1 Ināianei ā nana, kāore he tangata ora i waenganui i te iwi katoa o ngā Nīwhai i paku rangirua ai ki ngā kupu i kōrerotia nei e ngā poropiti tapu katoa; nā te mea i mōhio rātou e tika ana me tutuki ērā.

2 Ā, i mōhio rātou e tika ana kia haere mai ai te Karaiti, nā ngā tohu maha kua tukuna mai nei, e rite ana ki ngā kupu a ngā poropiti; ā, i mōhio rātou e tika ana kia pahawa ake ngā mea katoa e rite ana ki ērā mea kua kōrerotia ake nei nā ngā mea kua pahawa kē atu.

3 Nō reira i whakarere rātou i ō rātou hara katoa, me ō rātou mōrikarika, me ō rātou pūremutanga, ā, ka mahi ki te Atua i runga i te ū i te ao, i te pō.

4 Ināianei ā i pahawa ake, nā, i te wā i kahakina atu ngā kaipāhua hei mauhere, i te mea kāore tētahi o te hunga kīhai nei i whakamatea i māwhiti atu, ka makaia e rātou ā rātou mauhere ki roto i te whareherehere, ā, ka meatia kia kauhautia atu te kupu a te Atua ki a rātou; ā, ka whakawāteahia atu ngā tāngata katoa i rīpenetā ai i ō rātou hara me te uru ki roto i tētahi kawenata kia kaua e kōhuru anō.

5 Engari ko te hunga katoa kīhai i uru atu ai ki roto i tētahi kawenata, ā, ko te hunga i mahi tonu i aua kōhuru huna i ō rātou ngākau, āe rā, ka whakahēngia, ā, ka whakawhiua te hunga katoa e whakawetiweti ana ki ō rātou huānga e rite ana ki te ture.

6 Ā pēnei tā rātou whakamutu atu i aua whakakotahitanga whakarihariha, me aua mea huna, me aua whakakotahitanga mōrikarika, i roto i aua mea hoki te whakarihariha nui, ā, he maha anō ngā kōhurutanga i mea ai.

7 Ā pēnei pahemo atu ai te tau rua ngahuru mā rua, me te rua ngahuru mā toru anō hoki, me te rua ngahuru mā whā, me te rua ngahuru mā rima; ā pēnei kua pahemo atu ngā tau rua ngahuru mā rima.

8 Ā, he maha ngā mea i heipū ake ai, koia i ō ētahi karu, he mea nui, ā, he mea whakamīharo; ahakoa, tē taea ērā mea katoa te tuhituhi i tēnei pukapuka; āe rā, kāore e mau ana i tēnei pukapuka te kotahi hau rau o ngā mea i mea ai i waenganui i ngā tāngata tokomaha i ngā tau rua ngahuru mā rima;

9 Engari nana he tuhinga anō i reira e mau ana ngā whakahaeretanga o tēnei iwi; ā, kua tukuna mai tētahi tuhinga pono poto ake e Nīwhai.

10 Nō reira kua hangaia taku tuhinga e pā ana ki ēnei mea kia rite ai ki te tuhinga a Nīwhai, kua whaowhaoa nei i runga i ngā papa kua huaina ko ngā papa a Nīwhai.

11 Ā nana, kei te mahi au i taku tuhinga i runga i ngā papa kua hangaia nei e ōku ake ringaringa.

12 Ā nana, ko Moromona au, kua huaina ki te ingoa o te whenua o Moromona, ko te whenua i whakapūmauhia e Arami te hāhi ki waenganui i te iwi, āe rā, ko te hāhi tuatahi i whakapūmauhia ai ki waenganui i a rātou whai muri ake i tō rātou hē.

13 Nana, he apataki au nā Ihu Karaiti, te Tama a te Atua. Kua karangatia au e ia kia whakapuaki atu i te kupu ki waenganui i tana iwi, kia riro ai i a rātou te oranga tonutanga.

14 Ā, kua meinga e tika ana māku, e rite ana ki te hiahia o te Atua, kia tutuki i ngā inoi o te hunga kua riro, he mea tapu anō rātou, e rite ana ki tō rātou whakapono, e hanga nei i tētahi tuhinga mō ēnei mea kua meatia ake nei—

15 Āe rā, ko tētahi tuhinga iti mō ēnā mea kua heipū ake nei mai i te wā i wehe atu ai a Rīhai i Hiruharama ā mohoa noa nei.

16 Nō reira au e hanga nei i tētahi tuhinga mai i ngā tuhinga kua tukuna mai nei e te hunga i mua i ahau, tae noa ki te tīmatanga o ōku rā;

17 Kātahi au ka hanga i tētahi tuhinga mō ngā mea kua kite au i ōku ake karu.

18 Ā, e mōhio ana au he pono tēnei tuhinga e tuhia nei e au; ahakoa he maha ngā mea, nā te ritenga o tō mātou reo, tē taea e mātou te tuhituhi.

19 Ināianei ā, ka whakamutua tāku kōrero, nāku ake anō, ā, ka tīmata taku tuhinga mō ngā mea kua takoto ake i mua atu i ahau.

20 Ko Moromona ahau, he uri whakahanumikore o Rīhai. He take nui tāku hei whakanui i tōku Atua me tōku Kaiwhakaora a Ihu Karaiti, mōna i hari mai ō tātou tūpuna ki waho i te whenua o Hiruharama, (kāore tētahi i mōhio hāunga ko te hunga i haere tahi me ia ki waho i te whenua) mōna anō i homai ki ahau me tōku iwi te mātauranga nui e pā ana ki te whakaoranga o ō tātou wairua.

21 He pono nāna nei i manaaki te whare o Hākopa, ā, kua aroha nui ia ki ngā uri o Hōhepa.

22 Ā i te mea kua pupuri ngā tamariki a Rīhai i āna whakahaunga kua manaakitia rātou e ia, ā, nāna rātou i whakakake e rite ana ki tana kupu.

23 Āe rā, kāore e kore ka kawea mai e ia tētahi toenga o ngā uri o Hōhepa ki te mātauranga o te Ariki tō rātou Atua.

24 Ā, e ora ana te Ariki, ka whakakotahi ia mai i ngā tōpito e whā o te ao ngā toenga katoa o ngā uri o Hākopa, kua whakamararatia atu ki runga i te mata katoa o te whenua.

25 Ā, he pērā i tāna kawenata ki te whare katoa o Hākopa, waihoki ka tutuki te kawenata kua kawenatatia nei e ia ki te whare o Hākopa i tōna anō wā, tae atu ana ki te whakahokinga i te whare katoa o Hākopa ki te mātauranga o te kawenata nāna nei i kawenata ki a rātou.

26 Kātahi ka mōhio rātou ki tō rātou Kaihoko, ko ia nei ko Ihu Karaiti, te Tama a te Atua; kātahi ka whakakotahitia rātou mai i ngā tōpito e whā o te ao ki ō rātou ake whenua, mai i ngā wāhi i whakamararatia atu ai rātou; āe rā, e ora ana te Ariki ka rite tēnei mea. Āmine.