1 Tan natan agawa a wala so baleg a karaklan so nantitipon, ed saray totoo nen Nephi, ed kaliber-liber na templo a wala ed dalin na Bountiful; tan sikara so mankelaw tan ag da natebek ed balang sakey ed sakey, tan impapanengneng da ed balang sakey tan sakey so malaknab tan makapakelaw ya inkaoman a dinmalan.

2 Tan sikara met so mantotungtong nipaakar ed saya a Jesu Cristo, a lapu ed sikato niiter so saray pakapatnagan nipaakar ed ipatey to.

3 Tan agawa legan a sikara so mantotungtong ed balang sakey tan sakey, nadñgel da so sakey a voces a siñga nanlapu ed tawen; tan inwandag da so mata ra ed kaliber-liber, tan ag da atalusan so voces a nadñgel da; tan saya so aliwa a mapasnok a voces, ni say saya so maksil a voces; manwari ya ontan, tan angaman a saya so sakey a melag a voces saya so tinmanek ed saray akadñgel ya anga ed otel a dia ed saya angapo so kabiañgan na laman da ya ag pinmayegpeg; on, sikara so tinanek to ya anga ed kamarerua, tan saya so nampapetang ed saray puso ra.

4 Tan agawa a nadñgel da lamet so voces, tan saya so ag da atalusan.

5 Tan dia lamet ed komatlo a panaon nadñgel da so voces, tan nilukasan da so saray layag da pian saya so nareñgel da; tan saray mata ra innengneng da ed panlalapuan na tanol, tan sikara so tinmañgay ed tawen ya ag ginmalagalaw, a diman so panlalapuan na tanol.

6 Tan nia, dia ed komatlo atalusan da so voces a nadñgel da; tan saya so nankuan ed sikara:

7 Nengneng yo say Inararok ya Anak, a dia ed sikato apaliket ak, a dia ed sikato nigloria so ñgaran ko—sikato so deñgel yo.

8 Tan agawa, sanen atalusan da intangwa ra lamet so saray mata ra ed tawen; tan nia, anengneng da so sakey a Too ya onleleksab a manlalapu ed tawen; tan sikato so akawesan na sakey ya amputi a kolibemben; tan sikato so linmeksab tan nanalagey ed pegley da; tan saray mata na amin a karaklan so wala ed sikato, tan ag da nitepel a bisuaten so saray sañgi ra, angan dia ed sakey tan sakey, tan ag da labay ya amtaen so kabaliksan to nia, lapu ed say nunot da sikato so sakey ya angel a pinmarungtal ed sikara.

9 Tan agawa ya iniunat to so saray lima to tan sikato so nansalita ed saray totoo, a nankuan:

10 Nia, siak si Jesu Cristo, a pinaneknekan na saray profeta ya onsabi ed mundo.

11 Tan nengneng yo, siak so liwawa tan bilay na mundo; tan siak so inminum ed saman so ampait a kupa ya initer na Ama ed siak, tan ingloriak so Ama ed impañgako ed saray kasalanan na mundo, a dia ed onia siak so tinmulok ed linawa na Ama ed amin a beñgatla a nanlapu ed gapo.

12 Tan agawa sanen imbalikas nen Jesus so saraya a salita say amin a karaklan so niparukol ed dalin; tan anunotan da a saya so niprofesiya la ed limog da a si Cristo ipanengneng to so inkasikato ed sikara kayari na itokutok to ed tawen.

13 Tan agawa a say Katawan so nansalita ed sikara a nankuan:

14 Alagey kayo tan ondago kayo ed siak, pian idiwit yo so saray lima yo ed diking ko, tan nalikna yo met so bakat na saray pasak ed saray limak tan ed saray salik, pian nakabatan yo a siak so Dios na Israel, tan say Dios na amin a dalin, tan siak so pinatey da makaseñgeg ed saray kasalanan na mundo.

15 Tan agawa a say karaklan so linma a dinmago, tan indiwit da so lima da ed diking to, tan nilikna ra so bakat na saray pasak ed lima to tan sali to; tan saya so ginawa ra, a dinmago ra a sansansakey anga ed sikara ya amin so asumpal, tan anengneng da ed dili a mata ra tan alikna ra ed dili a lima da, tan akabatan da ya andi-duarua tan sikara so nampaneknek, a peteg a sikato, so insulat na saray profeta, ya onsabi.

16 Tan kayari a sikara ya amin so linma tan atasian da ed inkasikara a dili, sikara so nankelyaw a nambabansag, a nankuan:

17 Hosanna! Nagalang so ñgaran na Sankaatageyan a Dios! Tan sikara so dinmakmumo ed saliyan nen Jesus, tan sikato so ingalgalang da.

18 Tan agawa a sikato so akisalita ed kinen Nephi (lapu ed si Nephi so kabiañgan ed limog na karaklan) tan sikato so ingangan ya ondago.

19 Tan si Nephi so inmalagey tan dinmago, tan intewek to so ulo to ed arapan na Katawan tan inañgoban to so saray sali to.

