1 Tan agawa a dia ed sampot na komalabinwalo a taon saraman a ñgayew na saray matatakew so namparaan ira ed bakal, tan ginapoan da so onlasur tan nampa-wil-pawil manlapu ed saray kapukdolan, tan ompaway ed saray palandey, tan dia ed kalawakan tan saray mabiskeg a kawalaan da, tan saray maamot a pasen da, tan ginapoan da a kayarianen so saray dalin, dia ed mandapag a dalin ed abalaten tan dalin ed baybay, tan ginapoan da a kayarianen so amin a dalin a tinaynan na saray Nephite, tan saray ciudad ya angapo so manaayam.

2 Balet nia, angapo so saray monanakap odino beñgatla a naanopan ed saman a dalin a tinaynan na saray Nephite, tan angapo so naanopan na saray matatakew likud dia ed saray kalawakan.

3 Tan saray matatakew ag ira nabilay likud labat no dia ed kalawakan, lapu ed pankaukolan da na naakan; tan saray Nephite tinaynan da so saray dalin da ya angapo so onkitakitaw, tan tinipon da so saray manok tan saray ayayep da tan amin a napambilay da, tan sikara so wala ed saksakey ya olop.

4 Dia ed ontan, angapo so pankanawnawa na saray matatakew a manamsam tan mañgala na naakan, likud no sikara so onla a milaban sumpa ed saray Nephite; tan lapu ed saray Nephite so wala ed saksakey ya olop, tan wala so baleg a bilang da, tan wala so insinop da ya onkana ed sikara a tagano, tan saray kabayo tan baka, tan saray manok ed nanduroma a kanengneñgan, a nayarian da so mambilay ed loob na pitora a taon, a dia ed loob na saya a panaon iilaloan da a naderal da la ya amin so saray matatakew ed tapew na saman a dalin; tan dia ed onia linmabas so komalabinwalo a taon.

5 Tan agawa a dia ed komalabinsiam a taon si Giddianhi nalmoan to a sikato so nakaukolan ya onla a milaban sumpa ed saray Nephite, lapu ed angapo so nagawaan da a pamaakaran pian mambilay ira likud ed pansamsam tan pantakew tan pampatey.

6 Tan ag da labay so mansisian ed inkasikara a dili ed tapew na saman a dalin pian dia ed onia nayarian da so mantanem na saray dawa, ag la piga saray Nephite so ondugpa ra ed sikara tan pateyen da ra; dia ed ontan si Giddianhi so añgiter na gangan ed saray ñgayew to a dia ed saya a taon sikara so onla a milaban sumpa ed saray Nephite.

7 Tan agawa a sikara so linma ed bakal; tan saya dia ed komanem a bulan; tan nia, agay la tan makapataktakot so agew ya iniakar da a mibakal; tan sikara so akabalkes a siñga unong ed kanengneñgan na saray matatakew; tan wala so katat na karnero ed balambang da, tan nankolor ira na dala, tan saray ulo ra so pinoklisan, tan wala so salimbeng na ulo ra; tan agay la tan makapataktakot so nengneng na saray ñgayew nen Giddianhi, lapu ed saray sakob na laman da, tan lapu ed sikara so akoloran na dala.

8 Tan agawa a saray ñgayew na Nephite, sanen anengneng da so kanengneñgan na saray ñgayew nen Giddianhi, sikara ya amin so dinmakmumo ed dalin, tan inkelyaw da so nañgis da ed Katawan a Dios da, a sikara so iligyas to tan sikara so ilaban to ed lima na saray kabusol da.

9 Tan agawa sanen saray ñgayew nen Giddianhi anengneng da so onia ginapoan da so oneyag ed maksil a voces, lapu ed gayaga ra, lapu ed impasen da a saray Nephite so niparukol lapu ed takot makaseñgeg ed kigtot da ed saray ñgayew da.

10 Balet dia ed saya a beñgatla sikara so aliñgo, tan saray Nephite ag ira tinmakot ed sikara; balet say tinakotan da say Dios da tan sikara so nampikasi ed sikato na panañgiagel; dia ed ontan, sanen saray ñgayew nen Giddianhi so dinmugpa ed sikara akaparaan ira ya onabet ed sikara; on, dia ed biskeg na Katawan sikara so inawat da.

11 Tan say bakal ginmapo ed saya a komanem a bulan; tan baleg tan makapataktakot so laban diman, on, baleg tan makapataktakot so panagpatey diman, a dia ed saman angapo ni so akabatan ya onia a kinabaleg na panagpatey ed limog na saray totoo nen Lehi nanlapu ed intaynan to ed Jerusalem.

12 Tan manwari ya ontan so saray impantaktakot tan samba a ginawa nen Giddianhi, nia, saray Nephite tinalo da ra, dia ed onia sikara so sinmener ed arapan da.

13 Tan agawa a si Gidgiddoni ingangan to ed saray ñgayew to ya osilan da ra anga ed ketegan na saray kalawakan, tan angapo so iligyas da ya angan sakey a napelag ed lima da ed dalan; tan dia ed onia inosilan da ra tan pinatey da ra, ya anga ed ketegan na kalawakan, iñgen anga ed impakasumpal da na gangan nen Gidgiddoni.

14 Tan agawa a si Giddianhi, a sikato so tinmalindeg tan akilaban a sisesebeg, so inosilan da nen sikato so binmatik; tan dia ed banal to lapu ed dakel ya impilaban to sikato so naabot tan pinatey da. Tan onia so impansampot nen Giddianhi a matakew.

