1 Ināianei ā i pahawa ake, nā, i te kōrerotanga ake a Ihu i ēnei kupu ka huri anō ia ki te whakaminenga, ā, ka tūwhera anō i tōna māngai ki a rātou, e mea ana: He pono, he pono, tāku e mea atu nei ki a koutou, Kaua e whakawā, kia kore ai koutou e whakawākia.

2 Nā te mea mā taua whakawākanga e whakawā ai koutou, ka whakawākia koutou; ā, mā te mehua e mehua ai koutou, ka mehua anō tēnā ki a koutou.

3 Ā, he aha koutou e titiro ake ai ki te kora e pura ana i te karu o tō teina, engari kāore e aro atu ana ki te kurupae i roto i tōu ake karu?

4 Me pēhea rānei koutou e kī ake ki tō teina: Tukuna au kia tango ake i te kora i tōu karu—ā tirohia ake, he kurupae anō kei roto i tō ake karu?

5 E koe te tangata arero rua, matua kapea mai te kurupae i roto i tō ake karu; kātahi ka mārakerake tō kite atu kia tangohia atu te kora i te karu o tō teina.

6 Kaua e hoatu ērā mea e tapu ana ki ngā kurī, kaua rānei e maka koutou i ngā peara ki mua i te aroaro o ngā poaka, kei takatakahia ērā i raro i ō ēnā waewae, ā, ka tahuri mai anō koe me te haehae i a koutou.

7 Inoia, kātahi ka hoatu ki a koutou; rapua, kātahi ka kite koutou; pātōtōngia, kātahi ka tūwherahia ki a koutou.

8 Nā te mea ka whiwhi ngā tāngata katoa e inoia ai, ā, ka kite te tangata e rapua ai; ā, ka tūwhera atu ki te tangata e pātōtōngia ai.

9 Ko tēhea tangata rānei o koutou, koia, mēnā ka inoi ake tana tama mō te paraoa, ka hoatu tētahi kōhatu ki a ia?

10 Ki te inoi rānei ia mō tētahi ika, ka hoatu tētahi nākahi ki a ia?

11 Mehemea rānei koutou, e kino nei, e mōhio ana me pēhea e hoatu koha papai ki ā koutou tamariki, ka pēhea hoki te nui o tā tō koutou Matua hoatutanga koha papai ki te hunga e inoi ake ai ki a ia?

12 Nō reira, ko ngā mea katoa e hiahia ana koutou kia meatia e ngā tāngata ki a koutou, meatia atu pū anō e koutou ki a rātou, nā te mea koinei te ture me ngā poropiti.

13 Tomo atu koutou mā te kūaha tōtika; nā te mea he whārahi te kūaha, ā, he whānui te huarahi, e ārahina atu ana ki te whakangaromanga, ā, he tokomaha anō te hunga e tomo atu ai ki reira;

14 Nā te mea he tōtika te kūaha, ā, he kūiti te huarahi, e ārahina atu nei ki te oranga, ā, he tokoiti noa te hunga e kite ai.

15 Kia tūpato ki ngā poropiti teka, e haere mai nei i ngā kahu hipi, engari kei roto he wuruhi horomiti rātou.

16 Ka mōhio koutou ki a rātou mā ā rātou hua. Ka kohikohi te tangata i ngā kerepe tātarāmoa, i ngā piki tūmatakuru rānei?

17 Waihoki rā ka puta mai ngā hua pai i te rākau pai; engari ka puta mai ngā hua kino i te rākau kino.

18 Tē taea e te rākau pai te whakaputa i ngā hua kino, tē taea rānei e te rākau kino te whakaputa i ngā hua pai.

19 Ka tuakina iho ngā rākau katoa e kore nei e whakaputa i ngā hua pai, ā, ka makaia ki roto i te ahi.

20 Nā reira, mā ā rātou hua koutou e mōhio ai ki a rātou.

21 Kāore ngā tāngata katoa e mea ake ana ki ahau, e te Ariki, e te Ariki, e kuhu atu ai ki roto i te kīngitanga o te rangi; engari ko te tangata e mahi nei i tā tōku Matua i te rangi.

22 Ka kōrero mai ngā mea tokomaha ki ahau i taua rā: E te Ariki, e te Ariki, kīhai rānei mātou i poropiti i runga i tō ingoa, ā, i makaia atu i ngā rēwera i runga i tō ingoa, ā, i mahia ngā mahinga maha papai i runga i tō ingoa?

23 Kātahi au ka poropiti atu ki a rātou: Kīhai rawa au i mōhio ki a koutou; me wehe atu i ahau, e koutou e mahi nei i te hē.

24 Nō reira, ka whakataurite au i te tangata e whakarongo mai nei ki ēnei kīanga āku me te mahi i ērā mea ki tētahi tangata kua hangaia nei tōna whare ki runga i tētahi kāmaka—

25 Ā, ka heke te ua, ā, ka tau mai ngā waipuke, ā, ka pūpuhi ngā hau, ā, ka pāpaki iho ki runga i te whare; ā, kīhai i hinga, nā te mea i hangaia ake nei i runga i tētahi kāmaka.

26 Ā, ka whakatauritetia ngā tāngata katoa e rongo ai i ēnei kīanga āku engari kāore e mahia ki te tangata kuare nāna nei tōna whare i hanga ki runga i te oneone—

27 Ā, ka heke iho te ua, ā, ka tau mai ngā waipuke, ā, ka pūpuhi ngā hau, ā, ka pāpaki iho ki runga i te whare; ā, kua hinga iho, ā, he nui tōna hinganga.