1 Tan natan agawa a sanen si Jesus imbalikas to so saraya a salita sikato so inmarap lamet ed karaklan, tan nilukasan to so sañgi to ed sikara lamet, a nankuan: Tua, tua, ikuan ko ed sikayo, Ag kayo mañgookom, pian ag kayo naokom.

2 Tan no panon so pañgokom yo, ontan met so kaokom yo; tan no anto so ikana yo a pansukat, saya met so ikana a pansukat ed sikayo.

3 Tan akin naimanom so melag a dutak ed mata na agim, balet ag mo imanoen so akasanib ed dili a matam?

4 Odino panon so pañgibagam ed dili ya agim: Abuloyan mo ak a mañgekal na melag a dutak ed matam—tan nia, wala so akasanib ed dili a matam?

5 Sika a mansimpisimpitan, ekal mo ni ya ununa so akasanib ed dili a matam; tan dia ed saya a malinew so pakanengneng mo a mañgekal ed melag a dutak a wala ed mata na agim.

6 Ag mo iiter so beñgatla a masanto ed saray aso, ni say ibuyak mo so saray perlas ed arap na saray baboy, ag la piga saraya so gatin-gatinan da, tan sika so puliktaran da lamet tan sika so pisay-pisayen da.

7 Kerew ka, tan saya so niiter ed sika; anap ka; tan sika so makaalmo; tuktok ka, tan saya so nalukasan ed sika.

8 Tan balang sakey ya onkerew, so makaawat; tan siopaman a mananap, makaalmo; tan siopaman ya ontuktok, sikato so nalukasan.

9 Odino anto a too ed sikayo, a, no say anak to onkerew na tinapay, iter to so bato?

10 Odino sano sikato so onkerew na sira, iter to kasi so sakey ya oleg?

11 No sirin, angan mauges, amta yo so mañgiter na maong a palabo ed saray anak yo, ag kasi nagkalalo ni so say Ama yo a wala ed tawen iter to ed sikayo so saray maong a beñgatla ed saraman so onkerew ed sikato?

12 Dia ed ontan, amin a labay yo a gawaen na saray totoo ed sikayo, ontan met so gawaen yo ed sikara, tan saya so gangan tan saray profeta.

13 Onloob kayo ed mairap a dalanan; tan malapar so dalanan, tan malapar so dalan, ya onarap ed kadederal, tan dakel so onla ya onloob diman.

14 Lapu ed mairap so dalanan, tan makisir so dalan, ya onarap ed bilay, tan daiset so saray makarumog ed saya.

15 Aluaran yo so saray tila-tila a profeta, ya onla ed sikayo ya sikakawes na kawes na karnero, balet dia ed dalem masisiba a lubo.

16 Sikara so nakabatan yo lapu ed saray buñga ra. Makaburbor kasi so saray totoo na ubas ed saray sabit, odino ed saray kiew a nansabit so saray bolong da?

17 Angan ontan met so balang sakey a maong a kiew mañgiter na maong a buñga; balet say mauges a kiew mañgiter na mauges a buñga.

18 Say maong a kiew ag to mañgiter na mauges a buñga, ni say mauges a kiew so mañgiter na maong a buñga.

19 Balang sakey a kiew ya ag mañgiter na maong a buñga so nabatang, tan ibantak ed apoy.

20 Dia ed ontan, dia ed saray buñga ra sikara so nakabat yo.

21 Aliwa a balang sakey a mankuan ed siak, Katawan, Katawan, so makaloob ed panarian na tawen; balet saman so mañgonor ed linawa nen Amak a wala ed tawen.

22 Dakel so mankuan ed siak ed saman ya agew: Katawan, Katawan, ag kasi sikami so namprofesiya ed ñgaran mo, tan dia ed ñgaran mo pinapaway mi so saray demonyo, tan dia ed ñgaran mo nangawa kami na dakel a kimey a makapakelaw?

23 Tan dia ed ontan ipatuak ed sikara: Ag takayo kapiganman kabat; taynan kayo ed siak, sikayo a managgawa na karelmeñgan.

24 Dia ed ontan, siopaman a makareñgel ed saraya a salitak tan gawaen da, sikara so ipareng ko ed makabat a too, ya impaalagey to so abong to ed tapew na bato a dampay—

25 Tan pinmelag so uran, tan sinmabi so delap, tan say dagem so sinmiplog, tan binmasig ed saman ya abong; tan saya so ag atumba, lapu ed saya so niletneg ed bato a dampay.

26 Tan balang sakey a mandereñgel ed saraya a salitak tan saraya so ag to gawaen sikato so nipareng ed sakey a too a makulang-kulang, ya impaalagey to so abong to ed tapew na buer—

27 Tan say uran so pinmelag, tan say delap sinmabi, tan say dagem so sinmiplog, tan binmasig ed saman ya abong, tan saya so atumba, tan agay la a kabaleg so inkatumba to.