1 Natan nia, ipanengneng ko ed sikayo ya ag ira añgipatalindeg na ari ed saman a dalin; balet ed saya lamlamang a taon, on, say komatalumplo a taon, dineral da ed yuroñgan na panañgokoman, on, pinatey da so pañgulo ya okom ed dalin.

2 Tan saray totoo so naapag-apag ed sakey sumpa ed sananey; tan sikara so asiyansiyan ed sakey tan sakey ed nansasananey a tribo, balang sakey a too unong ed boleg tan kakanayon to tan kakaaro to; tan dia ed onia dineral da so oley ed dalin.

3 Tan say balang sakey a tribo so anuro na sakey a pañgulo a manoley ed sikara; tan dia ed onia nanmaliw ira a tribo tan pañgulo na saray tribo.

4 Natan nia, angapo so too ed limog da likud no ag awalaan na baleg a boleg tan dakel a kakanayon tan kakaaro; dia ed ontan saray tribo da so nanmaliw a mapalalo a baleg.

5 Natan saya ya amin so agawa, tan angapo ni so saray bakal ed limog da; tan amin na saya a kaugsan so sinmabi ed saray totoo lapu ed intoluk da so inkasikara ed pakapanyari nen Satanas.

6 Tan saray tutuntonen ed oley so aderal, lapu ed saray maamot a pannununoñgan na saray kakaaro tan kakanayon na saraman so amatey ed saray profeta.

7 Tan sikara so señgegan na baleg a baliñgaan ed dalin, a dia ed onia saraman so matunong a kabiañgan na saray totoo so ñgalñgali la ra nanmaliw a marelmeng ya amin; on, wala balet so pigpigara a totoo a matunong ed limog da.

8 Dia ed onia angapo ni so anem taon a linmabas nanlapu ed say karaklan a kabiañgan na saray totoo so binmeneg nanlapu ed inkamatunong da, a siñga aso ed ota to, odino siñga baboy a mantitiblak ed pitek.

9 Natan saya a maamot a pannununoñgan, so añgawit na baleg a karelmeñgan ed saray totoo, nantitipon ira a dili a nanoolop, tan impasen da a pañgulo so sakey a too a sikato so tinawag da ed ñgaran a Jacob;

10 Tan sikato so tinawag da ya ari ra; dia ed ontan sikato so nanmaliw ya ari na saya a marelmeng ya olop; tan sikato so sakey ed saray sankaatageyan a pañgulo ya añgiter na voces to sumpa ed saray profeta a nampaneknek ed si Jesus.

11 Tan agawa a sikara so aliwa a mabiskeg ed bilang a siñga saray tribo na totoo, a sikara so nankakasakey likud lambeñgat ed saray pañgulo ra so añgiletneg ed saray gangan da, balang sakey unong ed tribo to; manwari ya ontan a sikara so nambobusolan; angaman ontan a sikara so aliwa a matunong a totoo, iñgen sikara so nankakasakey ed busol ed saraman so linmoob ed paknaan a manderal ed oley.

12 Dia ed ontan, si Jacob dia ed impakanengneng to a saray kabusol da so dakerakel nen say sikara, lapu ed sikato so ari na olop, dia ed ontan ingangan to ed saray totoo to a sikara so ombatik ed sankabaybayan a pasen na dalin, tan diman da ipaalagey so sakey a panarian ed inkasikara, anga ed akitipon ed sikara so saraman so sinmisian, (lapu ed sikato so nansagyat kanian dakel so saray sinmisian) tan manmaliw ira a magenap ed biskeg a mibaliñgaan ed saray tribo na saray totoo; tan saya so ginawa ra.

13 Tan ontan la so siglat na impankurang da kanian angapo so akasebel anga ed sikara so akaarawi ya ag la narandan na saray totoo. Tan dia ed onia so impansampot na komatalumplo a taon; tan onia so kipapasen na saray totoo nen Nephi.

