1 Nā, i pahawa ake i te pahemotanga atu o te tau iwa ngahuru mā tahi, ā, kua ono rau tau mai i te wā i wehe atu a Rīhai i Hiruharama; ā, i te tau anō ko Rakoneu te kaiwhakawā matua me te kāwana i runga i te whenua.

2 Ā, kua puta atu a Nīwhai, te tama a Heramana, ki waho i te whenua o Harahemara, kua tukuna atu te haepapa ki a Nīwhai, ko ia tana tama mātāmua, e pā ana ki ngā papa parāhe, me ngā tuhinga katoa kua puritia ake nei, me aua mea katoa anō hoki kua puritia tapuhia mai i te wehenga atu a Rīhai i Hiruharama.

3 Kātahi ia ka wehe atu i te whenua, ā, kāore te tangata e mōhio ana ki hea haere ai ia; ā, ka puritia ngā tuhinga e tana tama i muri i a ia, āe rā, ngā tuhinga mō tōna iwi.

4 Ā, i pahawa ake i te tīmatanga o te tau iwa ngahuru mā rua, nana, ka tīmata rawa te tutukitanga o ngā poropititanga a ngā poropiti; nā te mea ka nui haere te whakamahinga o ngā tohu nui ake me ngā merekara nui ake ki waenganui i te iwi.

5 Engari i reira anō ētahi i tīmata ake te kī, nā, kua pau te wā kia tutuki ai ngā kupu, kua kōrerotia nei e Hamuera, te Rāmana.

6 Ā, ka tīmata tō rātou hari i runga i ō rātou huānga, e mea ana: Nana kua pau te wā, ā, kāore anō kia tutuki ngā kupu a Hamuera; nō reira, kua auare ake tō koutou hari me tō koutou whakapono e pā ana ki tēnei mea.

7 Ā, i pahawa ake, nā, ka nui tā rātou ngangau puta noa i te whenua; ā, ka pōuri haere te hunga whakapono, kei pahawa noa ake aua mea kua kōrerotia.

8 Engari nana, i āta mataara katoa rātou mō taua rā me taua pō me taua rā e rite ai ki te rangi kotahi me te mea nei kāore he pō, kia mōhio ai rātou ehara i te mea he auare ake tō rātou whakapono.

9 Nā, i pahawa ake, kua whakataua tētahi rā e te hunga whakapono kore, nā, kia whakamatea te hunga katoa i whakapono ai ki aua whakarerenga iho ki te kore te tohu e pahawa ake, ko taua tohu i homai ai e Hamuera te poropiti.

10 Nā, i pahawa ake i te kitenga a Nīwhai, te tama a Nīwhai, i te whakariharihatanga o tōna iwi, ka tino pōuri rawa tōna ngākau.

11 Ā, i pahawa ake, nā, ka haere atu ia, ā, ka tuohu ia i a ia anō ki te whenua, ā, ka kaha rawa tana karanga ake ki te Atua mō tōna iwi, āe rā, mō te hunga whano ka whakangaromia nā tō rātou whakapono ki ngā whakarerenga iho a ō rātou tūpuna.

12 Ā, i pahawa ake, nā, ka karanga kaha ake ia ki te Ariki mō te roanga ake o te rā; ā nana, ka tau mai te reo o te Ariki ki a ia, e mea ana:

13 Hikina ake tō māhunga, ā, kia koa koe; nana rā, kua tae mai te wā, ā, hei tēnei pō anō tukuna ai te tohu, ā, hei te āpōpō tae atu ai au ki roto i te ao, kia whakakite atu ki te ao, nā, māku ērā mea katoa kua mea au kia kōrerotia ake nei e te māngai o ngā poropiti tapu e whakatutuki.

14 Nana, ka haere mai au ki ōku ake, ki te whakatutuki i ngā mea katoa kua whakamōhiotia atu e au ki ngā tamariki a te tangata mai i te tūāpapa o te ao, me te mahi i tā te Matua rāua ko te Tama e pai ai—tā te Matua, he mea mōku ake, tā te tama, he mea nā ōku kikokiko. Ā nana, kua tae mai te wā, ā, hei tēnei pō tukuna mai ai te tohu.

15 Ā, i pahawa ake, nā, kua tutuki ngā kupu i tau mai ai ki a Nīwhai, e rite ana ki te āhua i kōrerotia ai; nana rā, kāore he pō i te tōnga ihotanga o te rā; ā, ka mīharo haere te iwi nā te mea kāore he pōuritanga i te taunga iho o te pō.

16 Ā, he tokomaha i reira, kīhai nei i whakapono ki ngā kupu a ngā poropiti, i hinga iho ai ki te whenua, ā, ka meinga anō nei kua mate rātou, nā te mea kua mōhio rātou kua whakananua taua mahere nui o te whakangaromanga kua whakatakotoria iho e rātou mō te hunga i whakapono ai ki ngā kupu a ngā poropiti; nā te mea kua tae kē mai te wā o te tohu i kōrerotia mai ai.

