1 Ā, i pahawa ake i te kōrerotanga a Ihu i ēnei kupu, ka kōrero takitahi atu ia ki ana apataki, e mea atu ana ki a rātou: He aha tāu ki ahau, ina riro atu au ki tōku Matua?

2 Ā, ka kī ake rātou katoa, hāunga ko ngā mea tokotoru, e mea ana: E hiahia ana mātou whai muri iho i te koroheketanga o te tangata, kia mutu rā anō, tā mātou minitatanga, kua karangatia nei mātou e koe, kia haere wawe atu mātou ki a koe i tō kīngitanga.

3 Ā, ka kī atu ia ki a rātou: Kua manaakitia koutou nā tā koutou hiahia ki tēnei mea i ahau; nō reira, hei muri iho ina whitu tekau mā rua ō koutou tau ka haere mai ki ahau i tōku kīngitanga; ā, ka kitea e koutou te okiokinga i a au.

4 Ā, i te wā kua kōrero atu ia ki a rātou, ka tahuri atu i a ia anō ki te tokotoru, ā, ka kī atu ia ki a rātou: He aha tā koutou e pai nā hei mahi māku ki a koutou, ina riro atu au ki te Matua?

5 Ā, ka pōuri ō rātou ngākau, nā te mea kāore i māia rātou kia kōrerohia atu ai te mea i hiahia nei rātou.

6 Ā, ka kī atu ia ki a rātou: Nana, e mōhio ana au ki ō koutou whakaaro, ā, e hiahia ana koutou i te mea i hiahia ai a Hoani, taku mea arohaina, te mea i a au i roto i taku minitatanga, i mua i taku whakairinga ake e ngā Hurai.

7 Nō reira, he rahi ake ō koutou manaakitanga, nā te mea e kore nei koutou e rongo i te mate; engari ka ora koutou kia kitea ngā mahinga katoa a te Matua ki ngā tamariki a te tangata, tae atu ana ki te wā e tutuki ai i ngā mea katoa e rite ana ki tā te Matua e pai ai, ina haere mai au i runga i tōku korōria me ngā mana katoa o te rangi.

8 Ā, e kore rawa koutou e rongo i ngā mamaetanga o te mate; engari ina haere mai au i runga i tōku korōria ka panonitia koutou i te kimonga o te karu mai i te hanga matemate ki te matekore; kātahi ka manaakitia koutou i roto i te kīngitanga o tōku Matua.

9 Hei āpiti anō, e kore koutou e mamae i a koutou e noho ana i te kikokiko, kāore hoki e pōuri hāunga mō ngā hara o tēnei ao; ā, ka pēnei katoa au nā te mea kua hiahia mai nei i ahau, nā te mea kua hiahia koutou kia kūmea mai ngā wairua o te tangata ki ahau, i te ao e tū ana.

10 Ā, mō tēnei take e ranea ai tō koutou hari; ā, ka noho iho koutou i roto i te kīngitanga o tōku Matua; āe rā, ka ranea tō koutou hari, e pērā ana i tā te Matua homai i te raneatanga o te hari ki ahau; ā, ka rite anō koutou ki ahau, ā, e rite ana ahau ki tōku Matua; ā, he kotahi tonu māua ko te Matua;

11 Ā, e whakaatu ana te Wairua Tapu mō māua ko te Matua; ā, e homai ana e te Matua te Wairua Tapu ki ngā tamariki a te tangata, mōku te take.

12 Ā, i pahawa ake, nā, i te kōrerotanga a Ihu i ēnei kupu, ka pā atu ia ki tēnā me tēnā o rātou hāunga ko te tokotoru e noho tonu mai nei, kātahi ka wehe atu ia.

13 Ā nana, ka tūwhera ake ngā rangi, ā, ka kahakina ake ki roto i te rangi, ā, ka kitea, ā, ka rangona ngā mea tē taea te kōrero.

14 Ā, i whakahaua rātou kia kaua e kōrerohia atu; kāore rānei i hoatu kaha ki a rātou e taea ai e rātou te kōrero atu;

15 Ā, mehemea i roto i te tīnana i waho atu rānei i te tīnana kāore rātou i te mōhio; nā te mea i āhua rite tā rātou ki tētahi whakaputanga kētanga i ō rātou āhua, nā, kua whakarerekēhia rātou mai i tēnei tīnana kikokiko ki tētahi āhuatanga matekore, e taea ai e rātou te kite i ngā mea o te Atua.

16 Engari i pahawa ake, nā, ka minita atu anō rātou i runga i te mata o te whenua; hei aha koa kīhai rātou i minita mō ngā mea i rangona ai, i kitea ai e rātou, nā te whakahaunga i hoatu ai ki a rātou i te rangi.

17 Ināianei ā, mehemea he hanga matemate, he hanga matekore rānei, mai i te rā o tō rātou whakaputanga kētanga, kāore au i te mōhio.

18 Engari ko tēnei tāku e mōhio ai, e ai ki te tuhinga kua homai nei—i haere atu rātou i runga i te mata o te whenua, ā, ka minita atu ki ngā tāngata katoa, e whakakotahi mai ana ki te hāhi ngā tāngata katoa e whakapono ai ki tā rātou kauhautanga; ā, ka whiwhi te hunga katoa i rumakina ai ki te Wairua Tapu.

19 Ā, i makaia rātou ki roto i te whareherehere e te hunga ehara nei nō te hāhi. Ā, kāore rātou i taea e ngā whareherehere, nā, i pakaru iho kia rua ngā wāhi.

20 Ā, ka makaia iho rātou ki roto i te whenua; engari ka patua iho e rātou te whenua ki te kupu a te Atua, nā konā whakaputaina mai ai rātou i runga i tōna mana i ngā hohonutanga o te whenua; nō reira kāore i taea e rātou te keri i ngā rua e tika ana hei pupuri i a rātou.

