanga, nā, kia rūmakina ki te wai ngā tāngata katoa e haere mai ai ki a rātou, ā, ka pēnei hei kaiwhakaatu, ā, hei whakaaturanga anō tēnei i mua i te Atua, ā, ki te iwi anō, kia rīpenetā rātou, ā, kua whiwhi i tētahi murunga i ō rātou hara.

26 Ā, he tokomaha anō ngā mea i rūmakina ai ki te rīpenetātanga i te tīmatanga o tēnei tau; ā pēnei ka pahemo atu te wāhi nui o te tau.