1 Ā, he pono, he pono, tāku e mea atu nei ki a koutou, nā, he hipi anō āku, ehara nei nō tēnei whenua, ehara rānei nō te whenua o Hiruharama, ehara rānei nō ētahi o ngā whenua huri noa kua haere nei au ki te minita.

2 Nā te mea ko te hunga e kōrerotia nei e au te hunga kāore anō kia rongo i tōku reo; kāore rānei au i whakakite atu i a au anō ki a rātou i tētahi wā.

3 Engari kua whiwhi nei au i tētahi whakahaunga i tōku Matua kia haere atu au ki a rātou, ā, ka rongo anō rātou i tōku reo, ā, ka tatauria rātou i waenganui i aku hipi, nā, kia kotahi te kāhui, ā, kia kotahi anō te hēpara; nō reira ka haere atu au ki te whakakite atu i a au anō ki a rātou.

4 Ā, e whakahau ana au i a koutou, nā, kia tuhituhi koutou i ēnei kīanga i muri i taku haerenga atu, nā, mehemea rānei tōku iwi ki Hiruharama, te hunga i kite i ahau, ā, i tōku taha anō i roto i taku minitatanga, ki te kore rātou e inoi ake ki te Matua i runga i tōku ingoa, kia whiwhi ai rātou i tētahi mātauranga e pā ana ki a koutou he mea mā te Wairua Tapu, e pā ana anō ki ērā atu hapū kāore nei e mōhiotia ana e rātou, ka puritia ēnei kīanga, ā, ka whakakitea atu ki ngā Tauiwi, nā, mā roto i te whakapono o ngā Tauiwi, ngā mōrehu o ō rātou uri, ko te hunga e whakamararatia atu ai i runga i te mata o te whenua nā tō rātou whakapono kore, ka kawea mai, ka kawea rānei ki te mātauranga mōku, tō rātou Kaihoko.

5 Kātahi au ka whakakao mai i a rātou mai i ngā tōpito katoa o te ao; kātahi au ka whakatutuki i te kawenata i meatia nei e tōku Matua ki te iwi katoa o te whare o Iharaira.

6 Ā, kua manaakitia ngā Tauiwi, mō tō rātou whakapono mai i ahau, he mea nā te Wairua Tapu, e whakaatu ana ki a rātou mōku, ā, mō te Matua anō hoki.

7 Nana, nā tō rātou whakapono i ahau, e ai tā te Matua, ā, nā tō koutou whakapono kore, E te whare o Iharaira, ka tau mai te whakapono i ngā rā o muri ki ngā Tauiwi, nā, ka whakamōhiotia atu te pono o ēnei mea ki a rātou.

8 Engari auē te mate mō ngā Tauiwi whakapono kore, e ai tā te Matua—nā te mea ahakoa kua haere mai rātou ki runga i te mata o tēnei whenua, ā, kua whakamararatia atu tōku iwi ko rātou nei te whare o Iharaira; ā, kua makaia atu tōku iwi ko rātou nei te whare o Iharaira i waenganui i a rātou, ā, kua takatakahia iho e ō rātou waewae;

9 Ā, nā ngā atawhainga a te Matua ki ngā Tauiwi, me ngā whakawākanga anō hoki a te Matua ki runga i te iwi ko rātou nei te whare o Iharaira, he pono, he pono, tāku e mea atu nei ki a koutou, nā, i muri i ēnei katoa, ā, nāku anō i mea kia pākia ai tōku iwi ko rātou nei te whare o Iharaira, ā, kia whakamamaetia ai, ā, kia whakamatea ai, ā, kia makaia atu i waenganui i a rātou, ā, kia meinga hei mea mauāharatia e rātou, ā, kia meinga ai hei whakahī, ā, hei taunutanga i waenganui i a rātou—

10 Ā pēnei whakahau ai te Matua kia kōrero atu au ki a koutou: Hei taua rā e hē ai ngā Tauiwi ki taku rongopai, me te whakaparahako i te raneatanga o tōku rongopai, me te neke ake i runga i te whakapehapeha o ō rātou ngākau i runga i ngā whenua katoa, i runga hoki i ngā iwi katoa o te whenua katoa, ā, ka whakakīngia ki ngā momo rūkahu katoa, me ngā tinihanga, me ngā haututūtanga, me ngā tekateka katoa, me ngā kōhurutanga, me ngā tinihanga ā-tohunga, me ngā pūremutanga, me ngā mōrikarika huna; ā, ki te mahi rātou i aua mea katoa, me te whakaparahako i te raneatanga o tōku rongopai, nana, e ai tā te Matua, ka tangohia atu te raneatanga o tōku rongopai i waenganui i a rātou.

11 Kātahi ka mahara au ki taku kawenata i mea ai au ki tōku iwi, E te whare o Iharaira, ā, ka kawea e ahau tōku rongopai ki a rātou.

12 Ā, māku e whakakite atu ki a koutou, E te whare o Iharaira, e kore nei e whaimana ngā Tauiwi i runga i a koutou; engari ka mahara au ki taku kawenata ki a koutou, E te whare o Iharaira, ā, ka tau mai ki te mātauranga o te raneatanga o tōku rongopai.

13 Engari ki te rīpenetā ngā Tauiwi me te hoki mai ki ahau, e ai tā te Matua, nana ka tatauria rātou i waenganui i tōku iwi, E te whare o Iharaira.

14 Ā, e kore au e tuku i tōku iwi, ko rātou nei te whare o Iharaira, kia haere atu ki waenganui i a rātou, me te takahi iho i a rātou ki raro, e ai tā te Matua.

15 Engari ki te kore rātou e tahuri mai ki ahau, me te whakarongo mai ki tōku reo, māku rātou e tuku, āe rā, māku tōku iwi e tuku, E te whare o Iharaira, ka haere atu rātou ki waenganui i a rātou, ā, ka takahia iho rātou, ā, ka rite ki te tote kua hemo kē tōna hā, koia hoki he mea koretake atu i te mea hei makaia atu, ā, hei takahia iho i raro i ngā waewae o tōku iwi, E te whare o Iharaira.

16 He pono, he pono, tāku e mea atu nei ki a koutou, pēnei tā te Matua whakahau ki ahau—kia hoatu e au ki tēnei iwi tēnei whenua hei whenua tuku iho.

17 Kātahi ka tutuki ngā kupu a te poropiti Ihāia, e mea ana:

18 Ka whakanuia te reo o ō tūtei; ka waiata ake rātou i runga i te reo kotahi, nā te mea ka titiro kanohi ki te kanohi rātou ina kawea mai a Hīona e te Ariki.

19 Kia whatia mai te harikoa, kia waiata ngātahitia, e koutou ngā wāhi ururua o Hiruharama; nā te mea kua whakaāio te Ariki i tana iwi, kua hoko ia i a Hiruharama.

20 Kua huhu te Ariki i tōna ringa tapu i ngā karu o ngā whenua katoa; ā, ka kite ngā tōpito katoa o te whenua i te whakaoranga o te Atua.