1 Tan agawa a sikara so ginangan to ya isulat da so saray salita ya initer na Ama ed si Malakias, a saraya so ibaga to ed sikara. Tan agawa a kayari na saraya so nisulat saraya so impaliwawa to ed sikara. Tan saraya so salita ya imbaga to ed sikara, a kuan to: Onia so inkuan na Ama ed si Malakias:—Nia, igangan ko so ibabakik, tan iparaan to so dalan sakbay ed siak, tan say Katawan a sikato so aanapen yo so bigla ya onsabi ed templo to, angan say ibabaki ed saman a paknaan, a sikato so panliketan yo; nia, sikato so onsabi, kuan na Katawan na saray Ejercito.

2 Balet siopa so makapiandoan ed agew na isabi to, tan siopa so ontalindeg no sikato la so omparungtal? Lapu ed sikato so siñga apoy na manag-ori, tan siñga sabon a panaglinis.

3 Tan sikato so onyurong a siñga sakey a manag-ori tan managpadalisay ed pilak; tan padalisayen to so saray lalaki ya anak nen Levi, tan linisan to ra a siñga balitok tan pilak, pian isaklang da ed Katawan so bagat na inkamatunong.

4 Dia ed ontan say bagat na Juda tan Jerusalem so makaroyruyo ed Katawan, a siñga nen saray agew ya inmuna, tan siñga saray imbebeneg la a taon.

5 Tan siak so onasinger ed sika dia ed panañgokom; tan siak so maples a tasi sumpa ed saray maanito, tan sumpa ed saray mikakaloguran, tan sumpa ed saray aliwa a tua a managsamba, tan sumpa ed saray managsaol ed upa na saray mioupa, saray balo a bibii tan saray angapo so ama, tan saman so ag mañgawat ed say sankaili, tan ag da ak tatakotan, inkuan na Katawan na saray Ejercito.

6 Lapu ed siak so Katawan, ag ak mañguuman, dia ed ontan sikayo a lalaki ya anak nen Jacob ag kayo naupot.

7 Iñgen nanlapu la ed agew na kaamaan yo sikayo la so sinmian ed saray pananuntonan ko, tan saraya so ag yo sinumpal. Pawil kayo ed siak tan ompawil ak ed sikayo, kuan na Katawan na saray Ejercito. Balet ikuan yo: Iner kasi so pawilan mi?

8 Say too takewan to kasi so Dios? Iñgen siak so tinakewan yo. Balet ikuan yo: Iner so nantakewan mi ed sika? Dia ed kakaplo tan ed saray bagat.

9 Sikayo so naayew na sakey ya ayew, lapu ed tinakewan yo ak, angan saya a tibukel a bansa.

10 Awit yo ya amin so saray kakaplo ed kamalir ko, pian wala so tagano ed abong ko; tan subok yo ak natan, inkuan na Katawan na saray Ejercito, no kasi ag ko lukasan so saray duroñgawan na tawen, tan iter ko ed sikayo so sakey a bendicion ya angapo so magenap a pasen a pañgawatan yo ed saya.

11 Tan sumpaen ko so saray maagom onkana ed pankaabigan yo, tan ag to deralen so saray buñga na dalin yo; ni saray tanaman yo a nanwakal so mañgiter ira na bunga ed ag-panaon ed saray kaalugan, inkuan na Katawan na saray Ejercito.

12 Tan amin a bansa so ontawag ed sika na mapalar, lapu ed sika so sakey a makaruyo a dalin, inkuan na Katawan na saray Ejercito.

13 Saray salitam so masebeg sumpa ed siak, inkuan na Katawan. Iñgen ikuan mo: Anto so saray sinalita mi sumpa ed sika?

14 Sika so nankuan: Angapo so kana na panlingkor ed Dios, tan anto so gungona a sinumpal mi so saray pananuntonan to tan sikami so nankurang a sieermen ed arap na Katawan na saray Ejercito?

15 Tan natan tawagen mi so saray mankinon a maliket; on, saraman so mankikimey ed karelmeñgan so nipatalindeg; on, saraman so tuksoen da so Dios iñgen sikara so nilaban.

16 Dia ed saman saraman so antakot ed Katawan sikara so mabetbet a mantotungtong ed sakey tan sakey, tan say Katawan tinalineng to tan nandñgel; tan sakey a libro na pakanodnunotan so nisulat ed arap to nipaakar ed saraman so antakot ed Katawan, tan saraman so manunot ed ñgaran to.

17 Tan sikara so kayarian ko, inkuan na Katawan na saray Ejercito, dia ed saman ya agew sano gawaen ko so saray alahas ko; tan sikara so iligyas ko a siñga sakey a too ya iligyas to so dili ya anak to a manlilingkor ed sikato.

18 Dia ed ontan sikayo so ompawil tan ibiig yo so saraman so matunong tan say makasalanan, saraman so manlilingkor ed Dios tan saray ag manlingkor ed sikato.