1 Ā, i pahawa ake, nā, i whakahau ia i te whakaminenga kia mutu tā rātou inoi, me āna apataki anō hoki. Ā, i whakahau ia i a rātou kia kaua e mutu tā rātou inoi i roto i ō rātou ngākau.

2 Ā, ka whakahau ia i a rātou kia mairanga ake, ā, kia tū ake ō rātou waewae ki runga. Ā, ka mairanga ake rātou, ā, ka tū ō rātou waewae ki runga.

3 Ā, i pahawa ake, nā, ka wāwāhi paraoa ia anō, ā, ka manaakitia, ā, ka hoatu ki ngā apataki kia kainga.

4 Ā, ka kai ana rātou ka whakahau ia i a rātou kia wāwāhi paraoa, me te hoatu ki te whakaminenga.

5 Ā, ka oti ana tā rātou hoatu ki te whakaminenga ka hoatu anō e ia he waina kia inumia ai, ā, ka whakahaua rātou kia hoatu ai e rātou ki te whakaminenga.

6 Nā, kāore he paraoa, he waina rānei, i kawea mai e ngā apataki, e te whakaminenga rānei;

7 Engari he pono tana hoatu i te paraoa ki a rātou hei kai, he waina anō hoki hei inu.

8 Ā, ka kī atu ia ki a rātou: Ko te tangata e kai ana i tēnei paraoa e kai nei i tōku tīnana ki tōna wairua; ā, ko te tangata e inu ana i tēnei waina e inu nei i ōku toto ki tōna wairua; ā, e kore rawa tōna wairua e hiakai, e hiainu rānei.

9 Nā, i te wā kua kai, ā, kua inu te whakaminenga, nana, i kī rātou i te Wairua; ā, i karanga ake rātou i runga i te reo kotahi, ā, ka tuku korōria ki a Ihu, ki te mea i kite ai, ā, i rongo ai rātou.

10 Ā, i pahawa ake, nā, i te wā kua whakakorōria katoa rātou ki a Ihu, ka kī ake ia ki a rātou: Nana ka whakamutu au i te whakahaunga i whakahau mai nei te Matua ki ahau e pā ana ki tēnei iwi, ko rātou nei he mōrehu nō te whare o Iharaira.

11 E mahara ana koutou ki tāku i kōrero ai ki a koutou, i mea ai ina tutuki ngā kupu a Ihāia—nana, kua tuhia ērā, kei a koutou ērā i mua i tō koutou aroaro, nō reira rapua ērā—

12 Ā, he pono, he pono tāku e mea atu nei ki a koutou, ina whakatutukihia ērā mea ko reira anō hoki tutuki ai te kawenata i kawenata ai te Matua ki tōna iwi, E te whare o Iharaira.

13 Ko reira anō ngā mōrehu, e noho marara ana i runga i te mata o te whenua, e huihui mai i te rāwhiti, mai i te uru, mai i te tonga, ā, mai i te raki; ā, ka kūmea mai rātou ki te mātauranga o te Ariki tō rātou Atua, nāna nei rātou i hoko.

14 Ā, kua whakahau mai te Matua ki ahau kia hoatu e au tēnei whenua ki a koutou, hei mea tuku iho mō koutou.

15 Ā, ko taku kupu tēnei ki a koutou, ki te kore ngā Tauiwi e rīpenetā whai muri iho i te manaakitanga e whiwhi ai rātou, whai muri iho i tā rātou whakamarara atu i tōku iwi—

16 Kātahi koutou te mōrehu o te whare o Hākopa, e haere atu ai ki waenganui i a rātou; ā, hei waenganui koutou i a rātou, ā, ka tokomaha rātou; ā, hei waenganui koutou i a rātou me te mea nei he raiona kei waenganui i ngā kararehe o te ngahere, ā, me te mea nei he kūao raiona kei waenganui i ngā kāhui hipi, ki te tika atu ia ki waenga, ka takatakahia, ka haehaea kia maha ngā wāhi, kāore hoki tētahi hei whakaora.

17 Ka mairangatia tō ringa ki runga i ō hoariri, ā, ka hātepea atu ō hoariri katoa.

18 Ā, ka kohikohi ngātahi au i taku iwi anō nei he tangata e kohikohi ana i āna paihere ki te patunga wīti.

