1 Nana, i pahawa ianei ake, nā, i te kōrerotanga ake a Ihu i ēnei kupu, ka titiro atu ia anō ki runga i te whakaminenga, ā, ka kī atu ia ki a rātou: Nana, kua tata mai tōku wā.

2 E kite ana au kei te ngoikore koutou, nā, tē taea e koutou te mārama ki āku kupu katoa kua whakahaua nei au e te Matua kia kōrerotia atu ai ki a koutou i tēnei wā.

3 Nō reira, haere ake koutou ki ō koutou kāinga, ā, whakaarohia ake ngā mea kua korero nei au, ā, kia inoi ake ki te Matua, i runga i tōku ingoa, kia mārama ai koutou me te whakarite i ō koutou hinengaro mō āpōpō, ā, ka haere mai anō au ki a koutou.

4 Engari ināianei ka haere atu au ki tōku Matua, me te whakakite atu i ahau anō ki aua iwi ngaro o Iharaira, nā te mea kāore rātou i te ngaro ki tōku Matua, nā te mea e mōhio ana ia ki te wāhi i haria atu ai rātou e ia.

5 Ā, i pahawa ake, nā, i te kōrerotanga pēnei a Ihu, ka whiua reretia atu anō ōna karu huri noa ki runga i te whakaminenga, ā, ka kitea e heke ana ō rātou roimata, ā, i te titiro pūmau katoa rātou ki a ia me te mea nei i te hiahia rātou kia piri tonu mai ia ki a rātou.

6 Ā, ka kī atu ia ki a rātou: Nana, kua kī tōku ate i te aroha ki a koutou.

7 He tūroro anō kei waenganui i a koutou? Haria mai ki konei. He mea e kopa ana, he matapō rānei, he ngongengonge rānei, he whakatūroro rānei, he ngerengere rānei, he mea whakamamaehia rānei, he turi rānei, he mea rānei kua pākia ki tētahi momo mate? Haria mai rātou ki ahau, ā, māku rātou e mahu, he aroha hoki nōku ki a koutou; kua kī tōku ate i te aroha.

8 Nā te mea kei te kite au e hiahia ana koutou kia whakakitea atu ki a koutou he aha tāku ki ō koutou huānga ki Hiruharama, nā te mea kei te kite au he ranea tō koutou whakapono kia mahu au i a koutou.

9 Ā, i pahawa ake, nā, i te wā i korero ai ia, ka haere ngātahi atu te whakaminenga katoa me ā rātou tūroro me ā rātou mate, me ā rātou kopa, me ā rātou matapō, me ā rātou wahangū, me ā rātou mea katoa e whakamamae ana i ngā mate katoa; ā, ka mahu ia i a rātou katoa i haria mai ai ki a ia.

10 Ā, ka tuohu iho rātou katoa, ko te hunga i whakamahu ai me te hunga i ora ai ki ōna waewae, ā, ka koropiko ki a ia; ā, ka kihi katoa te hunga i haere mai ai i te whakaminenga i ōna waewae, nā konā rā kaukauria ōna waewae ki ō rātou roimata.

11 Ā, i pahawa ake, nā, ka whakahau ia kia haria mai ai ā rātou tamariki nohinohi.

12 Nā, ka haria mai e rātou ā rātou tamariki, ā, ka whakanohohia iho rātou ki runga i te whenua taiāwhio ana i a ia, ā, ka tū a Ihu ki waenganui ia rātou; ā, ka tuku huarahi te whakaminenga tae noa ki te wā i haria katoatia rātou ki a ia.

13 Ā, i pahawa ake, nā, i te wā kua haria katoatia mai ai rātou, ā, e tū ana a Ihu i waenganui i a rātou, ka whakahau ia ki tūturi iho te whakaminenga ki runga i te whenua.

14 Ā, i pahawa ake, nā, i te wā i tūturi iho rātou ki runga i te whenua, ka ngunguru a Ihu i roto i a ia anō, ā, ka kī ake: E te Matua, e raru ana au nā te whakarihariha o te iwi o te whare o Iharaira.

15 Ā, i te wā i kī ai ia i ēnei kupu, ka tūturi iho ia anō ki runga i te whenua; ā nana ka inoi ake ia ki te Matua, ā, tē taea ngā mea i inoia e ia te tuhi, ā, ka whakaatuhia atu e te whakaminenga i rongo ai i a ia.

16 Ā, pēnei te āhua o tā rātou whakaaturanga atu: Kāore anō te karu kia kite, kāore anō rānei te taringa kia rongo, i mua, i ngā mea nui whakamīharo i kite ai, i rongo ai i a Ihu e korero ake ana ki te Matua;

17 Ā, kāore e taea e te arero te whakahua, kāore rānei e taea ana e tētahi tangata te tuhi, kāore rānei e taea ana e ngā ngākau o te tangata te mōhio ki ngā mea nui whakamīharo i kite ai, i rongo ai mātou i a Ihu e kōrero ana; ā, kāore e taea ana e te tangata te mōhio ki te hari i whakakī ake ai i ō mātou wairua i te wā i rongo ai mātou i tana inoitanga ake mō mātou ki te Matua.

18 Ā, i pahawa ake, nā, i te wā i whakamutu a Ihu i tana inoitanga ki te Matua, ka tū ake ia; engari anō te nui o te koa o te whakaminenga nā konei kua warea rātou.

19 Ā, i pahawa ake, nā, ka kōrero atu a Ihu ki a rātou, ā, ka kī atu ia ki a rātou kia tū ake.

20 Ā, ka tū ake rātou mai i te whenua, ā, ka kī atu ia ki a rātou: Kua manaakitia koutou nā tō koutou whakapono. Ināianei ā nana, kua ranea tōku hari.

21 Ā, i tana kōrerotanga ake i ēnei kupu, ka tangi ia, ā, e whakaatu mai ana te iwi mō tēnei, ā, ka haria takitahitia e ia ā rātou tamariki nohinohi, ā, ka manaakitia rātou, ā, ka inoi ake ia ki te Matua mō rātou.

22 Ā, oti ana tana mahi i tēnei ka tangi anō ia;

23 Ā, ka kōrero atu ia ki te whakaminenga, ā, ka kī atu ki a rātou: Tirohia ā koutou mea nohinohi.

24 Ā, i a rātou e titiro atu ana kia kitea ai ka whiua reretia ō rātou karu whakaterangi, ā, ka kite rātou i te tūweheratanga ake o ngā rangi, ā, ka kite rātou i ngā anahera e heke iho ana i te rangi me te mea rā kei waenganui i te ahi; ā, ka heke iho rātou ki raro, ā, ka karapotia aua mea nohinohi, ā, i karapotia rātou ki te ahi; ā, ka minita ngā anahera ki a rātou.

25 Ā, ka kite, ā, ka rongo, ā, ka whakaatu te whakaminenga; ā, e mōhio ana he pono tā rātou whakaaturanga nā te mea i kite, ā, i rongo rātou katoa, tēnā tangata me tēnei tangata mōna ake anō; ā, tata neke atu rātou i te rua mano rima rau ngā wairua; ā, he tāne, he wāhine me ngā tamariki i roto i a rātou.