1 Tan agawa a legan a saray disipulos nen Jesus so mambabaroy tan mampupulong na saray beñgatla a mandapag a nadñgel tan anengneng da, tan sikara so mambibiniag ed ñgaran nen Jesus, agawa a saray disipulos so atiptipon tan sikara so nankakasakey ed baleg a pikakasi tan panagayuno.

2 Tan si Jesus impanengneng to lamet so inkasikato ed sikara, lapu ed sikara so mampipikasi ed Ama ed ñgaran to; tan si Jesus so sinmabi tan nanalagey ed pegley da, tan inkuan to ed sikara: Anto so labay yo ya iter ko ed sikayo?

3 Tan inkuan da ed sikato: Katawan, pilalek mi ya ibagam no anto so pañgiñgaran mi ed saya a simbaan; tan wala so saray baliñgaan ed limog na saray totoo nipaakar ed saya a pamaakaran.

4 Tan say Katawan inkuan to ed sikara: Tua, tua, ikuan ko ed sikayo, akin a saray totoo nepeg a manñguroñguro tan mambabaliñgaan lapu ed saya a beñgatla?

5 Ag da kasi abasa so saray masanto a kasulatan, ya añgibaga a nakaukolan yo ya akoen ed sikayo so ñgaran nen Cristo, a saya so ñgaran ko? Tan dia ed saya a ñgaran so katawaga kayo ed sampot ya agew.

6 Tan siopaman a mañgako ed sikato na ñgaran ko, tan mansiansia ya anga ed sampot, sikato met lamlamang so nilaban ed sampot ya agew.

7 Dia ed ontan, antokaman a gawaen yo, gawa yo ed ñgaran ko; dia ed ontan tawag yo so simbaan ed ñgaran ko; tan sikayo so ontawag ed Ama ed ñgaran ko pian bendicionan to so simbaan lapu ed siak.

8 Tan panon a saya so simbaan ko likud no natawag ed ñgaran ko? Tan no say sakey a simbaan so natawag ed ñgaran nen Moises dia ed ontan saya so simbaan nen Moises; odino no saya so natawag ed ñgaran na sakey a too dia ed ontan saman so simbaan na sakey a too; balet no saya so natawag ed ñgaran ko dia ed ontan saya so simbaan ko, dapot no sikara so niletneg ed evangeliok.

9 Tua ikuan ko ed sikayo, a sikayo so niletneg ed evangeliok; dia ed ontan tawag yo so antokaman a beñgatla a tawagen yo, ed ñgaran ko; dia ed ontan no sikayo so ontawag ed Ama, lapu ed simbaan, no saya so dia ed ñgaran ko say Ama deñgelen to kayo;

10 Tan no bilbilang a say simbaan so niletneg ed evangeliok dia ed ontan say Ama ipanengneng to so dili a kimey to ed saya.

11 Balet no saya so ag niletneg ed evangeliok, tan saya so niletneg ed kimey na saray totoo, odino dia ed saray kimey na demonyo, tua ikuan ko ed sikayo wala so gayaga ra ed saray kimey da ed sakey a panaon, tan dia ed nagogonuyan say kasampotan so onsabi, tan sikara so nabatang tan ibuntok ed apoy, a manlapu diman angapo la so ompawil.

12 Tan saray kimey da so ontumbok ed sikara, lapu ed saray kimey da kanian sikara so abatang; dia ed ontan nunot yo so saray beñgatla ya imbagak ed sikayo.

13 Nia initer ko ed sikayo so evangeliok, tan saya so evangelio ya initer ko ed sikayo—a siak so linma ed mundo a manumpal na linawa na Amak, lapu ed si Amak so añgibaki ed siak.

14 Tan say Ama imbaki to ak pian siak so ibayubay ed krus; tan kayari a siak so nibayubay ed krus, pian napaasinger ko so amin a totoo ed siak, tan unong a siak so intanduro na saray totoo ontan met a saray totoo so itanduro na Ama, ya ontalindeg ed arap ko, pian sikara so naokom unong ed saray kimey da, no bilang sikara so maong odino sikara so mauges—

15 Tan lapu ed saya a pamaakaran siak so nitanduro; dia ed ontan, unong ed pakapanyari na Ama napaasinger ko so amin a totoo ed siak, pian sikara so naokom unong ed saray kimey da.

16 Tan nagawa, a siopaman a mambabawi tan mampabiniag ed ñgaran ko so napano; tan no sikato so mansiansia ya anga ed sampot, nia, sikato so nidasig ya andi-dukit ed kasalanan ed arap na Ama ed saman ya agew sano siak so ontalindeg a mañgokom ed mundo.