19 Nā, ka meinga hoki e ahau tōku iwi i kawenata ai te Matua ki a rātou, āe rā, ka meinga e ahau tō haona hei rino, ā, ka meinga e ahau ō matikuku hei parāhe. Ā, ka patua e koe ngā iwi maha a mongamonga noa; ā, māku ā rātou kākano e whakatapu ki te Ariki, me ō rātou rawa ki te Ariki o te ao katoa. Ā nana, ko au anō ia māna ēnei mea e mahi.

20 Ā, ka pahawa ake tēnei, e ai tā te Matua, e iri ai te hoari o tōku tika ki runga i a rātou hei taua rā; ā, ki te kore rātou e rīpenetā ka taka iho ki runga i a rātou, e ai tā te Matua, āe rā, ki runga pū anō i ngā iwi katoa o ngā Tauiwi.

21 Ā, ka pahawa ake, nā, ka whakapūmau au i tōku iwi, E te whare o Iharaira.

22 Ā nana, māku tēnei iwi e whakapūmau i runga i tēnei whenua, hei whakatutuki i te kawenata i kawenata ai au ki tō koutou matua a Hākopa; ā, ka riro tēnei hei Hiruharama Hou. Ā, hei waenganui ngā mana o te rangi i tēnei iwi; āe rā, hei waenganui pū anō au i a koutou.

23 Nana, ko au tēnā i kōrerotia nei e Mohi, e mea ana: Ka mairangatia ake tētahi poropiti e te Ariki tō koutou Atua ki ā koutou teina, he rite ki ahau; ka whakarongo koutou ki a ia i roto i ngā mea katoa e kōrerotia ai e ia ki a koutou. Ā, ka pahawa ake, nā, ka hātepea atu ngā tāngata katoa e kore nei e whakarongo ai ki taua poropiti i roto i tōku iwi.

24 He pono tāku e mea atu nei ki a koutou, āe rā, ko ngā poropiti katoa mai i Hamuera me ērā atu whai muri iho, ko ngā mea kua kōrerotia ake nei, kua whakaaturia mōku.

25 Ā nana, ko koutou ngā tamariki a ngā poropiti; ā, ko koutou ngā tamariki a te whare o Iharaira; ā, nō te kawenata koutou i kawenata ai te Matua ki ō koutou tūpuna, e mea ana ki a Aperahama: Ā, hei roto i ōu uri manaakitia ai ngā iwi katoa o te ao.

26 Kua mairangatia ake au e te Matua ki a koutou i te tuatahi, ā, kua tonoa au kia manaakitia koutou hei whakatahuritanga mai i tēnā, i tēnā o koutou i ōna hē; ā, ka pēnei nā te mea ko koutou ngā tamariki a te kawenata—

27 Ā, hei muri i te manaakitanga i a koutou ka whakatutuki te Matua i te kawenata i kawenata ai ia ki a Aperahama, e mea ana: Hei roto i ōu uri manaakitia ai ngā iwi katoa o te ao—tae atu ana ki te maringitanga iho o te Wairua Tapu mā roto nei i ahau ki runga i ngā Tauiwi, ko taua manaakitanga ki runga i ngā Tauiwi i meinga ai rātou hei mea kaha ake i runga i ngā mea katoa, tae atu ana ki te whakamararatanga atu o tōku iwi, E te whare o Iharaira.

28 Ā, ka meinga rātou hei whiu ki te iwi o tēnei whenua. Hei aha koa, ina whiwhi rātou i te raneatanga o tōku rongopai, kātahi ka tahuri atu ō rātou ngākau ki ahau ka whakahokia e au ō rātou hara ki runga i ō rātou māhunga ake, e ai tā te Matua.

29 Ā, ka mahara au i te kawenata i kawenata nei au ki tōku iwi; ā, kua kawenata au ki a rātou kia kohikohi ngātahi au i a rātou i tōku ake wā, kia hoatu anōtia e au ki a rātou te whenua o ō rātou tūpuna hei whenua tuku iho mō rātou, koia ko te whenua o Hiruharama, koia te whenua o te kupu i whakaaria mai nei ki a rātou mō āke tonu atu, e ai tā te Matua.

