1 Ināianei ā i pahawa ake, nā, i te wā i kōrerohia atu ēnei mea katoa e Ihu ka whakamāramahia atu ērā mea ki te whakaminenga; ā, nāna katoa ngā mea i whakamārama atu ki a rātou, ko ngā mea nunui me ngā mea ririki.

2 Ā, ka mea ia: Koinei karaipiture, kīhai nei i a koutou, kua whakahau te Matua i ahau kia hoatu ki a koutou; he whaimātauranga nōna kia hoatu ai ērā mea ki ngā whakatipuranga anamata.

3 Ā, nāna ngā mea katoa i whakamārama, mai i te tīmatanga rā anō tae noa atu ki te wā e haere mai ai ia i runga i tōna korōria—āe rā, ko ngā mea katoa hoki e tau iho mai nei ki runga i te mata o te whenua, tae atu ana ki te wā e rewa iho ngā pūmotu i te wera nui, ā, ka tākaia te whenua me te mea nei he pukapuka pōkai, ā, ka pahemo atu ngā rangi me te whenua;

4 Ā, tae atu ana anō ki te rā nui whakamutunga, ina tū ngā tāngata katoa, me ngā hapū katoa, me ngā iwi katoa me ngā reo i mua i te aroaro o te Atua, kia whakawākia ai mō ā rātou mahinga, mehemea i pai, mehemea rānei i kino—

5 Mehemea i pai, ki te aranga ake o te oranga tonutanga; ā, mehemea i kino, ki te aranga ake o te pāpunitanga; he mea e tino hāngai ana, tētahi i tētahi ringa me tētahi atu i tētahi atu ringa, e rite ana ki te aroha, me te tika, me te tapu kei roto nei i te Karaiti, nō mua atu ia i te orokohanganga o te ao.

6 Nā, kāore e āhei ana te tuhituhi ki roto i tēnei pukapuka ahakoa ko te wāhi whakaterau o ngā mea i whakaako tūturu mai ai a Ihu ki te iwi;

7 Engari nana kei ngā papa a Nīwhai te wāhi nui o ngā mea i whakaako ai ia ki te iwi.

8 Ā, nāku ēnei mea i tuhi, he mea iti iho i ngā mea i whakaako ai ia ki te iwi; ā, kua tuia ēnā mea e ahau i runga i te whakaaro ka kawea mai anō ki tēnei iwi, mai i ngā Tauiwi, e ai ki ngā kupu kua kōrerotia nei e Ihu.

9 Ā, inā whiwhi rātou i tēnei, he tikanga anō tēnei kia matua riro tuatahi i a rātou, kia whakamātauria tō rātou whakapono, ā, ki te whakapono rātou i ēnei mea kātahi ka whakakitea atu nei ngā mea nunui ake ki a rātou.

10 Ā, ki te kore rātou e whakapono ai i ēnei mea, kātahi ka kaiponuhia atu ngā mea nunui i a rātou, hei whakahēnga mō rātou.

11 Nana, whano au ka whakamātauria aua mea, ko ngā mea katoa i whaowhaoa ki runga i ngā papa a Nīwhai, engari ka whakahaua e te Ariki kia kaua, e mea ana: Māku e whakamātau te whakapono o tōku iwi.

12 Nō reira ahau, a Moromona, e tuhituhi atu nei i ngā mea kua whakahaua nei au e te Ariki. Ināianei ahau, a Moromona, e whakakapi ai i aku kōrero, ā, ka anga atu ki te tuhituhi i ngā mea i whakahaua ai ahau.

13 Nō reira, e hiahia ana ahau kia kite ai koutou he pono tā te Ariki whakaako i te iwi, mō te takiwā o ngā rā e toru; ā, ka whakakite putuputu ia i a ia anō whai muri iho, ā, ka wāwāhi putuputu i te paraoa, ā, ka whakapaingia, ā, ka hoatu ki a rātou.

14 Ā, i pahawa ake, nā, ka whakaako atu ia, ā, ka minita atu ia ki ngā tamariki a te whakaminenga kua kōrerotia ake nei, ā, nāna ō rātou arero i wewete, ā, ka kōrero rātou ki ō rātou matua i ngā mea nui whakamīharo, he mea nui ake i ērā mea nāna nei i whakakite atu ki te iwi; ā, nāna nei ō rātou arero i wewete kia kōrero ai rātou.

15 Ā, i pahawa ake, nā, kua kake ake ia ki roto i te rangi—te wā tuarua i whakakite atu ia i a ia anō ki a rātou, ā, kua haere atu ki te Matua, whai muri iho i tana mahū i te hunga tūroro katoa, me te hunga kopa, me te whakatūwhera i ngā karu o te hunga matapō me te whakapuareare i ngā taringa o te hunga turi, ā, kua meatia ngā tūmomo whakaoranga katoa i waenganui i a rātou, ā, kua mairangatia ake tētahi tangata i te mate, ā, kua whakakitea atu tōna mana ki a rātou, ā, kua kake ake ia ki te Matua—

16 Nana, i pahawa ake i te aonga ake o te rā ka whakahuihui te whakaminenga i a rātou anō, ā, ka kitea, ā, ka rangona e rātou ēnei tamariki; āe rā, ka puare pū anō ngā nohinohi i ō rātou māngai, ā, ka kōrerohia ake ngā mea whakamīharo; ā, kua whakahaua kia kaua tētahi e tuhituhi i ērā mea i kōrerohia ai e rātou.

17 Ā, i pahawa ake, nā, ka tīmata atu ngā apataki i kōwhiria nei e Ihu i tērā wā ki te rumaki me te whakaako i te hunga katoa e haere atu ai ki a rātou; ā, ka kikī te hunga katoa i rumakina ai i runga i te ingoa o Ihu i te Wairua Tapu.

18 Ā, he tokomaha o rātou i kite ai, ā, i rongo ai i ngā mea tē taea te whakapuaki, kāore e tika ana kia tuhia.

19 Ā, ka whakaako rātou, ā, ka minita atu tētahi ki tētahi; ā, ka whakamahia ngātahitia ai ā rātou mea i waenganui i a rātou anō, e mahi tika ana ia tangata, ia tangata, tētahi ki tētahi.

20 Ā, i pahawa ake, nā, i mahi rātou i ēnei mea katoa e pērā ana i tā Ihu i whakahau ai ki a rātou.

21 Ā, ka karangatia ake te hunga i rumakina ai i runga i te ingoa o Ihu ko te hāhi o te Karaiti.