1 Tan agawa a si Jesus ingangan to ed saray disipulos to a mañgawit ira na pigara a tinapay tan alak ed sikato.

2 Tan sanen sikara so linma a mañgaala na tinapay tan alak, ingangan to ed saray karaklan a sikara so onyurong ed dalin.

3 Tan sanen sinmabi so saray disipulos a sankaawit da so tinapay tan alak, inala to so tinapay tan pinisag-pisag tan binendicionan to; tan initer to ed saray disipulos tan ingangan to a mañgan ira.

4 Tan sanen sikara so añgan tan sikara so naksel, ingangan to ya ibunog da ed saray karaklan.

5 Tan sanen say karaklan so akapañgan tan sikara so naksel, inkuan to ed saray disipulos: Nia nepeg wala so sakey a naordinan ed limog yo, tan dia ed sikato iter ko so pakapanyari a mamisag na tinapay tan bendicionan to tan iter to ed saray totoo na simbaan ko, dia ed amin a manisia tan abiniagan ed ñgaran ko.

6 Tan saya so lawas a sumpalen yo a gawaen, a siñga say ginawak, angan siñga say impampisag ko ed tinapay tan impambendicion tan impañgiter ko ed sikayo.

7 Tan saya so gawaen a pakanodnunotan yo ed laman ko, ya impanengneng ko ed sikayo. Tan saya so pamaneknek ed Ama a lawas a nonunoten yo ak. Tan no siak so lawas yo a nunoten wala ed sikayo so Espirituk a miolop ed sikayo.

8 Tan agawa a sanen nibaga to so saraya a salita, ingangan to ed saray disipulos to ya alaen da so alak a wala ed kupa tan sikara so oninum, tan ontan met iter da ed saray karaklan pian sikara so oninum ed saya.

9 Tan agawa a saya so ginawa ra, tan sikara so inminum tan sikara so apenek; tan initer da ed karaklan, tan sikara so inminum, tan sikara met so apenek.

10 Tan sanen saya so ginawa na saray disipulos, si Jesus inkuan to ed sikara: Mapalar kayo lapu ed saya a beñgatla a ginawa yo, lapu ed saya so pakasumpal ed saray gangan ko, tan saya so mantasi ed Ama ya andi-sungay a sumpalen yo so saman so ingangan ko ed sikayo.

11 Tan saya so lawas a gawaen yo ed saraman so mambabawi tan nabiniagan ed ñgaran ko; tan saya so gawaen yo a pakanodnunotan ed dalak, a saya so tinmerter ya onkana ed sikayo, a tasian yo ed Ama a lawas a nodnunoten yo ak. Tan no siak so lawas a nodnunoten yo wala ed sikayo so Espirituk a miolop ed sikayo.

12 Tan iter ko ed sikayo so sakey a gangan a gawaen yo so saraya a beñgatla. Tan no lawas a gawaen yo so saraya a beñgatla mapalar kayo, lapu ed sikayo so akaletneg ed bato a dampay ko.

13 Balet siopaman ed limog yo so mangawa na onsulok odino onkulang nen say saraya sikara so ag niletneg ed bato a dampay ko, balet sikara so akaletneg ed mabuer a leletnegan; tan sano say uran so ompelag, tan say delap so onsabi, tan say dagem onsiplog, tan ombasig ed sikara, sikara so natumba, tan say puerta na infierno so akaparaan ya akalukas a mañgawat ed sikara.

14 Dia ed ontan mapalar kayo no sumpalen yo so saraya a gangan ko, a saya so ingangan nen Amak ed siak ya iter ko ed sikayo.

15 Tua, tua, ikuan ko ed sikayo, nakaukolan a mambantay tan mampikasi kayo a lawas, ag la piga sikayo so natukso na demonyo, tan sikayo so iarawi to a dakepen.

16 Tan unong a nampikasi ak ed limog yo iñgen ontan met so pampikasi yo ed simbaan ko, ed limog na saray totook a sikara so nambabawi tan abiniagan ed ñgaran ko. Nia siak so liwawa; añgiter ak na pañgaligan ed sikayo.

17 Tan agawa a sanen si Jesus nibaga to so saraya a salita ed saray disipulos to, sikato lamet so inmarap ed karaklan tan inkuan to ed sikara:

18 Nia, tua, tua, ikuan ko ed sikayo, nakaukolan a mambantay tan mampikasi kayo ag la piga makaloob kayo ed tukso; lapu ed si Satanas pilalek to kayo a nakayarian, pian sikayo so ipapalir to a siñga trigo.

19 Dia ed ontan sikayo so lawas a mampikasi ed Ama ed ñgaran ko.

20 Tan antokaman a kerewen yo ed Ama dia ed ñgaran ko, a saya so matunong, a manisia kayo a saya so naawat yo, nia saya so niiter ed sikayo.