15 Tan agawa a saray ñgayew na Nephite so amawil lamet ira ed pasen a salimbeñgan da. Tan agawa a saya a komalabinsiam a taon so linmabas, tan saray matatakew ag la ra linma lamet a mibakal; ni say sikara so linma lamet ed komaduamplo a taon.

16 Tan dia ed komaduamplo tan sakey a taon sikara so ag linma a mibakal, balet sikara so linma ed amin a gilig pian liktoben da so saray totoo nen Nephi; tan ipapasen da a no sakbayan da so saray totoo nen Nephi ed saray dalin da tan sikara so desdesen da ed amin a diking, tan no napaksot da so saray pankanawnawa ra a manlapu ed paway, saya so makaseñgeg na pañgiawat da ed inkasikara unong ed kaliktan da.

17 Natan anuro ra na sananey a pañgulo ed limog da, a say ñgaran to Zemnarihah; dia ed onia si Zemnarihah so nangangan ed saya a panliktob so nagawa.

18 Balet nia, saya so sakey a pankamaoñgan ed saray Nephite; lapu ed ag nayarian na saray matatakew a gawaen so andukey a panliktob ed sikara pian saya so makaiter na antokaman a kaugsan ed saray Nephite, lapu ed kinarakel na saray tagano ra a tinipon da.

19 Tan lapu ed kinaraiset na tagano ed limog na saray matatakew; tan nia, angapo so wala ed sikara likud ed karne a saya so pambibilay da, a saya a karne so aanopan da ed kalawakan;

20 Tan agawa a saray ayep ya aanopan so nanmaliw la a matalag ed kalawakan dia ed onia saray matatakew ñgalñgali la ra ompatey ed eras.

21 Tan saray Nephite ag ira tinmonda ed panaanap da ed labi tan agew, tan ondudugpa ra ed saray ñgayew da, tan papateyen da ra ed nilibo tan tungal asamplora a nilibo.

22 Tan dia ed onia nanmaliw a pilalek na saray totoo nen Zemnarihah so onsener ed saray getma ra, lapu ed baleg a kadederal a sinmabi ed sikara ed labi tan agew.

23 Tan agawa a si Zemnarihah ingangan to ed saray totoo to a sikara la so onsener ed panliliktob da, tan sikara la so onla ed arawi a pasen na dalin a mamabaybay.

24 Tan natan, si Gidgiddoni lapu ed kabkabat to so saya a getma ra, tan amta to so kapoy da lapu ed pankaukolan da na naakan, tan say baleg a panagpatey ya agawa ed limog da, dia ed ontan imbaki to so saray ñgayew to ed panaon na labi, tan sinakbayan da so dalan ed seseneran da, tan impasen to so saray ñgayew to ed dalan na seneran da.

25 Tan saya so ginawa ra ed panaon na labi, tan nankurang ira ya alabsanan da so kawalaan na saray matatakew, kanian dia ed kaimbuasan, nen saray matatakew gapoan da so kurang da, sikara so inabet na saray ñgayew na Nephite mandapag ed arapan da tan dia ed benegan da.

26 Tan saray matatakew a wala ed abalaten so apasakbayan ed pasen a seseneran da. Tan saraya ya amin so agawa lapu ed gangan nen Gidgiddoni.

27 Tan dakel a nilibo so insuko ra so inkasikara ya ipañgaw na saray Nephite, tan saray nakekeraan ed sikara so pinatey da.

28 Tan say pañgulo ra, a si Zemnarihah, so adakep tan imbitay da ed sakey a kiew, on, angan dia ed tuktok anga ed sikato so inatey. Tan sanen sikato so imbitay da ya anga ed sikato so inatey imbatang da so kiew ya intumba ed dalin, tan sikara so inmeyag ed maksil a voces, ya inkuan da:

29 Say Katawan komon iagel to so saray totoo to dia ed inkamatunong tan dia ed kasantosan na puso, pian sikara so mañgipatumba ed dalin na amin a mampilalek a mamatey ed sikara lapu ed pakapanyari tan saray maamot a pannonunoñgan, anga ed siñga saya a too so impatumba ed dalin.

30 Tan sikara so nangayaga tan nambelyaw lamet ed sakey a voces, a kuan da: Komon say Dios nen Abraham, tan say Dios nen Isaac, tan say Dios nen Jacob, iagel to so saya a totoo dia ed inkamatunong, legan a sikara so ontawag ed ñgaran na Dios da ya onkana ed pañgiagel ed sikara.

31 Tan agawa a sikara so binmigla, a nankakasakey, ed mancancion, tan impandayew da ed Dios da lapu ed baleg a beñgatla a ginawa to ed sikara, ed impañgiagel to ed sikara ed kapelag da ed lima na saray kabusol da.

32 On, sikara so nambelyaw na: Hosanna ed Sankaatageyan a Dios. Tan imbelyaw da: Nagalang so ñgaran na Katawan a Dios a Makapanyari ed Amin, say Sankaatageyan a Dios.

33 Tan saray puso ra so binmaleg ed gayaga, katekep na interter na dakel a lua, lapu ed kamaoñgan na Dios ed impañgiagel to ed sikara ed lima na saray kabusol da; tan amta da a saya so lapu ed saray impambabawi ra tan say panagpaabeba ra kanian sikara so nilaban ed andi-angaan a kadederal.