1 Tan agawa a sanen kayari nen Jesus ya imbalikas so saraya a salita ed kinen Nephi, tan saraman so atawag, (natan say bilang na saray atawag tan añgawat na pakapanyari tan pakaoley a mambiniag, so labindua) tan nia, iniunat to so lima to ed saray karaklan, tan imbelyaw to ed sikara, a nankuan: Mapalar kayo no deñgelen yo so saray salita na saraya a labindua a sikara so pinilik ed limog yo a mantalima ed sikayo, tan sikara so manmaliw ya igagangan yo; tan dia ed sikara so añgiteran ko na pakapanyari pian sikara so mambiniag ed sikayo ed danum; tan kasumpal a sikayo so nabiniagan ed danum, nia, biniagan takayo ed apoy tan ed Espiritu Santo; dia ed ontan mapalar kayo no sikayo so manisia ed siak tan sikayo so nabiniagan, kasumpal a siak so anengneng yo tan akabatan yo a siak so siak.

2 Tan lamet, lalo a mapalar so saraman so manisia ed saray salita yo lapu ed sikayo so mampaneknek ya anengneng yo ak tan kabat yo a siak so siak. On, mapalar so saray manisia ed saray salita yo, tan sikara so onleksab ed kaaraleman na panagpaabeba tan sikara so nabiniagan, lapu ed sikara so dalawen na apoy tan say Espiritu Santo, tan awaten da so pamaandi na saray kasalanan da.

3 On, mapalar so saray duka ed espiritu ya ondago ed siak, lapu ed sikara so mankayarian ed panarian na tawen.

4 Tan lamet, mapalar ya amin so saray manermen, lapu ed sikara so naligliwa.

5 Tan mapalar so saray maolimek, lapu ed sikara so manawir ed dalin.

6 Tan mapalar ya amin so saray naeerasan tan napgaan nipaakar ed inkamatunong, tan sikara so napano na Espiritu Santo.

7 Tan mapalar so saray mapañgasi, lapu ed sikara so makagamor na panañgasi.

8 Tan mapalar ya amin so saray awalaan na dalisay a puso, lapu ed sikara so makapinengneng ed Dios.

9 Tan mapalar ya amin so saray managpareen, lapu ed sikara so natawag ya anak na Dios.

10 Tan mapalar ya amin so saray apasegsegang makaseñgeg ed ñgaran ko, lapu ed sikara so mankayarian ed panarian na tawen.

11 Tan mapalar kayo sano saray totoo balawen tan pasegsegañgen da kayo, tan ibaga ra so amin a kanengneñgan na mauges sumpa ed sikayo ya andi-katuaan, makaseñgeg ed siak;

12 Tan nawalaan kayo na baleg a gayaga tan manliket kayo a mapalalo, tan ontan la a kabaleg so gungona yo ed tawen; tan ontan so inkapasegsegang na saray profeta ya akaona nen say sikayo.

13 Tua, tua, ikuan ko ed sikayo, iter ko ed sikayo a sikayo so asin na dalin; balet sano say asin abalang to la so taway to iner so pañgalaan mo na panasin na dalin? Dia ed ontan say asin angapo la so kakanaan to, balet saya la so ibantak tan gatin-gatinan na sali na saray totoo.

14 Tua, tua, ikuan ko ed sikayo, iter ko ed sikayo a sikayo so silew na saya a totoo. Say sakey a ciudad ya akatoon ed sakey a pukdol ya ag niamot.

15 Nia, saray totoo kasi dañgatan da so kandila tan iyan da ed silong na sakey a salop? Andi, balet iyan ed panañgitoonan na kandila, tan saya so mañgiter na liwawa ed amin a wala ed loob na abong;

16 Dia ed ontan paulyan yo so saray liwawa yo ya onsinag ed arap na saya a totoo, pian nanengneng da so saray maong a kimey yo tan igloria da so Ama yo a wala ed tawen.

17 Ag yo nunoten a linma ak dia a manderal ed say gangan odino ed saray profeta. Ag ak linma dia a manderal no ag iñger manumpal;

18 Tan tua ikuan ko ed sikayo, angapo so angan sakey a tulnek odino paulo so nayari ya onlabas ed gangan, balet dia ed siak saraya ya amin so asumpal.

19 Tan nia, initer ko ed sikayo so gangan tan saray gangan nen Amak, pian sikayo so manisia ed siak, tan sikayo so mambabawi ed saray kasalanan yo, tan ondago kayo ed siak ed maermen a puso tan mambabawi ya espiritu. Nia, wala la ed sikayo so saray gangan ed arapan yo, tan say gangan so asumpal.

20 Dia ed ontan ondago kayo ed siak tan sikayo so nilaban; tan tua ikuan ko ed sikayo, likud no sumpalen yo so saray gangan ko, a saraya so ingangan ko ed sikayo ed saya a panaon, angapo so antokaman a pamaakaran a sikayo so ag makaloob ed panarian na tawen.

