1 He pono, he pono tāku e mea atu nei e hiahia ana au kia tuku atawhai koutou i te hunga rawakore; engari kia tūpato kei tuku atawhai koutou i te hunga rawakore i mua i te tangata kia kitea ai e rātou; ki te pēnei kāore he utu mō koutou mai i tō koutou Matua i te rangi.

2 Nō reira, i a koutou e tuku atawhai ana kaua e whakatangihia te tētere i mua i a koutou, he pērā anō te hunga arero rua i roto i ngā wharekarakia, ā, i runga i ngā tiriti, kia whai korōria rātou i te tangata. He pono tāku e mea atu nei ki a koutou, kei a rātou tō rātou utu.

3 Engari i a koutou e tuku atawhai ana kaua e tuku i tō ringa mauī kia mōhio ki tā te ringa matau;

4 Kia hunaia ā koutou atawhainga; ā, ko tō koutou Matua e kite huna nei, māna noa koutou e utu.

5 Ā, i a koutou e inoi ana kaua koutou e pērā me te hunga arero rua, nā te mea e aroha ana rātou ki te inoi, e tū ana i roto i ngā whare karakia me ngā kokonga o ngā tiriti, kia kitea ai e te tangata. He pono tāku e mea atu nei ki a koutou, kei a rātou tō rātou utu.

6 Engari koutou, i a koutou e inoi ana, me kuhu atu ki roto i tō ruma iti, ā, ina katia e koe tō tatau, me inoi ake ki tō koutou Matua i te wāhi ngaro; ā, ko tō Matua, e kite ana i te wāhi ngaro, māna koutou e utu noa.

7 Engari i a koutou e inoi ana, kaua e whakahuatia ake ngā tōaitanga tekateka, he pērā i ngā tauiwi, nā te mea e whakaaro ana rātou ka rangona rātou mō tā rātou kōrero nui.

8 Nō reira kaua rā koutou e rite ki a rātou, nā te mea e mōhio ana tō koutou Matua he aha rā ngā mea e hapa nei koutou i mua i tā koutou inoi noa ake ki a ia.

9 Nō reira me inoi ake koutou i runga i tēnei ritenga: E tō mātou Matua i te rangi, kia tapu tōu ingoa.

10 Kia meatia tāu e pai ai ki runga i te whenua kia rite anō ki tō te rangi.

11 Murua ō mātou hara me mātou hoki e muru nei i ō te hunga e hara ana ki a mātou.

12 Aua hoki mātou e kawea kia whakawaia, engari whakaorangia mātou i te kino.

13 Nōu hoki te kīngitanga, te kaha, me te korōria, āke ake ake. Āmine.

14 Nā, ki te muru koutou i ngā hara o ō koutou huānga ka muru te Matua i ō koutou anō hoki;

15 Engari ki te kore koutou e muru i ō te tangata hara, e kore anō hoki te Matua e muru nei i ō koutou hara.

16 Waihoki, i a koutou e nohopuku ana kaua e pērā me te hunga arero rua, i runga i te hua whakapoururu, nā te mea e whakaahua kē ana rātou i ō rātou mata kia rite tō rātou āhua i mua i te tangata me te mea nei kei te nohopuku rātou. He pono tāku e mea atu nei ki a koutou, kei a rātou tō rātou utu.

17 Engari koutou, i a koutou e nohopuku ana, whakawahia tōu māhunga, ā, horoia tōu mata;

18 Kia kore ai e rite tō koutou āhua i mua i te tangata me te mea nei kei te nohopuku koutou, engari i mua i tō koutou Matua, i te wāhi ngaro; kātahi tō koutou Matua, e kite huna nei, māna koutou e utu noa.

19 Kei whakatakotohia ake he taonga mō koutou ake anō i runga i te whenua, ki te wāhi e whakakinotia ai e te kōwenewene, e te waikura hoki, ki te wāhi e tomokia atu e ngā kaiwhānako, ā, ka whānakotia;

20 Engari whakatakotohia ake he taonga mō koutou ake anō i te rangi, ki te wāhi e kore nei e whakakinotia ana e te kōwenewene, e te waikura, ki te wāhi e kore nei e tomokia atu e te kaiwhānako, e whānako noa nei rānei.

21 Nā, ko te wāhi i reira ō koutou taonga, koia hoki te wāhi i reira ō koutou ngākau.

22 Ko te karu te māramatanga o te tīnana; nō reira, mehemea, ka kotahi tonu tō karu, ka kī katoa tō tīnana i te māramatanga.

23 Engari mehemea ka kino tō karu, ka kī katoa tō tīnana i te pōuritanga. Nō reira, mehemea, he pōuri te māramatanga kei roto nei i a koutou, anō te nui o taua pōuritanga!

24 Kāore e taea ana e te tangata te mahi pononga ki ngā rangatira e rua; nā te mea ka mauāhara ki tētahi, ā, ka aroha ki tērā atu, ka mau rānei ia ki tētahi, ā, ka whakahāwea ki tērā atu. Tē taea e koutou te mahi pononga ki te Atua rāua tahi ko te Taonga.

25 Ināianei ā i pahawa ake, nā, i te kōrerotanga ake a Ihu i ēnei kupu ka titiro atu ia ki runga i te hunga nāna nei i kōwhiri, ā, ka kī atu ki a rātou: Kia mahara koutou ki ngā kupu kua kōrerotia nei e au. Nana rā, ko koutou te hunga nāku nei i kōwhiri ki te minita atu ki tēnei iwi. Nō reira ko taku kupu tēnei ki a koutou, kei whakaaro koutou mō ō koutou oranga, he aha hei kai mā koutou, he aha rānei hei inu mā koutou; mō ō koutou tīnana rānei, he aha rānei hei kākahu. Ehara rānei i te mea he nui ake te oranga i te kai, me te tīnana i te kākahu?

26 Tirohia ngā manu o te rangi, e kore nei e rui, e kore hoki e kokoti, e kohikohi ki roto ki ngā whare wīti; heoi e whāngaia tonutia ana rātou e tō koutou Matua i te rangi. Ehara rānei koutou i te paku pai ake i a rātou?

27 Ko wai o koutou e taea ana e ia te tāpiri atu mā te whakaaro noa te whatianga kotahi ki tōna rahinga?

28 Ā, he aha koutou e whakaaro ai mō te kākahu? Whakaarohia ngā rengarenga o te whenua me tō reira tupuranga; kāore ēnā e mahi, kāore rānei ēnā e miro;

29 Heoi ko taku kupu tēnei ki a koutou, kīhai a Horomona, i tōna korōria katoa, i rite tōna kākahuranga ki tētahi o ēnei.

30 Nā reira, ki te pēnei tā te Atua whakakākahuranga i ngā pātītī o te whira, e tupu ana i tēnei rā, ā, hei āpōpō makaia atu ai ki roto i te umu, waihoki ka pērā anō tana whakakākahu i a koutou, mehemea ehara koutou i te mea whakapono iti.

31 Nō reira kaua e whakaaro, e mea ana, He aha hei kai mā tātou? He aha hei inu mā tātou? Ka kākahuria tātou ki te aha?

32 Nā te mea kei te mōhio tō koutou Matua i te rangi he aha ngā mea e hapa ana koutou.

33 Engari whaia tuatahitia atu te kīngitanga o te Atua me tōna tika, ā, ka tāpirihia atu ēnei mea katoa ki a koutou.

34 Nō reira kaua e whakaaro mō āpōpō, ka whakaaro te āpōpō ki āna mea ake anō. Kāti rā te rangi ki tō reira kino.