20 Tan say Katawan ingangan to a sikato so onalagey. Tan sikato so inmalagey tan tinmalindeg ed arap to.

21 Tan say Katawan inkuan to ed sikato: Iter ko ed sika so pakapanyari a biniagan mo so saya a totoo no siak lamet so akapawil la ed tawen.

22 Tan lamet say Katawan tinawag to so saray arum, tan ontan met so inkuan to ed sikara; tan initer to ed sikara so pakapanyari a mambiniag. Tan inkuan to ed sikara: Tan onia so pambiniag yo; tan nepeg angapo so baliñgaan ed limog yo.

23 Tua ikuan ko ed sikayo, siopaman a mambabawi ed saray kasalanan to ed panamegley na saray salita yo, tan pampilalekan to so nabiniagan ed ñgaran ko, dia ed onia sikara so biniagan yo—Nia, sikayo so onlasur tan onalagey ed danum, tan dia ed ñgaran ko sikara so biniagan yo.

24 Tan natan nia, saraya so salita ya ibalikas yo, a tawagen yo ra ed ñgaran da, ya ikuan:

25 Dia ed pakaoley ya initer ed siak nen Jesu Cristo, biniagan taka ed ñgaran na Ama, tan say Anak, tan say Espiritu Santo. Amen.

26 Tan dia ed onia sikara so ipalgep yo ed dalem na danum, tan ilimmuas yo ra lamet ed danum.

27 Tan dia ed onia a pamaakaran so pambiniag yo ed ñgaran ko; tan nia, tua ikuan ko ed sikayo, a say Ama, tan say Anak, tan say Espiritu Santo sikara so saksakey; tan siak so wala ed Ama, tan say Ama wala ed siak, tan say Ama tan say siak so saksakey.

28 Tan unong ed ingangan ko ed sikayo onia so pambiniag yo. Tan nepeg angapo so baliñgaan ed limog yo, a siñga nen saman; ni say wala so baliñgaan ed limog yo nipaakar ed saray kabiañgan na doctrinak, a siñga nen saman.

29 Tan tua, tua ikuan ko ed sikayo, siopaman a walaan na espiritu na baliñgaan sikato so ag ko kayarian, balet sikato so kayarian na demonyo, a sikato so ama na baliñgaan, tan pagagalawen to so saray puso na totoo ya onsaluñgat tekep na pasnok, ed sakey tan sakey.

30 Nia, aliwa a saya so doctrinak, a pagalawen ko so puso na saray totoo ed pasnok, sakey sumpa ed sananey; balet saya so doctrinak, a saraya a beñgatla so ag nepeg a gawaen.

31 Nia, tua, tua, ikuan ko ed sikayo, ibawag ko ed sikayo so doctrinak.

32 Tan saya so doctrinak, tan saya so doctrina ya initer na Ama ed siak; tan siak so mantasi ed Ama, tan say Ama so mantasi ed siak, tan say Espiritu Santo so mantasi ed Ama tan siak; tan tasian ko a say Ama ingangan to ed amin a totoo, inerman a pasen, a mambabawi tan manisia ed siak.

33 Tan siopaman so manisia ed siak, tan nabiniagan, sikato met lamlamang so nilaban; tan sikara so manawir ed panarian na Dios.

34 Tan siopaman so ag manisia ed siak, tan sikato so ag nabiniagan, sikato so naayew.

35 Tua, tua, ikuan ko ed sikayo, a saya so doctrinak, tan saya so tasian ko a nanlapu ed Ama; tan siopaman so manisia ed siak manisia met ed Ama; tan dia ed sikato say Ama tasian to ak, lapu ed sikato so dalawen to na apoy tan say Espiritu Santo.

36 Tan dia ed onia say Ama tasian to ak, tan say Espiritu Santo so mantasi ed sikato nipaakar ed Ama tan siak; tan say Ama, tan siak, tan say Espiritu Santo so saksakey.

37 Tan lamet ikuan ko ed sikayo, sikayo so nakaukolan a mambabawi, tan manmaliw a siñga melag ya ogaw, tan nabiniagan ed ñgaran ko, odino andi ag nayari ya awaten yo so saraya a beñgatla.

38 Tan lamet ikuan ko ed sikayo, sikayo so nakaukolan a mambabawi, tan nabiniagan ed ñgaran ko, tan manmaliw kayo a siñga melag ya ogaw, odino andi ag nayari a tawiren yo so panarian na Dios.

39 Tua, tua, ikuan ko ed sikayo, a saya so doctrinak, tan siopaman a mañgiletneg ed saya letnegan to so bato a dampay ko, tan saray puerta na infierno so ag ontaluna ed sikara.

40 Tan siopaman so mañgibawag na masulok odino onkulang nen say saya, tan ipatalindeg to a saya so doctrinak, sikato lamlamang so nanlapu ed mauges, tan ag nipaalagey ed bato a dampay ko; balet sikato so añgipaalagey ed mabuer a leletnegan, tan saray puerto na infierno so akalokas a mañgawat ed saraya sano onsabi so delap tan say dagem so ombasig ed sikara.

41 Dia ed ontan, onla kayo ed saya a totoo, tan ibawag yo so saray salita a sinalitak, ya anga ed sampot na dalin.