17 Tan siopaman so ag makapansiansia ya anga ed sampot, sikato met lamlamang so nabatang tan ibuntok ed apoy, a manlapu diman ag la ra makapawil, lapu ed kaptekan na Ama.

18 Tan saya so salita ya initer to ed saray anak na totoo. Tan lapu ed saya a pamaakaran sinumpal to so saray salita ya initer to, tan sikato so ag nantila, balet sinumpal to ya amin so saray salita to.

19 Tan angapo so beñgatla ya aliwa a malinis so nayari a makaloob ed panarian to; dia ed ontan angapo so makaloob ed painawaan to likud lambeñgat ed saraman so inorasan da so saray kawes da ed dalak, lapu ed pananisia ra, tan say impambabawi ra ed amin a kasalanan da, tan say katuoran da ya anga ed sampot.

20 Natan saya so gangan: Mambabawi kayo, amin yo a kasampotan na dalin, tan ondago kayo ed siak tan mampabiniag kayo ed ñgaran ko, pian sikayo so napasanto ed pañgawat na Espiritu Santo, pian ontalindeg kayo ya angapo so mansa ed arap ko ed sampot ya agew.

21 Tua, tua, ikuan ko ed sikayo, a saya so evangeliok; tan amta yo so saray beñgatla a nakaukolan yo a gawaen ed simbaan ko; lapu ed saray kimey ya anengneng yo a ginawak saya met so gawaen yo; tan saman so anengneng yo a ginawak iñgen ontan met so gawaen yo;

22 Dia ed ontan no gawaen yo so saraya a beñgatla mapalar kayo, lapu ed sikayo so nitanduro ed sampot ya agew.

23 Isulat yo so saray beñgatla ya anengneng tan nadñgel yo, likud lambeñgat ed saraman so nisebel.

24 Isulat yo so saray kimey na saya a totoo, a saraya, so angan unong ed nisulat, ed saman so linmabas la.

25 Tan nia, manlapu ed lugan na saray libro a nisulat, tan saraya so isulat ni, saraya a totoo so naokom, tan dia ed saraya saray kimey da so nakabatan na saray totoo.

26 Tan nengneng yo, amin a beñgatla so insulat na Ama; dia ed ontan manlapu ed saray libro a nisulat say mundo so naokom.

27 Tan kabaten yo a sikayo so okom na saya a totoo, unong ed panañgokom ya iter ko ed sikayo, a saya so maptek. Dia ed ontan, anto a kanengneñgan na totoo so nepeg yo? Tua ikuan ko ed sikayo, angan siñga siak.

28 Tan natan onla ak la ed Ama. Tan tua ikuan ko ed sikayo, antokaman a beñgatla a kerewen yo ed Ama ed ñgaran ko saya so niiter ed sikayo.

29 Dia ed ontan, kerew kayo, tan saya so naawat yo; tuktok kayo, tan saya so nalukasan ed sikayo; tan siopaman so onkerew, makaawat; tan dia ed saman so ontuktok, saya so nalukasan.

30 Tan natan, nengneng yo, say gayagak so baleg, angan dia ed inkagnap, lapu ed sikayo, tan ontan met ed saya a kailalakan; on, tan angan say Ama so nangayaga, tan ontan met ed amin a masanto ya angeles, lapu ed sikayo tan saya a kailalakan; tan angapo ed sikara so abalang.

31 Nia, pirawat ko a natalusan yo; lapu ed labay ko a tukoyen so saray peles a mabilay natan ed saya a kailalakan; tan angapo ed sikara so abalang; tan dia ed sikara nagnap so gayagak.

32 Balet nia, apaermen ak lapu ed komapat a kailalakan a manlapu ed saya a kailalakan, lapu ed sikara so niarawi ya adakep na saman so anak na kadederal; tan ilako da ak makaseñgeg ed pilak tan balitok, tan lapu ed saman so deralen na gamugamo tan nayari a looban na saray matatakew tan takewen da. Tan dia ed saman ya agew siak so ondalaw ed sikara, iñgen panmaliwen ko a saray kimey da so onsumlang ed dili ya ulo ra.

33 Tan agawa a sanen si Jesus sinampotan to so pansasalita to inkuan to ed saray disipulos to: Onloob kayo ed mairap a puerta; lapu ed mairap so puerta, tan makisir so dalan ya onarap ed bilay, tan daiset so makaalmo ed saya; balet maawang so puerta, tan malapar so dalan ya onarap ed patey, tan dakel diman so managbaroy diman ed loob, anga ed isabi na labi, no iner angapo la so too a nayari a mankimey.