21 Mampikasi kayo ed saray boleg yo dia ed Ama, lawas ed ñgaran ko, pian saray kaasawaan yo tan saray anak yo so nabendicionan.

22 Tan nia, sikayo so mantitipon a mabetbet; tan ag yo sesebelan so siopaman a too ya ondago ed sikayo sano sikayo so mantitipon, balet paulyan yo a sikato so ondago ed sikayo tan sikato so ag yo sesebelan;

23 Balet sikara so ipikasi yo, tan ag yo ra papawayen; tan no nagawa a sikara so ondago a mabetbet ed sikayo sikara so ipikasi yo ed Ama, ed ñgaran ko.

24 Dia ed onia, itagey yo so liwawa yo pian nasindagan to so mundo. Nia siak so liwawa ya itagey yo—a siñga saman so anengneng yo a ginawak. Nia, anengneng yo a nampikasi ak ed Ama, tan sikayo ya amin so makatasi.

25 Tan anengneng yo ya ingangan ko ya angapo ed sikayo so ontaynan, balet ingangan ko a sikayo so ondago ed siak, pian nalikna tan nanengneng yo; iñgen ontan met so gawaen yo ed mundo; tan siopaman a manderal ed saya a gangan so mantepel ed inkasikato na kagoyor to ed tukso.

26 Tan natan agawa a sanen si Jesus nibalikas to so saraya a salita, inwandag to lamet so mata to ed saray disipulos a pinili to, tan inkuan to ed sikara:

27 Nia tua, tua, ikuan ko ed sikayo, iter ko ed sikayo so sakey ni a gangan, tan dia ed ontan onla ak ed si Amak pian nasumpal ko so arum ni a gangan ya initer to ed siak.

28 Tan natan nia, saya so gangan ya iter ko ed sikayo, ag yo aabuloyan so siopaman a sikakabat kayo a mibiang ed laman ko tan say dalak ya ag-manepeg, sano sikayo so manumpal ed saya;

29 Tan siopaman a mañgan tan oninum ed laman tan dalak ya ag-manepeg sikato so mañgan tan oninum na kaayew na kamarerua to; dia ed ontan no amta yo a say sakey a too so ag-manepeg a mañgan tan oninum ed laman ko tan dalak sikato so sebelan yo.

30 Angaman ontan, sikato so ag yo papapawayen ed limog yo, balet sikato so puloñgan yo tan ipikasi yo ed Ama, ed ñgaran ko; tan no bilbilang sikato so mambabawi tan nabiniagan ed ñgaran ko, dia ed ontan sikato so awaten yo, tan sikato so talimaen yo ed laman ko tan dalak.

31 Balet no sikato so ag mambabawi sikato so ag nibilang ed limog na saray totook, pian komon ag to deralen so saray totook, tan nia kabat ko so saray karnerok, tan sikara so awalaan na bilang.

32 Manwari ya ontan, sikato so ag yo papawayen ed saray sinagogas yo, odino ed saray pasen a panagpikasian yo, tan dia ed siñga sikato ituloy yo so pantalima; ag yo amta no sikara so ompawil tan mambabawi, tan sikara so ondago ed siak ya awalaan na sigpot a gagala na puso, tan sikara so paabigen ko; tan sikayo so pamaakaran na kaawit na kilalaban ed sikara.

33 Dia ed ontan, onor yo so saraya ya imbalikas ko ya ingangan ed sikayo pian sikayo so ag nadusa; tan abagey so saman so dusaen na Ama.

34 Tan iter ko ed sikayo so saraya a gangan makaseñgeg ed saray baliñgaan ed limog yo. Tan mapalar kayo no angapo so baliñgaan ed limog yo.

35 Tan natan siak so onla ed Ama, lapu ed nakaukolan a siak so onla ed Ama ya onkana ed pankaabigan yo.

36 Tan agawa a sanen si Jesus sinampotan to la so saraya a balikas, diniwit na saray lima to so saray disipulos a pinili to, a sinansakey, anga ed sikara ya amin so adiwit to, tan sikato so nansalita ed sikara legan a didiwiten to ra.

37 Tan saray karaklan ag da nadñgel so saray salita ya imbalikas to, dia ed ontan ag da tinasian; balet saray disipulos tinasian da ya initer to ed sikara so pakapanyari a mañgiter na Espiritu Santo. Tan ipanengneng ko ed sikayo ed mansaguinunor a saya a kasulatan so tua.

38 Tan agawa a sanen si Jesus adiwit to la ra ya amin, sinmabi so sakey a lurem tan tinalukboñgan to so karaklan kanian ag da nanengneng si Jesus.

39 Tan legan a sikara so atalukboñgan si Jesus so sinmipot a nanlapu ed sikara, tan tinmukutok la ed tawen. Tan saray disipulos anengneng da tan tinasian da a sikato so tinmukutok lamet ed tawen.