1 Tan agawa a sanen si Jesus so tinmukutok ed tawen, say karaklan nambubuyak la ra, tan balang sakey a laki inala to so asawa to tan saray anak to tan amawil la ra ed dili ya abong da.

2 Tan nipalapag a tampol ed paway na limog na saray totoo, sakbay na insabi na biluñget, a say karaklan anengneng da si Jesus, tan sikato so nampulong ed sikara, tan ipanengneng to lamet so inkasikato ed kaimbuasan ed saray karaklan.

3 On, tan angan legan na sanlabi nipalapag ed paway so nipaakar ed si Jesus; tan lapu ed saya impakabat da ed saray totoo a wala so dakel, on, mapalalo a baleg a bilang, so nansagpot a mapalalo ed saman a sanlabi, pian dia ed kaimbuasan sikara so makaakar ed pasen a pañgipanengneñgan nen Jesus ed inkasikato ed saray karaklan.

4 Tan agawa a dia ed kaimbuasan, sanen saray karaklan so nantitipon ed inkasikara, nia, si Nephi tan si agi to a pinaoli to ed bilay a nanlapu ed saray inaatey, a say ñgaran to Timothy, tan ontan met ed anak to a laki, a say ñgaran to Jonas, tan ontan met nen Mathoni, tan Mathonihah, ya agi to, tan si Kumen, tan si Kumenonhi, tan si Jeremiah, tan si Shemnon, tan si Jonas, tan si Sedekias, tan si Isaiah—natan saraya so kañgaranan na saray disipulos a pinili nen Jesus—tan agawa a sikara so linma tan sikara so nanalagey ed pegley na saray karaklan.

5 Tan nia, agay la a karakel so saray karaklan kanian nakaukolan so inkaapag da ya impanlabindua ya olop.

6 Tan saray labindua binañgatan da so saray karaklan; tan nia, ingangan da so saray karaklan ya ontalimukor ed dalin, tan sikara so mampikasi ed Ama ed ñgaran nen Jesus.

7 Tan saray disipulos so nampikasi ed Ama met ed ñgaran nen Jesus. Tan agawa a sikara so inmalagey tan sikara so nampulong ed saray totoo.

8 Tan sanen nipulong da so saraman met lamlamang so salita ya imbalikas nen Jesus—ya angapo so niduma ed saray sinalita nen Jesus—nia, sikara so tinmalimukor lamet tan nampikasi ra ed Ama ed ñgaran nen Jesus.

9 Tan sikara so nampikasi onkana ed saman so mapeget a pilalek da; tan nampilalekan da a say Espiritu Santo so niiter ed sikara.

10 Tan sanen dia ed onia a sikara so akapampikasi sikara so linma a linmasur ed tambib na danum tan sikara so tinumbok na karaklan.

11 Tan agawa a linmasur si Nephi ed danum tan sikato so abiniagan.

12 Tan sikato so linmimwas ed danum tan ginapoan to so mambiniag. Tan bininiagan to ya amin so saraman so pinili nen Jesus.

13 Tan agawa a sanen abiniagan la ra ya amin tan linmimwas ira a nanlapu ed danum, say Espiritu Santo so dinmapo ed sikara, tan sikara so napno na Espiritu Santo tan apoy.

14 Tan nia, sikara so aliktob na siñga apoy; tan saya so linmeksab a nanlapu ed tawen, tan say karaklan anengneng da so saya, tan tinasian da; tan saray angeles so linmeksab a nanlapu ed tawen tan nantalima ed sikara.

15 Tan agawa a legan a saray angeles so mantatalima ed saray disipulos, nia, si Jesus sinmabi tan nanalagey ed pegley da tan nampulong ed sikara.

16 Tan agawa a sikato so nansalita ed saray karaklan, tan ingangan to ed sikara ya ontalimukor ira lamet ed dalin, tan ontan met ed saray disipulos to so ontalimukor ed dalin.

17 Tan agawa a sanen akatalimukor la ra ya amin ed dalin, ingangan to ed saray disipolos to a sikara so mampikasi.

18 Tan nia, ginapoan da so mampikasi; tan sikara so nampikasi ed si Jesus, a sikato so tinawag da a Katawan da tan Dios da.

19 Tan agawa a si Jesus so tinmaynan ed otel da, tan sikato so inmarawi na daiset ed sikara tan intewek to so inkasikato ed dalin, tan inkuan to:

20 Ama, misasalamat ak ed sika lapu ed initer mo so Espiritu Santo ed saraya so pinilik; tan saya lapu ed pananisia ra ed siak kanian sikara so pinilik ed mundo.

