1 Tan natan agawa ya unong ed saray kasulatan mi, tan amta mi a saray kasulatan mi so tua, tan nia, sakey a matunong a too so añgisinop na saray kasulatan—tan peteg a sikato so nangawa na dakel a milagro ed ñgaran nen Jesus; tan angapo so siopaman a too so makagawa na milagro ed ñgaran nen Jesus likud no sikato so alinisan ed balang sakey a tulnek manlapu ed inkauges to—

2 Tan natan agawa, no angapo so liñgo ya agawa na saya a too dia ed impambilang to ed panaon mi, say talomplo tan talora a taon so linmabas la.

3 Tan saray totoo ginmapo la ra ya onnengneng ed baleg a pirawat ed say pakapatnagan a sinalita nen profeta Samuel, a Lamanite, on, ed say panaon a kiwala na biluñget ed loob na talora ya agew ed tapew na dalin.

4 Tan wala so saray ginmapo a baleg a duarua tan baliñgaan ed limog na saray totoo, manwari a dakel la so saray pakapatnagan a niiter.

5 Tan agawa ed komatalumplo tan apat a taon, dia ed unaan a bulan, ed komapat ya agew na bulan, sinmabi so sakey a mabiskeg a bagyo, a saya so angapo ni so kaparpara to ya akabatan ed amin a dalin.

6 Tan wala met so sakey a mabiskeg tan makapataktakot a yegyeg, tan wala so makapataktakot a karul, ya angan niyugayog to so amin a dalin a siñga la ñgalñgali napaldua.

7 Tan wala so saray mansasnit a kirmat, a saya so angapo ni so kaparpara to ya akabatan ed amin a dalin.

8 Tan say ciudad na Zarahemla so apoolan.

9 Tan say ciudad na Moroni so linmereg ed kaaraleman na dayat, tan saray manaayam diman so nalner.

10 Tan say dalin so naawit ed ciudad na Moronihah, a dia ed pasen na saman a ciudad wala so linmesa a baleg a palandey.

11 Tan wala so baleg tan makapataktakot a deral ed dalin a mamaabalaten.

12 Balet nia, wala ni so babaleg tan makapataktakot a kadederal ed dalin a mamabaybay, tan nia, say amin a tapew na dalin so nauman, lapu ed mabiskeg a bagyo tan saray alimbosabos, tan saray karul tan saray kirmat, tan saray mapalalo a mabiskeg ya inyegyeg na amin a dalin;

13 Tan saray maawang a karsada so linmeletak, tan saray mapalanas a dalan so aderal, tan dakel a patar a pasen so nanmaliw ya atibagkol.

14 Tan dakel ed saray ankakabaleg tan bantog a ciudad so linmelereg, tan dakel so apoolan, tan dakel so saray ayegyeg anga ed saray paalagey da so ageba ed dalin, tan saray manaayam diman so inaatey, tan saray pasen so nanmaliw ya angapo so manaayam.

15 Tan wala so pigara a ciudad so nakdaan; balet saray deral da so mapalalo a baleg, tan dakel ed saraya so inaatey.

16 Tan wala so pigara a naawit na alimbosabos; tan no iner so naakar da angapo so too a makapikabat, likud ed pikakabat da a sikara so niarawi.

17 Tan dia ed onia say amin a tapew na dalin so nauman, lapu ed saray mabiskeg a bagyo, tan saray karul, tan saray kirmat, tan say inyegyeg na dalin.

18 Tan nengneng yo, saray bato ya ankabaleg so apalpaldua; saraya so aboybuyak ed amin a tapew na dalin, dia ed onia saraya so arumog a nansisian a kabiañgan na dalin, tan ed saray nansaipan tan ed saray letak, dia ed amin a tapew na dalin.

19 Tan agawa sanen saray karul, tan saray kirmat, tan say bagyo, tan say mabiskeg a bagyo tan saray inyegyeg na dalin so tinmonda—tan nia, saraya so agawa ed loob na ñgalñgali talora ya oras; tan inkuan na saray arum a say oras so mas abayag; manwari ya ontan, saraya ya ankakabaleg tan makapataktakot a beñgatla so agawa ed loob na ñgalñgali a talora ya oras—tan dia ed saman nia, wala so biluñget ed tapew na dalin.

20 Tan agawa a wala so makapal a biluñget ed amin a tapew na dalin, dia ed onia saray manaayam diman ya ag niparukol alikna ra so kelpa na biluñget;

21 Tan angapo so liwawa, lapu ed biluñget, ni saray kandila, odino tubong a panagsilewan; ni say wala so apoy ya akadañgat ed saray mapalalo a pino tan sankamagaan a kiew, kanian angapo so liwawa;

22 Tan angapo so antokaman a liwawa ya anengneng, ni say apoy, ni say aninag na liwawa, ni say agew, odino say bulan, odino saray bitewen, tan ontan la so kapal na kelpa na biluñget a wala ed tapew na dalin.

23 Tan agawa a saya so dinmokey na talora ya agew ya angapo so liwawa ya anengneng; tan wala so baleg a kaermenan tan panogaog tan pannañgis ed limog na saray totoo ya andi-tonda; on, agay la so panaglem na saray totoo, lapu ed biluñget tan say baleg a kadederal a sinmabi ed sikara.

24 Tan dia ed sakey a pasen wala so saray akis a nadñgel, a nankuan: O no sikami komon so nambabawi sakbay na saya a baleg tan makapataktakot ya agew, tan komon dia ed saya niligyas so saray kaagian mi, tan sikara komon so ag apoolan ed saman so baleg a ciudad na Zarahemla.

25 Tan dia ed sananey a pasen sikara so areñgel ya inmakis tan nanermen, a nankuan: O no sikami komon so nambabawi sakbay na saya a baleg tan makapataktakot ya agew, tan ag mi pinapatey tan tinutopak so saray profeta, tan sikara so pinagit mi; komon dia ed saya saray ina mi tan saray malimgas ya anak mi a bibii, tan saray anak mi so niligyas, tan sikara so ag atabonan ed saman so baleg a ciudad na Moronihah. Tan onia so saray panogaog na saray totoo so maksil tan makapataktakot.