1 Ināianei ā, nana, ko taku kupu tēnei ki a koutou, me matua rapu e koutou ēnei mea. Āe rā, he whakahau tēnei e hoatu ai ki a koutou kia kaha koutou ki te rapu i ēnei mea; nā te mea he whaitikanga nui ngā kupu a Ihāia.

2 Nā, he pono tāna i mea ai e pā ana ki tōku iwi ko rātou nei nō te whare o Iharaira; nō reira e tika pū ana kia kōrero atu ia ki ngā Tauiwi anō hoki.

3 Ā, kua mana, ā, ka mana anō hoki ngā mea katoa i kōrerotia ai e ia, e rite pū ana ki ngā kupu i kōrerotia ai e ia.

4 Nō reira kia whai taringa mai ki aku kupu; tuhia ngā mea kua kōrerotia nei ki a koutou; ā, ka puta atu ēnei mea ā te wā e pai ai ki te Matua ki ngā Tauiwi.

5 Ā, ka whakaorangia ngā tangata katoa e whakarongo mai ai ki aku kupu, ā, e rīpenetā ai, ā, e rumakina ai. Rapua ngā poropiti, nā te mea he tokomaha ngā mea e whakaatu mai nei mō ēnei mea.

6 Ināianei ā i pahawa ake, nā, i te kōrerotanga a Ihu i ēnei kupu ka kī atu anō ia ki a rātou, whai muri iho i tana whakamāramatanga atu ki a rātou i ngā karaipiture katoa i whiwhi ai rātou, ka kī atu ia ki a rātou: Nana, kei te hiahia au kia tuhituhia atu anō ētahi karaipiture e koutou, ērā kāore anō kia tuhia e koutou.

7 Ā, i pahawa ake, nā, ka kī atu ia ki a Nīwhai: Haria mai te tuhinga i tuhia nei e koutou.

8 Ā, i te wā i haria atu ngā tuhinga e Nīwhai, ā, ka whakatakotoria iho i mua i a ia, ka whiua reretia atu ōna karu ki runga rā, ā, ka kī ake:

9 He pono tāku e mea atu nei ki a koutou, nāku taku pononga a Hamuera, te Rāmana, i whakahau kia whakaatu atu ia ki tēnei iwi, nā, ka ara ake te hunga tapu tokomaha i te mate a te rā e whakakorōria te Matua i tōna ingoa i roto nei i ahau, ā, ka puta mai ki ngā mea tokomaha, ā, ka minita atu ki a rātou. Ā, ka kī atu ia ki a rātou: Kāore ianei i pērā?

10 Ā, ka whakautu ana apataki ki a ia, ā, ka kī ake: Āe rā, e te Ariki, i poropiti a Hamuera e rite ana ki āu kupu, ā, i whakatutukihia katoatia ērā mea.

11 Ā, ka kī atu a Ihu ki a rātou: He aha koutou i kore ai e tuhituhi i tēnei mea, kua ara ake te hunga tapu tokomaha, ā, ka puta atu ki ngā mea tokomaha, ā, ka minita atu ki a rātou?

12 Ā, i pahawa ake, nā, ka maumahara a Nīwhai kāore anō kia tuhia tēnei mea.

13 Ā, i pahawa ake, nā, ka whakahau a Ihu kia tuhia ēnei mea; nō reira kua tuhia pērātia i tāna i whakahau ai.

14 Ināianei ā i pahawa ake, nā, i te wā i whakamāramatia atu e Ihu ngā karaipiture kia kotahi, kua tuhia nei e rātou, ka whakahau ia ki a rātou kia whakaako rātou i ngā mea nāna nei i whakamārama atu ki a rātou.