1 Tua, tua, ikuan ko a mamayabol kayo ed saray duka; balet manalwar kayo ya ag yo gawaen so mamayabol ed arap na saray totoo pian nanengneng da kayo; odino andi angapo so gungona yo ed Ama yo a wala ed tawen.

2 Dia ed ontan, no sikayo so mamayabol ag yo patatanolen so trompeta ed arap yo, a siñga gagawaen na saray mansimpisimpitan ed dalem na saray sinagogas tan dia ed saray dalan, pian sikara so idayew na saray totoo. Tua ikuan ko ed sikayo, naawat da la so tumang da.

3 Balet sano sikayo so mamayabol ag yo paulyanan a say lima yo a kawigi nakabatan to so ginawa na lima yo a kawanan;

4 Pian saray impayabol yo so maamot; tan say Ama yo a makakanengneng ed maamot, sikato a dili so mañgiter na gungona yo a mapalaway.

5 Tan sano sikayo so mampikasi ag yo aaligen so saray mansimpisimpitan, tan kaliktan da so mampikasi, a manalalagey ed saray sinagogas tan dia ed suyok na saray dalan, pian nanengneng ira na saray totoo. Tua ikuan ko ed sikayo, naawat da la so tumang da.

6 Balet sikato, sano mampikasi kayo, loob kayo ed dalem na kuarto yo, tan sano nikapot yo la so puerta, mampikasi kayo ed Ama yo a sikato so maniimaton ed maamot; tan say Ama yo, a maniimaton ed maamot, iter to so gungona yo a mapalaway.

7 Balet sano mampikasi kayo, ag yo ikakana so andi-kakanaan a paulit-ulit, a siñga saray angapo so pikakabat da ed Dios, tan say wala ed kanunotan da sikara so nareñgel lapu ed dakel a panagsalita ra.

8 Ag kayo sirin miaalig ed sikara, lapu ed say Ama yo amta to no anto so saray beñgatla a nakaukolan yo sakbay a kerewen yo ed sikato.

9 Dia ed onia a kanengneñgan mampikasi kayo: Ama mi a wala ed tawen, nagalang so ñgaran mo.

10 Nagawa so linawam dia ed dalin a siñga unong ed tawen.

11 Tan paandien mo so saray utang mi, a siñga panamaandi mi ed saray akautang ed sikami.

12 Tan ag mo kami ipaarap ed tukso, balet ilaban mo kami ed mauges.

13 Lapu ed kayarian mo so panarian, tan say pakapanyari, tan say gloria, ed ando la ya ando. Amen.

14 Tan, no pirdonaen yo so saray totoo ed impankasalanan da say Mañgatatawen ya Ama yo pirdonaen to kayo met;

15 Balet no ag yo pirdonaen so impankasalanan na saray totoo ni say Ama yo ag to pirdonaen so saray kasalanan yo.

16 Nagkalalo ni, no sikayo so manayuno ag yo aaligen so saray mansimpisimpitan, a maermen so awawey da, tan umanen da so nengneng na lupa ra pian siñga say pakanengneng na saray totoo sikara so manaayuno. Tua ikuan ko ed sikayo, naawat da la so tumang da.

17 Balet sikayo, sano manayuno kayo, lanaan yo so ulo yo, tan dilamosan yo so lupa yo;

18 Pian say kanengneñgan yo ed saray totoo so ag kayo manaayuno, balet dia ed Ama yo, a sikato so maniimaton a maamot; tan say Ama yo, a makakanengneng ed maamot, tumañgan to kayo a mapalaway.

19 Ag kayo mantitipon ed inkasikayo na saray kayamanan ed dalin, no iner wala so gamugamo tan lati a manderal, tan saray matatakew ya onloob tan mantakew;

20 Balet mantipon kayo ed inkasikayo na kayamanan ed tawen, a diman angapo so gamugamo tan lati a manderal, tan diman angapo so saray matatakew ya onloob odino mantakew.

21 Tan no iner so kawalaan na saray kayamanan yo, diman met so kawalaan na puso yo.

22 Say liwawa na laman say mata; no, dia ed ontan, say mata yo so ipasakey, say amin a laman yo napano na liwawa.

23 Balet no say mata yo so mauges, say amin a laman yo napano na biluñget. No, dia ed ontan, say liwawa a wala ed sika yo ambiluñget, agay la so kabaleg na saman a biluñget!

24 Angapo so too a makapanlingkor ed duara ya amo; tan balang la a busolen to so sakey tan aroen to so sakey, odino ag mansiansia ed sakey tan balawen to so sakey. Ag yo nayarian so manlingkor ed Dios tan Mammon.

25 Tan natan agawa a sanen si Jesus imbalikas to so saraya a salita sikato so ninmengneng ed saray labindua a pinili to, tan inkuan to ed sikara: Tandaan yo so saray salita ya imbalikas ko ed sikayo. Tan nia, sikayo so pinilik a mantalima ed saya a totoo. Dia ed ontan ikuan ko ed sikayo, ag yo nonunoten so bilay yo, no anto so kanen yo, odino anto so inomen yo; ni say onkana ed laman yo, no anto so isulong yo. Ag kasi say bilay mabli nen say naakan, tan say laman nen say kawes?

26 Nengneng yo so saray manok a wala ed liwang, saraya so ag mantatanem, ni say saraya so manaani ni say mantitipon ed saray kamalir; iñgen say Mañgatatawen ya Ama papakanen to so saraya. Ag kasi magmaong kayo ni nen say saraya?

27 Siopa ed sikayo a mannunot so makaarum na sakey a getget ed alagey to?

28 Tan akin mapaga kayo ed isulong yo? Nengneng yo so kipapasen na saray lirio ed uma no panon so itotubo ra; ag ira mansasagpot, ni say sikara so manaabel;

29 Tan iñgen ikuan ko ed sikayo, ya angan si Solomon, dia ed amin a gloria to, sikato so ag akawesan na marakep a siñga sakey ed saraya.

30 Dia ed ontan, no say Dios kinawesan to so saray dika ed alog, dia ed saya ya agew wala, tan dia ed kaimbuasan sikara so nibantak ed pugon, angan ontan say sikayo so kawesan to, no aliwa a melag so pananisia yo.

31 Dia ed ontan ag kayo mapaga, ya ikuan yo, Anto kasi so kanen mi? odino, Anto kasi so inomen mi? odino, Iner kasi so pañgalaan mi na isulong mi?

32 Tan say Mañgatatawen ya Ama yo amta to so amin a pankaukolan yo ed amin na saraya a beñgatla.

33 Balet anap yo ni ya ununa so panarian na Dios tan say inkamatunong to, tan saraya ya amin a beñgatla so onarum ed sikayo.

34 Ag kayo sirin mapaga nipaakar ed kaimbuasan, lapu ed say kaimbuasan ag to nunoten so saraya a beñgatla ed inkasikato. Magenap la so saya ya agew nipaakar ed uges to.