1 Tan natan nia, agawa ya amin a totoo ed dalin nadñgel da so saraya a salita, tan saya so tinasian da. Tan kayari na saraya a salita wala so deen ed dalin ed loob na dakel ya oras;

2 Tan ontan la so kabaleg na pankelaw na saray totoo kanian tinmonda ra a manermen tan manoogaog lapu ed inkabalang na saray kakanayon da a sikara so inatey; dia ed ontan wala so deen ed amin a dalin ed loob na dakel ya oras.

3 Tan agawa a wala lamet so sinmabi a voces ed saray totoo, tan amin a totoo nadñgel da, tan saya so tinasian da, a nankuan:

4 O sikayo a totoo na saraya ya ankakabaleg a ciudad ya aderal-deral, sikayo a kapolian nen Jacob, on, sikayo a kabiañgan na kailalakan na Israel, panon kabetbet so impantipon ko ed sikayo a siñga ñganak a manok a tiponen to so saray siwsiw to ed silong na saray payak to, tan sikayo so tinaganok.

5 Tan lamet, panon kabetbet so impantipon ko ed sikayo a siñga sakey a ñganak a manok a tiponen to so saray siwsiw to ed silong na saray payak to, on, O sikayo a totoo ed kailalakan na Israel, sikayo so nigapol; on, O sikayo a totoo ed kailalakan na Israel, sikayo a manaayam ed Jerusalem, unong a sikayo so nigapol; on, panon kabetbet so impantipon ko ed sikayo a siñga ñganak a manok a tiponen to so saray siwsiw to, tan ag yo labay.

6 O sikayo a kabiañgan ed kailalakan na Israel sikayo so inligyas ko, panon kabetbet so pantipon ko ed sikayo a siñga ñganak a manok panipon to ed saray siwsiw to ed silong na saray payak to, no sikayo so mambabawi tan ompawil ed siak ed nagnap a gagala na puso.

7 Balet no andi, O kailalakan na Israel, saray pasen a panagayaman yo so manmaliw ya angapo so manayam anga ed panaon a pakasumpal na paknaan ed saray ama yo.

8 Tan natan agawa a kayari a saraya a salita so nadñgel na saray totoo, nia, ginapoan da so mannañgis tan manogaog lamet lapu ed inkabalang na saray kakanayon da tan saray kakaaro ra.

9 Tan agawa ya onia so indalan na talora ya agew. Tan saya dia ed kabuasan, tan say biluñget so abuyak a naekal ed tapew na dalin, tan say dalin tinmonda a manyegyeg, tan saray ankakabaleg a bato so tinmonda a napaldua, tan say makapataktakot ya aglem so tinmonda, tan say amin a makatelek ya iñgal so tinmonda.

10 Tan say dalin so nantekepan lamet, kanian tinmalindeg; tan say paneermen, tan say pannanañgis, tan panñgoyañgoy na totoo ya aligyas a sikara so mabilay so tinmonda; tan say ermen da so nanmaliw a gayaga, tan saray dageyem da so nanmaliw a pandayew tan pisasalamat ed Katawan a Jesu Cristo, a Mananundon da.

11 Tan dia ed onia saray masanto a kasulatan so asumpal a saraya so sinalita na saray profeta.

12 Tan saraman so lalo a matunong a kabiañgan na saray totoo so nilaban, tan saraman so añgawat ed saray profeta tan ag da ra tinutopak; tan saraman so ag amapaterter na dala na saray sasantos, sikara so niligyas—

13 Tan sikara so aligyas tan ag ira linmereg tan atabonan na dalin; tan sikara so ag nalner ed kaaraleman na dayat; tan sikara so ag apoolan na apoy, ni say sikara so atapilan ya amekmek ya inatey; tan sikara so ag intikyab na saray alimbosabos; ni say sikara so tinalo na kelpa na asewek tan biluñget.

14 Tan natan, siopaman a makabasa, paulyan yo a sikato so mantalus; siopaman a wala ed sikato so saray masanto a kasulatan, paulyan yo ya anapen to so saraya, tan nengneñgen to tan nia no saraya ya amin a patey tan impanderal na apoy, tan asewek, tan mabiskeg a bagyo, tan alimbosabos, tan inleletak na dalin a pañgawat to ed sikara, tan saraya ya amin a beñgatla aliwa kasi ya impakasumpal ed saray profesiya na dakel ed saray masanto a profeta.

15 Nia, ikuan ko ed sikayo, On, dakel so saray nampaneknek ed saraya a beñgatla dia ed isabi nen Cristo, tan sikara so pinatey da lapu ed sikara so nampaneknek ed saraya a beñgatla.

16 On, si profeta Zenos so nampaneknek ed saraya a beñgatla, tan ontan met si Zenock so nansalita nipaakar ed saraya a beñgatla, lapu ed sikara so nampaneknek lalo la nipaakar ed sikami, a nakekeraan ed saray boleg da.

17 Nia, si ama tayo a Jacob so nampaneknek met nipaakar ed sakey a nakekeraan a boleg nen Jose. Tan nia, ag kasi sikatayo so nakekeraan a boleg nen Jose? Tan saraya a beñgatla a mampapaneknek ed sikatayo, ag kasi saraya so nisulat ed piligo a gansa ya inawit nen ama tayo a Lehi a nanlapu ed Jerusalem?

18 Tan agawa a dia ed impansampot na komatalumplo tan apat a taon, nia, ipanengneng ko ed sikayo a saray totoo nen Nephi a sikara so niligyas, tan ontan met saraman so tatawagen a Lamanite, a sikara so niligyas, so awalaan ira na baleg a palabo a nipanengneng ed sikara, tan ankakabaleg a bendicion so niiter ed saray ulo ra, a dia ed onia ag-abayag ed intokutok nen Cristo ed tawen sikato so peteg a pinmatnag ed sikara—

19 Impanengneng to so laman to ed sikara, tan nantalima ed sikara; tan say kasulatan na impampulong to so niiter ya onsaguinunor ed saya. Dia ed ontan dia ed saya a panaon itondak la so saraya a balikas ko.