1 Tan natan agawa a sanen si Jesus asalita to so saraya a beñgatla sikato so nampaliwawa ed saray karaklan; tan impaliwawa to so amin a beñgatla ed sikara, mandapag a baleg tan melag.

2 Tan inkuan to: Saraya a masanto a kasulatan, ya angapo ni ed sikayo, say Ama ingangan to ya iter ko ed sikayo; lapu ed kakabatan ed sikato a saya so niiter ya onkana ed saray mantumbok a kailalakan.

3 Tan impaliwawa to so amin a beñgatla, angan manlapu ed gapo ya anga ed saman so panaon a sikato so onsabi ed gloria to—on, angan amin a beñgatla ya onsabi ed tapew na dalin, angan saray elemento so natunaw ed mapalalo a petang, tan say dalin nalukot a siñga papil, tan say tawen tan say dalin so naandipat;

4 Tan angan dia ed makabaliksan tan sampot ya agew, sano amin a totoo, tan amin a sankakanayon, tan amin a bansa tan salita so ontalindeg ed arap na Dios, pian sikara so naokom ed saray kimey da, no saraya so maong odino saraya so mauges—

5 No sikara so maong, dia ed kioli ed andi-angaan a bilay; tan no saraya so mauges, dia ed kioli ed kadederal; dia ed pañgipareng, say sakey dia ed sakey a lima tan say sakey dia ed biek a lima, unong ed panañgasi, tan say kaptekan, tan say inkasanto a wala ed Cristo, a wala la kasakbayan na gapo na mundo.

6 Tan natan ag nisulat ed saya a libro so angan say kakalasus a kabiañgan na saray beñgatla a si Jesus petepeteg ya imbañgat to ed saray totoo;

7 Balet nia saray piligo nen Nephi diman nilugan so lalo a dakel a kabiañgan na saray beñgatla ya imbañgat to ed saray totoo.

8 Tan saraya a beñgatla ya insulat ko, saraya so daiset a kabiañgan na saray beñgatla ya imbañgat to ed saray totoo; tan saraya so insulat ko ed gagala pian komon naawit lamet ed saya a totoo, manlapu ed saray Gentiles, unong ed saray salita a sinalita nen Jesus.

9 Tan sano saya so naawat da la, a saya so nakaukolan a wala ed sikara ya ununa, a pansubok ed pananisia ra, tan no bilbilang sisiaen da so saraya a beñgatla dia ed ontan saray babaleg a beñgatla so iparungtal ed sikara.

10 Tan no bilbilang nagawa ya ag ira manisia ed saraya a beñgatla, dia ed ontan saray babaleg a beñgatla so nikibot ed sikara, ya onkana ed kadusa ra.

11 Nia, ñgalñgalik la isulat so saraya, amin a nitatak ed piligo nen Nephi, balet say Katawan sinebelan to ak, ya inkuan to: Salien ko a suboken so pananisia na saray totook.

12 Dia ed ontan siak, Mormon, insulat ko so saray beñgatla ya ingangan ed siak na Katawan. Tan natan siak, Mormon, sampotan ko la so pansasalitak, tan ituloy ko la ya isulat so saray beñgatla a nigangan ed siak.

13 Dia ed ontan, pilalek ko a nanengneng yo a say Katawan petepeteg ya imbañgat to so saray totoo, ed loob na talora ya agew; tan kayari ed saman mabetbet la ya impanengneng to so inkasikato ed sikara, tan nampisag na tinapay a mabetbet, tan binendicionan to so saya, tan initer to ed sikara.

14 Tan agawa a sikato so nambañgat tan nampulong ed saray anak na saray karaklan a sikara so asalita la, tan pinalokak to so saray dila ra, tan sikara so nansalita ed saray ama ra na saray makana tan makapakelaw a beñgatla, angan babaleg ni nen say imparungtal to ed saray totoo; tan pinalokak to so saray dila ra kanian makapansalita ra.

15 Tan agawa a kayari na intukutok to ed tawen—ed komadua ya impampanengneng to ed inkasikato ed sikara, tan sikato so linma ed Ama, kayari to a tinambal so amin a mansasakit da, tan saray lopoy da, tan nilukasan to so mata na saray bulag, tan inekal to so pepet na layag na saray telek, tan angan ginawa to so amin a nengneng na panagtambal ed limog da, tan pinaoli to ed bilay so sakey a too a nanlapu ed saray inaatey, tan impanengneng to so pakapanyari to ed sikara, tan sikato so tinmukutok ed Ama—

16 Nia, agawa a dia ed kaimbuasan saray karaklan so nantitipon ira ed inkasikara, tan mandapag ya anengneng tan nadñgel da so saraya ya ugogaw; on, angan saray mansuso ya ugogaw binisuat da so sañgi ra tan sikara so nambalikas na saray makapakelaw a beñgatla; tan saray beñgatla ya imbalikas da so nisebel ya angapo so siopaman a too a mañgisulat ed saraya.

17 Tan agawa a saray disipulos a pinili nen Jesus ginapoan da nanlapu ed saman a panaon so mambiniag tan mambañgat ed no kaonoñgan karakel so saray onla ed sikara; tan no kaonoñgan karakel so saray abiniagan ed ñgaran nen Jesus sikara so napno na Espiritu Santo.

18 Tan dakel ed sikara so akanengneng tan akareñgel ed saray ag nayari a bitlaen a beñgatla, a saraya so ag makatunoñgan ya isulat.

19 Tan sikara so nambañgat, tan nampulong ed sakey tan sakey; tan amin a beñgatla so nampapara ed sikara, balang sakey a too maptek so pililimog to, ed balang sakey tan sakey.

20 Tan agawa a sinumpal da so amin a beñgatla angan unong ed ingangan nen Jesus ed sikara.

21 Tan saraman so abiniagan ed ñgaran nen Jesus so atawag a simbaan nen Cristo.