1 Tan agawa ya ingangan to a saray karaklan so ontonda la ra a mampikasi, tan ontan met ed saray disipulos to. Tan ingangan to ed sikara ya ag da itonda so pampikasi ed dalem na puso ra.

2 Tan ingangan to ed sikara ya onalagey ira tan ontalindeg ed saray sali ra. Tan sikara so inmalagey tan tinmalindeg ed saray sali ra.

3 Tan agawa a pinisag to lamet so tinapay tan binendicionan to, tan initer to ed saray disipulos pian saya so kanen da.

4 Tan sanen sikara so akapañgan ingangan to ed sikara a mampisag ira met na tinapay, tan iter da ed saray karaklan.

5 Tan sanen niiter da la ed karaklan initer to met ed sikara so alak ya inumen, tan ingangan to met a sikara so mañgiter ed karaklan.

6 Natan, angapo so tinapay, ni alak ya inawit na saray disipulos, ni saray karaklan;

7 Balet petepeteg a niiter ed sikara so tinapay a kanen da, tan alak ya inumen da.

8 Tan inkuan to ed sikara: Siopaman so mañgan ed saya a tinapay kanen to so laman ko ya onkana ed kamarerua to; tan siopaman so oninum ed saya ya alak inumen to so dalak onkana ed kamarerua to; tan say kamarerua to ag la kapiganman naerasan ni naapgaan, balet sikato so napenek.

9 Natan, sanen saray karaklan so sikara ya amin so akapañgan tan akainum, nia, sikara so napno na Espiritu; tan sikara so kinmelyaw ed saksakey a voces, tan initer da so gloria ed si Jesus, a sikato so anengneng da tan nadñgel da.

10 Tan agawa a sanen sikara so añgigalgalang ed si Jesus, inkuan to ed sikara: Nia natan asumpal ko la so gangan ya ingangan na Ama ed siak nipaakar ed saya a totoo, a sikara so nakdaan ed kailalakan na Israel.

11 Nunoten yo a siak so akisalita ed sikayo, tan inkuan ko a sano saray salita nen Isaias so nasumpal—nia saraya so nisulat, a saraya so wala ed arap yo, dia ed ontan anap yo so saraya—

12 Tan tua, tua, ikuan ko ed sikayo, a sano saraya so nasumpal ontan met so pakasumpal na paknaan a ginawa na Ama ed saya a totoo, O kailalakan na Israel.

13 Tan dia ed ontan saray nakdaan, a sikara so nitayak ed tapew na dalin, sikara so natipon a manlapu ed bokig tan manlapu ed sagur, tan manlapu ed abalaten tan manlapu ed baybay; tan sikara so naawit ed pikakabat ed Katawan a Dios da, ya anundon ed sikara.

14 Tan say Ama ingangan to ak ya iter ko ed sikayo so saya a dalin, a saya so onkana a tawiren yo.

15 Tan ikuan ko ed sikayo, no saray Gentiles so ag ira mambabawi kayari a niiter ed sikara so bendicion ya awaten da, kayari ya intayak da so saray totook—

16 Dia ed ontan sikayo, a nakdaan ed kailalakan nen Jacob, onla kayo ed limog da; tan sikayo so wala ed otel da a sikara so dakerakel; tan sikayo so wala ed limog da a siñga sakey a leon ed limog na saray monanakap na katakelan, tan siñga sakey a malangwer a leon ed limog na olop na saray karnero, a saya, no sikato so onla ya onselek mandapag a gatinan to ra, tan pisay-pisayen to ra ed ankekelag, tan angapo so mañgiagel.

17 Say limam so niatagey ed saray kalaban mo, tan amin na saray kabusol mo so nataksing.

18 Tan tiponen ko so saray totook a pandaragupen a siñga say sakey a too a tiponen to so pinalot to ed datal.

19 Tan gawaen ko ed saray totook ya akipaknaan ed Ama, on, gawaen ko a balatyang so saray saklor mo, tan gawaen ko a gansa so saray kokom ed sali. Tan gaygayen mo so dakel a totoo; tan pasantosen ko so gungona ra ed Katawan, tan say tagano ra ed Katawan so amin a dalin. Tan nengneng yo, siak so saman so mangagawa ed saya.

20 Tan nagawa, inkuan na Ama, a say espada na kaptekan ko so nisabit ed petek da ed saman ya agew; tan likud no sikara so mambabawi saya so napelag ed sikara, inkuan na Ama, on, angan ed amin a bansa na saray Gentiles.

21 Tan nagawa ya iletneg ko so saray totook, O kailalakan na Israel.

22 Tan nia, saya a totoo so iletneg ko ed saya a dalin, anga ed nasumpal so paknaan a ginawak ed ama yo a Jacob; tan saya so manmaliw a Balo a Jerusalem. Tan say pakapanyari na tawen so wala ed pegley na saya a totoo; on, angan siak so wala ed pegley yo.

23 Nengneng yo, siak so saman so sinalita nen Moises, a nankuan: Sakey a profeta so ipatalindeg na Katawan a Dios yo manlapu ed saray kaagian yo, a siñga siak; sikato so deñgelen yo ed amin a beñgatla ed antokaman ya ibaga to ed sikayo. Tan nagawa a balang sakey a kamarerua ya ag to ondeñgel ed saman a profeta so nataksing ed limog na saray totoo.

24 Tua ikuan ko ed sikayo, on, tan amin a profeta a nanlapu ed si Samuel tan saray mantumbok kayari to, tan no kaonoñgan kinarakel so saray nansalita, sikara so amaneknek ed siak.

