1 Ā, i pahawa ake, nā, ka whakahau ia i a rātou kia tuhia ngā kupu i hoatu ai e te Matua ki a Maraki, e kōrero atu nei ia ki a rātou. Ā, i pahawa ake, nā, ka oti te tuhituhi ka whakamāramahia ērā e ia. Ā, koinei ngā kupu i kōrerotia atu ai e ia ki a rātou, e mea ana: Pēnei tā te Matua kī ki a Maraki—Nana, māku taku karere e tono, ā, māna e whakarite te huarahi i mua i ahau, ā, ka haere ohorere mai te Ariki e kimihia nei e koutou ki tēnei temepara, ko te karere pū anō o te kawenata, e āhuareka nei koutou; nana, ka haere mai ia, e ai tā te Ariki o ngā Mano.

2 Engari ko wai e ū ai i te rā e haere mai ai ia? ā, ko wai e tū ai ina puta mai ai ia? Nā te mea he rite ia ki te ahi a te kaitahipara, ā, he rite anō ki te hopi o te kaihoroi.

3 Ā, ka noho mai ia hei kaitahipara, ā, hei kaiwhakapai hiriwā; ā, māna ngā tama a Rewi e whakapai, ā, ka whakahemokia tō rātou para anō nei he kōura, he hiriwā, kia tāpaea ai e rātou he tāpaenga ki te Ariki i runga i te tika.

4 Kātahi ka āhuareka te tāpaenga a Hura me Hiruharama ki te Ariki, ka rite ki ngā rā onamata, me ngā tau o mua.

5 Ā, ka whakatata atu au ki a koutou kia whakarite whakawā; ā, ka tū au hei kaiwhakaatu wawe ki ngā tohunga makutu, ā, ki ngā kaipūremu, ā, ki ngā kaioati teka, ā, ki te hunga e tāhae nei i ngā utu a te kaimahi, a te pouaru me te pani, ā, ki te hunga e whakapeau kē i te manene, ā, kāore e wehi ana ki ahau, e ai tā te Ariki o ngā Mano.

6 Nā, ko au te Ariki, kāore au e panoni; nō reira koutou e ngā tamariki a Hākopa i kore ai i pau.

7 Nō ngā rangi pū anō o ō koutou tūpuna i whakarērea ai e koutou aku tikanga tapu, ā, kīhai i puritia e koutou. Hoki mai ki ahau, ā, ka hoki ahau ki a koutou, e ai tā te Ariki o ngā Mano. Engari ka kī koutou: Mā hea anō mātou hoki atu ai?

8 Ka tāhae rānei te tangata i tā te Atua? Heoi kua tāhaetia tāku e koutou. Engari e kī ana koutou: He pēhea tā mātou tāhae i tāu? I ngā whakatekau me ngā tāpaenga.

9 Kua kangaia koutou ki tētahi kanga, nā te mea kua tāhaetia au e koutou, ko tēnei iwi katoa pū anō.

10 Kawea mai e koutou ngā whakatekau ki roto i te pātaka, kia whai kai ai tōku whare; ā, waiho hoki tēnei hei whakamātautau mōku, e ai tā te Ariki o ngā Mano, mehemea rānei e huakina e au ngā matapihi o te rangi, ā, ka ringihia iho tētahi manaakitanga ki a koutou, ā, kia kore rā anō e whai kopa mō tērā.

11 Ā, māku te kaihoro e riri mō koutou te take, ā, e kore ia e whakangaro i ngā hua o tōu whenua; e kore rānei e marere noa ngā hua o tā koutou waina i mua i te wā tika i ngā māra, e ai tā te Ariki o ngā Mano.

12 Ā, ka karangatia koutou e ngā iwi katoa, he mea manaakitia koutou, nā te mea ka ai koutou hei whenua āhuareka, e ai tā te Ariki o ngā Mano.

13 Kua kaha ā koutou kupu ki ahau, e ai tā te Ariki. Heoi kei te kī ake koutou: He aha tā mātou i kī atu ai mōu?

14 Kua kī ake koutou: Kāore he hua ō te mahi ki a Atua, ā, he aha hoki te rawa o tā mātou pupuri i āna tikanga tapu me te hīkoi pāpōuri anō i te aroaro o te Ariki o ngā Mano?

15 Ināianei ā, ka kīa e mātou he harikoa te hunga whakakake; āe rā, kua whakaritea ake te hunga e mahi whakarihariha ana; āe rā, ka whakaputaina anō hoki te hunga e whakamātautau ana i te Atua.

16 I te wā i kōrero putuputu ai te hunga i wehi nei ki te Atua tētahi ki tētahi, ā, ka aro atu te Ariki, ā, ka rongo; ā, ka tuhia tētahi pukapuka maumaharatanga i tōna aroaro mō te hunga i wehi nei ki te Ariki, ā, te hunga i whaiwhakaaro atu ki tōna ingoa.

17 Ā, māku anō hoki rātou, e ai tā te Ariki o ngā Mano, hei taua rā e mahia ai e ahau aku taonga; ā, māku rātou e tohu anō nei he tangata e tohu ana i tāna ake tama e mahi ana ki a ia.

18 Kātahi koutou ka hoki, ā, ka kite i ngā rerekētanga o tā te tangata tika, ā, o tā te tangata kino, o tā te tangata e mahi ana ki te Atua, ā, o tā te mea e kore nei e mahi ki a ia.