17 Ā, ka tīmata tō rātou mōhio, nā, kāore e kore ka puta mai te Tama a te Atua; āe rā, hei whakarāpopoto, ko ngā tāngata katoa i runga i te mata o te whenua katoa mai i te uru ki te rāwhiti, kei te whenua ki te raki me te whenua ki te tonga anō hoki, i te tino mīharo rātou nā konā hinga iho ai rātou ki te whenua.

18 Nā te mea i mōhio rātou kua whakaatuhia mai nei e ngā poropiti ēnei mea mō ngā tau maha, ā, kua tae mai anō te wā o te tohu i kōrerotia mai ai; ā, ka tīmata tō rātou wehi nā tō rātou kino me tō rātou whakapono kore.

19 Ā, i pahawa ake, nā, kāore he pōuritanga i taua pō katoa, engari i te awatea anō nei ko te poutūmārōtanga o te rā. Ā, i pahawa ake, nā, ka ao ake anō te rā i te ata, e rite ana ki tōna āhuatanga tika; ā, i mōhio rātou koirā te rā e whānau mai ai te Ariki, nā te tohu kua homai nei.

20 Ā, i pahawa ake, āe rā, ko ngā mea katoa, tēnei tongi, tēnei tongi, e rite ana ki ngā kupu a ngā poropiti.

21 Ā, i pahawa ake anō hoki, nā, ka puta mai tētahi whetū hou, e rite ana ki te kupu.

22 Ā, i pahawa ake, nā, mai i tēnei wā haere ake nei ka tīmata atu te tuku i ngā rūkahu ki waenganui i te iwi, e Hātana, kia whakapakeke i ō rātou ngākau, kei whakapono rātou ki aua tohu me aua mea whakamīharo kua kitea e rātou; engari ahakoa ēnei rūkahu me ēnei tinihanga ka whakapono tonu te wāhi nui o te iwi, ā, ka whakatahuritia ki te Ariki.

23 Ā, i pahawa ake, nā, ka haere atu a Nīwhai ki waenganui i te iwi, me ērā atu tokomaha anō hoki, e rūmakina ana ki te rīpenetātanga, i konā puta ai tētahi murunga hara nunui. Ā pēnei tīmata anō tā te iwi noho rangimārie i runga i te whenua.

24 Ā, kāore he tautohetohenga, hāunga ētahi mea ruarua i tīmata ai ki te kauhau, e ngana ana ki te whakaatu atu i runga i ngā karaipiture kāore e tika tonu ana ki te ngohengohe ki te ture a Mohi. Nā, ka hē rātou i tēnei mea, kāore i mārama ki ngā karaipiture.

25 Engari i pahawa ake, nā, kāore i roa ka whakatahuritia rātou, ā, ka whakapakepakehia mō taua hē i mea ai rātou, nā te mea i whakamōhiotia atu ki a rātou, nā, kāore anō te ture kia whakatutukihia, ā, me whakatutuki tēnā mea katoa; āe rā, ka tau mai te kupu ki a rātou, nā, me whakatutuki tēnā; āe rā, e kore e pahemo atu tētahi tohu, tētahi tongi rānei kia whakatutukihia tēnā; nō reira i tēnei tau pū anō kūmea ai rātou ki tētahi mātauranga mō tō rātou hē, ā, ka whāki atu i ō rātou hē.

26 Ā pēnei ka pahemo atu te tau iwa ngahuru mā rua, e puta mai ana ngā rongo whakahari ki te iwi nā ngā tohu kua pahawa ake nei, e rite ana ki ngā kupu poropiti a ngā poropiti tapu katoa.

27 Ā, i pahawa ake, nā, ka pahemo atu anō te tau iwa ngahuru mā toru i runga i te rangimārie, hāunga ko ngā kaipāhua o Karianato, i noho ai i ngā maunga, i muia hoki te whenua; nā te mea he tino kaha rawa ō rātou pā kaha me ō rātou wāhi huna, nā, tē taea rātou e te iwi; nō reira he maha ngā kōhurutanga i mea ai rātou, ā, he nui te parekura i mea ai rātou i waenganui i te iwi.

28 Ā, i pahawa ake i te tau iwa ngahuru mā whā ka tīmata tō rātou tokomaha haeretanga, nā te mea he tokomaha ngā kaitītore Nīwhai i tahuti atu ai ki a rātou, nā konā pōuri nui ai aua Nīwhai i noho tonu ai i te whenua.

29 Ā, he nui anō te whaitake i waenganui i ngā Rāmana kia pōuri; nana rā, he tokomaha ngā tamariki i tupu ake ai, ā, i pakeke haere ai, nā, ka whai i ō rātou ake hiahia, ā, ka ārahina atu e ētahi Hōrama, he mea nā ā rātou rūkahu me ā rātou kupu whakapatipati, kia hono atu ki aua kaipāhua Karianato.

30 Ā pēnei ka tūkinotia anō hoki ngā Rāmana, ā, ka iti haere tō rātou whakapono me tō rātou tika, nā te whakarihariha o te whakatipuranga e tupu ake ana.