30 Ā, ka pahawa ake, nā, ka tata mai te wā, e kauhautia atu ai te raneatanga o tōku rongopai ki a rātou;

31 Ā, ka whakapono rātou i ahau, nā, ko au a Ihu Karaiti, te Tama a te Atua, ā, ka inoi ake ki te Matua i runga i tōku ingoa.

32 Kātahi ka whakanuia ake te reo o ō rātou tūtei, ā, kotahi tonu te reo e waiata ai rātou; nā te mea ka kite rātou kanohi ki te kanohi.

33 Kātahi ka kohikohi te Matua i a rātou anō, me te hoatu ki a rātou anō a Hiruharama hei whenua tuku iho mō rātou.

34 Kātahi ka papahū atu i te hari—Waiatatia ngātahitia, e koutou ngā wāhi ururua o Hiruharama; nā te mea kua whakaāio te Matua i tōna iwi, kua hokona e ia a Hiruharama.

35 Kua hura te Matua i tōna ringa tapu i ngā karu o ngā iwi katoa; ā, ka kite ngā tōpito katoa o te ao i te whakaoranga o te Matua; ā, he kotahi tonu māua ko te Matua.

36 Kātahi ka pahawa ake ērā mea kua tuhituhia: Maranga, maranga anō, kākahuria tō kaha, E Hīona; kākahuria ō kahu ātaahua, E Hiruharama, te pā tapu, nā te mea e kore nei e tomo atu ki roto i a koe a muri ake nei te hunga kokoti kore me te hunga poke.

37 Ruia atu te puehu i a koe; whakatika ake, noho iho, E Hiruharama; wetekina iho ngā here o tō kakī, E te tamāhine mauhere o Hīona.

38 Nā, e pēnei ana tā te Ariki: Kua hokona atu koutou e koutou anō mō te kore, ā, ehara i te moni māna koutou e whakahoki mai.

39 He pono, he pono tāku e mea atu nei ki a koutou, nā, ka mōhio tōku iwi i tōku ingoa; āe rā, hei taua rā mōhio ai rātou ko au anō tēnā e kōrero nei.

40 Kātahi ka kī ake rātou: Anō te ātaahua o ngā waewae i runga i ngā maunga o te tangata e kawe mai nei i te rongo whakahari; e kauhau ana i te maungārongo; e kawea mai ana te rongo whakahari ki te hunga pai, e whakapuaki ana i te whakaoranga; e mea ana ki a Hīona: E whakahaere ana tōu Atua!

41 Kātahi ka puta atu te karanga: Maunu koutou, maunu koutou, haere atu koutou i reira, kaua e pā atu ki ngā mea e poke ana; haere atu koutou i tōna aroaro; kia mā koutou e mau nei ngā ipu a te Ariki.

42 Nā, e kore nei koutou e haere atu ai i runga i te kaikā, e tūāoma rānei; nā, ka haere te Ariki i mua i a koutou, ā, ko te Atua o Iharaira hei hiku mō koutou.

43 Nana, ka āta mahi taku pononga; ka whakateiteingia, ā, ka whakarewaina, ā, ka tiketike rawa ia.

44 Ko te tini i mīharo ai ki a koe—i tūmatangāue ake tōna mata i tō te tangata, me tōna āhua i ngā tāngata katoa, me tōna āhua i ngā tama a te tangata—

45 Waihoki ka uwhiuwhia e ia ngā iwi maha; ka kopia ngā māngai o ngā kīngi ki a i ia, nā te mea ka kite rātou i ērā mea kāore i kōrerotia atu ki a rātou; ā, ka whakaarohia e rātou ērā mea kāore i rangona e rātou.

46 He pono, he pono tāku e mea atu nei ki a koutou kāore e kore ka puta mai ēnei mea katoa, e pērā ana i tā te Matua i whakahau mai ai i ahau. Kātahi ka whakatutukihia te kawenata i kawenata ai te Matua ki tana iwi; kātahi ka nōhia a Hiruharama anō e tōku iwi, ā, ka riro ia hei whenua tuku iho mō rātou.