21 Nadñgelan yo a saya so inkuan da la ed kadaanan a panaon, tan saraya met so nisulat ed arapan yo, ya ag kayo mamatey, tan siopaman a mamatey sikato met so wala ed kaatapan ed panañgokom na Dios;

22 Balet ikuan ko ed sikayo, siopaman ya mamasnok ed agi to sikato so wala ed kaatapan na panañgokom to. Tan siopaman a mañgikuan ed agi to, Raca, sikato so wala ed kaatapan ed panañgikunoan; tan siopaman a mañgikuan, Sika so makulang-kulang, sikato so wala ed kaatapan na apoy ed infierno.

23 Dia ed ontan, no sikayo so ondago ed siak, odino pilalek yo so ondago ed siak, tan nanunotan yo a say agi yo so nankasalanan sumpa ed sikayo—

24 Onla ka ed agim, tan unona a mipulañgan ka ed agim, tan kayari to nia ondago ka ed siak ya awalaan na naspot a gagala na puso, tan sika so awaten ko.

25 Miabubon ka ed kakulkol mo a tampol legan a sika so wala ed dalan a kaibam, ag la piga dia ed antokaman a panaon sika so naala to, tan sika so ipisok to ed pañgawan.

26 Tua, tua, ikuan ko ed sika, ag ka makapaway ed antokaman a pamaakaran diman anga ed ag mo pakabayar na sankaunoran a sintimo. Tan legan a wala ka ed pañgawan nayarian mo kasi so mambayar na angan saksakey a sintimo? Tua, tua, ikuan ko ed sika, Andi.

27 Nia, saya so nisulat da nen kadaanan a panaon, ya ag ka mangagawa na pikakaloguran;

28 Balet ikuan ko ed sika, siopaman ya onnengneng ed sakey a bii, a wala so tekep to ya alak na laman ed sikato, so nangawa la na pikakaloguran ed dalem na pusom.

29 Nia, iter ko ed sikayo so sakey a gangan, pian ag yo abuloyan so saraya a beñgatla ya onloob ed saray puso yo;

30 Tan magmaong ni ya iwaklit yo ed inkasikayo a dili so saraya a beñgatla, ed panakbat yo na krus yo, nen say sikayo so nibantak ed infierno.

31 Nisulat, a siopaman a mañgisian ed asawa to, sikato so mañgiter na kasulatan a tanda na pansian.

32 Tua, tua, ikuan ko ed sikayo, a siopaman a mañgisian ed asawa to, a say makaseñgeg so say impilawanan, a saya so señgegan a say asawa a bii so nangawa na pikakaloguran; tan siopaman a mañgasawa ed sikato ya akisian so mangagawa na pikakaloguran.

33 Tan lamet nisulat, ag mo isasamba so inkasika, balet sumpal mo ed Katawan so saray sambam;

34 Balet, tua, tua, ikuan ko ed sika, ag ka mansasamba; ni say dia ed tawen, tan saya so trono na Dios;

35 Ni say dia ed dalin, tan saya so pantutuonan na sali to;

36 Ni say isambam so ulom, lapu ed ag mo nayarian a gawaen so angan sakey a buek ya andeket odino amputi;

37 Balet paulyan mo a say pitatalusan mo manmaliw ya On, on; Andi, andi; tan say beñgatla a mapalalo ni nen say saraya so mauges.

38 Tan nia, nisulat, sakey a mata ed sakey a mata, tan sakey a ñgipen ed sakey ñgipen;

39 Balet ikuan ko ed sikayo, ya ag yo sasaluñgaten so mauges, balet siopaman a manampal ed kawanan ya aping yo, iliñgaw yo met ed sikato so pagpag;

40 Tan sano say sakey a too idalem to ka unong ed gangan tan alaen to so kawes mo, iter mo met ed sikato so kolibemben mo;

41 Tan siopaman a mamasoot ed sika a mila ed sikato ed sakey a milia, mila ka ed sikato na duara.

42 Iter mo ed saman so onkerew ed sika, tan saman so ombayes ed sika ag ira ikakaindan.

43 Tan nia nisulat met, ya aroen yo so kaabay yo tan busolen yo so kabusol yo;

44 Balet nia ikuan ko ed sikayo, aroen yo so saray kabusol yo, bendicionan yo so saray mañgaayew ed sikayo, gawa yo so maong ed saray mambobusol ed sikayo, tan ipikasi yo so saray mañgikana ed sikayo ed andi-alwar tan mamasegsegang ed sikayo;

45 Pian manmaliw kayo ya anak na Ama yo a wala ed tawen; tan ginawa to so agew ya ombutay ed saray mauges tan saray maong.

46 Dia ed ontan saraman so beñgatla a wala ed kadaanan a panaon, a wala ed say gangan, dia ed siak saraya ya amin so asumpal.

47 Saray kadaanan a beñgatla so ag la nakaukolan a gawaen, tan amin a beñgatla nanmaliw a balo.

48 Dia ed ontan pilalek ko a sikayo so nagnap a siñga siak, odino say Ama yo a wala ed tawen a sikato so nagnap.