21 Ama, mikasi ak ed sika ya iter mo so Espiritu Santo ed amin a manisia ed saray salita ra.

22 Ama, initer mo ed sikara so Espiritu Santo lapu ed manisia ra ed siak; tan anengneng mo a manisia ra ed siak lapu ed sikara so sankareñgel mo, tan sikara so mampipikasi ed siak; tan sikara so mampipikasi ed siak lapu ed siak so kaiba ra.

23 Tan natan Ama, mampikasi ak ed sika onkana ed sikara, tan amin met na saray manisia ed saray salita ra, pian komon sikara so manisia ed siak, pian siak komon so wala ed sikara a siñga sika, Ama, so wala ed siak, pian sikatayo so saksakey.

24 Tan agawa a sanen si Jesus so nampikasi na onia ed Ama, sikato so linma ed saray disipulos to, tan nia, sikara ni so nampatuloy, ya andi-tonda, a mampipikasi ed sikato; tan ag ira nanulit-ulit na salita, lapu ed niiter to ed sikara no anto so ipikasi ra, tan sikara so napno na pampilalek.

25 Tan agawa a si Jesus binendicionan to ra legan a mikakasi ra ed sikato; tan say awawey to so manimimis ed sikara, tan say liwawa na kanengneñgan to so añgiter na sinag ed sikara, tan nia, say kanengneñgan da so binmosilak a puti tan ontan met ed sulong nen Jesus; tan nia say kinaputi da ra nia so pinalabsanan to so amin a puti, on, tan angapo dia ed dalin so nayari a pañgipareñgan ed kinaputi da ra nia.

26 Tan si Jesus inkuan to ed sikara: Mampikasi kayo; manwari ya ontan sikara so ag tinmonda a mampipikasi.

27 Tan sikato so binmeneg ed sikara lamet, tan inmarawi na daiset tan intewek to so inkasikato ed dalin; tan sikato so nampikasi lamet ed Ama, a nankuan:

28 Ama, misasalamat ak ed sika lapu ed pinadalisay mo so saray pinilik, makaseñgeg ed pananisia ra, tan sikara so pikakasik, tan ontan met ed saray manisia ed saray salita ra, pian sikara komon so napadalisay ed siak, ed panamegley na pananisia ra ed saray salita ra, angan unong a sikara so apadalisay ed siak.

29 Ama, ag ko pikasi so mundo, balet onkana ed saraman so initer mo ed siak a nanlapu ed mundo, lapu ed pananisia ra, pian sikara so napadalisay ed siak, pian siak komon so wala ed sikara a siñga sika, Ama, so wala ed siak, pian sikatayo komon so saksakey, pian siak komon so nigloria ed sikara.

30 Tan sanen si Jesus nibalikas to so saraya a salita sikato lamet so inmasinger ed saray disipulos to; tan nia sikara so nampikasi ya ag-nagiing, ya andi-tonda, ed sikato; tan sikato so inmimis ed sikara lamet; tan nia sikara so amputi, iñgen a siñga si Jesus.

31 Tan agawa a sikato lamet so inmarawi na daiset ed sikara tan nampikasi ed Ama;

32 Tan say dila ag to nayarian ya ibalikas so saray salita na pikakasi to, ni say nisulat na too so saray salita ya impampikasi to.

33 Tan saray karaklan areñgel da tan tasian da; tan alukasan so saray puso ra tan atalusan da ed dalem na saray puso ra so saray salita na pikakasi to.

34 Manwari ya ontan, agay la so kabaleg tan makapakelaw so saray salita ed pikakasi to ya ag nisulat, ni say nayari a bitlaen na too.

35 Tan agawa a sanen si Jesus sinampotan to la so pampipikasi to linma lamet ed saray disipulos, tan inkuan to ed sikara: Agay la so kabaleg na pananisia yo ya ag ko ni kapiganman anengneng ed limog na amin na saray Judio; lapu ed ontan ag ko nipanengneng ed sikara so ontan la ya ankakabaleg a milagro, lapu ed ag da pananisia.

36 Tua ikuan ko ed sikayo, angapo ed sikara so akanengneng na ontan la a kinabaleg ira a beñgatla a siñga anengneng yo; ni say akareñgel ira na ontan la a kabaleg a beñgatla a siñga nadñgel yo.