25 Tan nia, sikayo so anak na saray profeta; tan sikayo so kailalakan na Israel; tan sikayo so paknaan a ginawa na Ama ed saray ama yo, ya inkuan to ed si Abraham: Tan dia ed boleg mo amin a sankakanayon ed dalin so nabendicionan.

26 Say Ama impatalindeg to ak ed sikayo ya inmuna, tan siak so imbaki to pian bendicionan ko ya iarawi so balang sakey ed sikayo ed karelmeñgan to; tan lapu ed saya sikayo so anak ed paknaan—

27 Tan kayari a sikayo so abendicionan dia ed saman sumpalen na Ama so paknaan a ginawa to ed si Abraham, a nankuan: Dia ed boleg mo amin a sankakanayon ed dalin so nabendicionan—onkana ed pañgiter na Espiritu Santo ed panamegley ko ed saray Gentiles, a saya a bendicion ed saray Gentiles sikara so manmaliw a mabiskeg nen say amin, dia ed kitayak na saray totook, O kailalakan na Israel.

28 Tan sikara so mamairap ed saray totoo ed saya a dalin. Manwari ya ontan, sano naawat da la so inkagnap na evangeliok, dia ed ontan no paaweten da so saray puso ra sumpa ed siak ipawil ko so saray karelmeñgan da ed dili ya ulo ra, inkuan na Ama.

29 Tan nunoten ko so paknaan a saya so ginawak ed saray totook; tan akipaknaan ak ed sikara a tiponen ko ra ed dili a panaon ko, ya iter ko ed sikara lamet so dalin na kaamaan da ya onkana a tawiren da, a saya so dalin na Jerusalem, a saya so dalin a sipan ed sikara ed andi-angaan, inkuan na Ama.

30 Tan nagawa ya onsabi so panaon, a say inkagnap na evangeliok so nipulong ed sikara;

31 Tan sikara so manisia ed siak, a siak si Jesu Cristo, say Anak na Dios, tan sikara so mikasi ed Ama dia ed ñgaran ko.

32 Dia ed ontan saray taga-bantay da ikelyaw da so voces da, tan dia ed voces da a manoolop sikara so mancancion; tan nanengneng da mata ed mata.

33 Dia ed ontan say Ama tiponen to ra a mankakasakey lamet, tan iter to ed sikara so Jerusalem a dalin a tawiren da.

34 Dia ed ontan sikara so bigla a mangayaga—Mancancion kayo a mankakasakey, sikayo ya angapo so onkitakitaw a pasen na Jerusalem; lapu ed say Ama niligliwa to so saray totoo to; dinundon to la so Jerusalem.

35 Say Ama impanengneng to so masanto a taklay to ed mata na amin a bansa; tan amin a sampot na dalin nanengneng da so panañgilaban na Ama; tan say Ama tan say siak so saksakey.

36 Tan dia ed ontan nagawa so unong ed nisulat; Bañgon, bañgon ka lamet, tan iter mo so biskeg mo, O Sion; isulong mo so marakep a kawes mo, O Jerusalem, say masanto a ciudad, tan manlapu ed natan angapo la so onsabi ed sika ya ag-agalsiman tan aliwa a malinis.

37 Iyagyag mo so inkasika a manlapu ed sapok; bañgon ka, yurong ka, O Jerusalem; ukbaran mo so inkasika ed balor na teñger mo, O adakep a bii ya anak na Sion.

38 Tan onia so inkuan na Katawan: Inlakom so inkasika ed andi-kakanaan, tan sika so nadundon ya angapo so kuarta.

39 Tua, tua, ikuan ko ed sika, a saray totook nakabatan da so ñgaran ko; on, dia ed saman ya agew nakabatan da a siak so saman so nansalita.

40 Tan dia ed ontan ikuan da: Agay la so karakep na saray kapalandeyan ed saray sali na saman so mañgawit na maong a balita ed sikara, a mañgibawag na kareenan; a mañgawit na maong a balita ed sikara nipaakar ed kaabigan, a mañgibawag na kilalaban; a mankuan ed Sion: Say Dios mo so manoley!

41 Tan dia ed ontan sakey a paakseb so ibawag: Taynan kayo, taynan kayo, onla kayo ed paway a manlapu dia; ag yo didiwiten so beñgatla ya aliwa a malinis; paway kayo manlapu ed otel to; sikayo so malinis a mañgaawit na kagawaan na Katawan.

42 Tan ag ka ompaway a maganat odino sika so ombatik; lapu ed say Katawan onla ed unaan mo, tan say Dios na Israel so wala ed benegan mo.

43 Nia, say igagangan ko so miolop a sikakabat, sikato so nipaatagey tan nidayew tan manmaliw ya atagtagey.

44 No kaonoñgan so karakel na saray kinmelaw ed sika—say kanengneñgan to so aderal a nauman, ya alabas ni nen say siopaman a too, tan say indeñgan to alabas ni nen say indeñgan na saray anak na totoo—

45 Onia so pañgiwalsik to ed amayamay a bansa; saray ari kupiten da so sañgi ra ed sikato, tan saraman so ag nibaga ed sikara so nanengneng da; tan saman so ag da nadñgel so simbañgen da.

46 Tua, tua, ikuan ko ed sikayo, saraya ya amin a beñgatla so andi-saew ya onsabi, iñgen unong ed impañgigangan na Ama ed siak. Dia ed ontan saya a paknaan ya impipaknaan na Ama ed saray totoo to so nasumpal; tan dia ed ontan say Jerusalem sikato lamet so natooan na saray totook, tan saya so dalin ya onkana a tawiren da.