21 Ā, e toru ngā wā kua makaia ki roto i te oumu, ā, kāore i mamaetia.

22 Ā, e rua ngā wā kua makaia ki roto i te rua kararehe mohoao; ā nana, i tākaro tahi rātou me ngā kararehe mohoao anō nei he tamaiti me tētahi reme ngote ū, ā, kāore i mamaetia.

23 Ā, i pahawa ake, nā, ka pēnei tā rātou haere atu ki waenganui i te iwi o Nīwhai, ā, i kauhau atu i te rongopai a te Karaiti ki ngā iwi katoa i runga i te mata o te whenua; ā, i whakatahuritia atu ki te Ariki, ā, i whakakotahitia atu ki te hāhi o te Karaiti, ā pēnei kua manaakitia ngā tāngata o taua whakatipuranga, e rite ai ki te kupu a Ihu.

24 Ināianei ahau, a Moromona, ka whakamutu taku kōrero e pā ana ki ēnei mea mō tētahi wā.

25 Nana, whano au ka tuhi i ngā ingoa o te hunga e kore nei e rongo i te mate, engari kua whakahaua au e te Ariki kia kaua; nō reira kāore au e tuhituhi i ērā mea, nā te mea kua hunaia i te ao.

26 Engari nana, kua kite au i rātou, ā, kua minita rātou ki ahau.

27 Ā nana, kei waenganui rātou i ngā Tauiwi, ā, kāore ngā Tauiwi e mōhio ki a rātou.

28 Ka uru anō rātou ki waenganui i ngā Hūrai, ā, kāore ngā Hūrai e mōhio ai ki a rātou.

29 Ā, ka pahawa ake, inā kite te Ariki he pai i runga i tana whaimātauranga kia minita rātou ki ngā hapū marara o Iharaira, ā, ki ngā iwi katoa, ki ngā hapū, ki ngā reo me ngā tāngata, ā, ka kawea atu i a rātou ki a Ihu ngā wairua tokomaha, kia tutuki tō rātou hiahia, waihoki nā te mana whakapakepake o te Atua kei roto nei i a rātou.

30 Ā, he rite rātou ki ngā anahera a te Atua, ā, ki te inoi ake rātou ki te Matua i runga i tōku ingoa ka taea e rātou te whakakite atu i a rātou anō ki ngā tāngata katoa e pai ai ki a rātou.

31 Nō reira, ka meatia ngā mahinga nui whakamīharo i runga i a rātou, i mua i te rā nui e haere mai nei ina tū ngā tāngata katoa i mua i te nohoanga-whakawā o te Karaiti;

32 Āe rā ka meatia tētahi mahinga nui whakamīharo ki waenganui i ngā Tauiwi e rātou, i mua i taua rā whakawā.

33 Ā, mehemea i a koutou ngā karaipiture e whakaatu ana i ngā mahinga whakamīharo katoa a te Karaiti, kua mōhio koutou, e rite ana ki ngā kupu a te Karaiti, e tino puta mai ai ēnei mea.

34 Ā, auē te mate mō te tangata e kore nei e whakarongo ki ngā kupu a Ihu, ki te hunga anō hoki nāna nei i kōwhiri, nāna nei hoki i tono ki waenganui i a rātou; nā te mea ko te hunga e kore nei e whakawhiwhi i ngā kupu a Ihu me ngā kupu o te hunga nāna nei i tono, e kore nei e whakawhiwhi i a ia; nō reira e kore ia e whakawhiwhi i a rātou hei te rā whakamutunga;

35 Ā, kua pai ake mehemea kīhai rātou i whānau mai. Nā te mea e whakaaro ana koutou e taea ana e koutou te māwhiti atu i te tika a tētahi Atua kua whakahēngia, kua takatakahia iho ki raro i ngā waewae o te tangata, mā reira puta mai ai te whakaoranga?

36 Ināianei ā nana, i te mea i kōrero ai au e pā ana ki te hunga i kōwhiria e te Ariki, āe rā, ko te tokotoru pū anō i kahakina ake ai ki roto i ngā rangi, me taku kore mōhio mehemea i whakamākia rātou i te hanga matemate ki te hanga matekore—

37 Engari nana, nō taku tuhinga, kua inoi atu au ki te Ariki, ā, kua whakamōhiotia mai ki ahau, nā, e tika pū ana kia meatia tētahi whakarerekētanga ki runga i ngā tīnana, ki te kore e tika ana kia rongoa rātou i te mate;

38 Nō reira, kia kore ai rātou e rongo i te mate, i meatia tētahi whakarerekētanga ki runga i ō rātou tīnana, kia kore ai rātou e rongo i te mamae, i te pōuri rānei hāunga mō ngā hara o te ao.

39 Nā, ehara tēnei whakarerekētanga i te taurite ki te mea e heipū ake ai hei te rā whakamutunga; engari i meatia tētahi whakarerekētanga ki runga i a rātou, nā konā kāore i whaikaha a Hātana ki runga i a rātou, kāore i taea e ia te whakawai i a rātou; ā, i whakatapua rātou i te kikokiko, nā, i tapu rātou, ā, kāore ngā mana o te whenua e kaha nei ki te pupuri i a rātou.

40 Ā, ka noho tonu rātou i tēnei āhuatanga tae noa atu ki te rā whakawā a te Karaiti; ā, hei taua rā whiwhi ai rātou i tētahi whakarerekētanga nui ake, ā, kia whakawhiwhia ki roto i te kīngitanga o te Matua kia kore ai e puta atu anō, engari kia noho tahi me te Atua i ngā rangi mō āke tonu atu.