14 Tan agawa dia ed komatalumplo tan sakey a taon sanen sikara so naapag-apag ed tribo, balang sakey a too unong ed boleg to, kakanayon tan kakaaro to; manwari ya ontan sikara so nampapaknaan ya ag ira onla ed bakal ed sakey tan sakey; balet ag ira nankasakey nipaakar ed saray gangan da, tan say kanengneñgan na panañgoley da, lapu ed sikara so niletneg unong ed kanunotan na saraman so pañgulo ra tan saray manañgilaman ed sikara. Balet sikara so añgiletneg na malet a gangan a say sakey a tribo so ag nayari ya onloob sumpa ed sananey, a dia ed onia awalaan ira na daiset a kareenan ed dalin; manwari ya ontan, saray puso ra imbeneg da ed Katawan a Dios da, tan tinutopak da so saray profeta tan sikara so pinagit da ed limog da.

15 Tan agawa a si Nephi—lapu ed sikato so dinalaw na saray angeles tan ontan met na say voces na Katawan, dia ed ontan lapu ed impakanengneng to ed saray angeles, tan tasi ed dili a mata to, tan lapu ed wala so pakapanyari a niiter ed sikato pian nakabatan to so nipaakar ed pampulong nen Cristo, tan lapu ed atasian to met ed dili a mata to so maples ya impoliktar da manlapu ed inkamatunong a paarap ed karelmeñgan tan karumsisan;

16 Dia ed ontan, lapu ed sikato so apaermen makaseñgeg ed inkaawet na saray puso ra tan inkabulag na saray kanunotan da—so linma ed limog da ed saman met lamlamang a taon, tan ginapoan to so mampaneknek, ya andi-takot, na pambabawi tan pamaandi na saray kasalanan ed panamegley na pananisia kinen Katawan Jesu Cristo.

17 Tan impulong to so dakel a beñgatla ed sikara; tan saraya ya amin so ag la nisulat, tan say kabiañgan to so ag ni ongenap, dia ed ontan saraya so ag nisulat ed saya a libro. Tan si Nephi so nampulong tekep na pakapanyari tan baleg a pakaoley.

18 Tan agawa a nampasnok ira ed sikato, lapu ed sikato so awalaan na babaleg a pakapanyari nen say sikara, tan ag nayari ya ag ira manisia ed saray salita to, agay la a kabaleg so pananisia to ed Katawan Jesu Cristo kanian saray angeles so nantalima ed sikato ed inagew-agew.

19 Tan dia ed ñgaran nen Jesus sikato so amagit na saray demonyo tan saray mauges ya espiritu; tan angan say agi to a laki so pinaoli to ed bilay a nanlapu ed saray inaatey, kayari a sikato so tinutopak da tan nanlikna na patey lapu ed saray totoo.

20 Tan saray totoo anengneng da, tan naimatonan da, tan mamapasnok ira ed sikato lapu ed pakapanyari to; tan sikato met so nangawa na dakel ni a milagro, ed imaton na saray totoo, ed ñgaran nen Jesus.

21 Tan agawa a say komatalumplo tan sakey a taon so linmabas, tan wala balet so pigpigara ya apasimbalo ed Katawan; balet no kaonoñgan so saray apasimbalo so peteg impatnag da ed saray totoo a sikara so dinalaw na pakapanyari tan Espiritu na Dios, a wala ed Jesu Cristo, a sikato so panisiaan da.

22 Tan no kaonoñgan so apapaway da a demonyo a nanlapu ed sikara, tan atambal ira ed saray sakit da tan saray bublay da, petepeteg da ya imparungtal ed saray totoo a sikara so tinuloñgan na Espiritu na Dios, tan sikara so atambal; tan impanengneng da met so saray pakapatnagan tan nangawa ra na milagro ed limog na saray totoo.

23 Dia ed onia met so inlabas na komatalumplo tan dua a taon. Tan si Nephi nampulong ed saray totoo ed ingapo na komatalumplo tan talo a taon; tan sikato so nampulong ed sikara na pambabawi tan pamaandi na kasalanan.

24 Natan labay ko a nunoten yo met, ya angapo so saray naawit ed pambabawi ya ag ira abiniagan ed danum.

25 Dia ed ontan, wala so saray inordinan nen Nephi, a lalaki ya onkana ed saya a panagpulong, pian amin ya ondago ed sikara so nabiniagan ed danum, tan saya so sakey a tasi tan sakey a paneknek ed arap na Dios, tan ed saray totoo, a sikara so nambabawi tan inawat da so pamaandi na saray kasalanan da.

26 Tan wala so dakel dia ed ingapo na saya a taon so abiniagan onkana ed pambabawi; tan dia ed onia say babaleg a kabiañgan na taon so linmabas.