1 Tan tua ikuan ko ed sikayo, iter ko ed sikayo so sakey a pakapatnagan, pian naamtaan yo no panaon sano saraya a beñgatla so asinger la a nagawa—a tiponen ko, manlapu ed abayag ya inkabuybuyak da, so saray totook, O kailalakan na Israel, tan iletneg ko lamet ed limog da so Sion ko;

2 Tan nia, saya so beñgatla ya iter ko ed sikayo a pakapatnagan—tan tua ikuan ko ed sikayo sano saraya a beñgatla a sinalitak ed sikayo, tan saraya so salitaen ko kayari to nia nipaakar ed siak a dili, tan dia ed pakapanyari na Espiritu Santo ya iter ed sikayo na Ama, so nipakabat ed saray Gentiles pian nakabatan da komon so nipaakar ed saya a totoo a sikara so nakdaan ed kailalakan nen Jacob, tan nipaakar ed saya a totoo a natayak lapu ed sikara;

3 Tua, tua, ikuan ko ed sikayo, sano saya a beñgatla so nipakabat ed sikara ed panamegley na Ama, tan saya so manlapu ed Ama, manlapu ed sikara ya onla ed sikayo;

4 Lapu ed kakabatan ed Ama a sikara so iletneg ed saya a dalin, tan sikara so nipatalindeg a sakey a totoo a wala so kawayañgan dia ed pakapanyari na Ama, pian saraya a beñgatla so manlapu ed sikara ya onla ed saray nakdaan ed boleg yo, pian say paknaan na Ama komon so nasumpal ya impipaknaan to ed saray totoo to, O kailalakan na Israel;

5 Dia ed ontan, sano saraya a kimey tan saray kimey ni ya onsabi ed limog yo manlapu ed natan a saya so onsabi manlapu ed saray Gentiles, ya onla ed saray boleg yo a sikara so onlasay ed ag-pananisia lapu ed karelmeñgan;

6 Tan dia ed onia manepeg ed Ama a saya so manlapu ed saray Gentiles, pian nipanengneng to so pakapanyari to ed saray Gentiles, lapu ed saya saray Gentiles, no ag da paaweten so saray puso ra, pian sikara so mambabawi tan ondago ed siak tan sikara so nabiniagan ed ñgaran ko tan nakabatan da so saray tua a kabiañgan na doctrinak, pian sikara so nibilang ed limog na saray totook, O kailalakan na Israel;

7 Tan sano saraya a beñgatla so nagawa saray boleg yo so ongapo a nakabatan da so saraya a beñgatla—saya so onkana a sakey a pakapatnagan ed sikara, pian nakabatan da a say kimey na Ama ginmapo la so pakasumpal na paknaan a ginawa to ed saray totoo a sikara so wala ed kailalakan na Israel.

8 Tan sano saman ya agew so onsabi, nagawa a saray arari kupiten da so saray sañgi ra; lapu ed saman so ag da ni imbaga ed sikara so nanengneng da; tan saman so ag da ni areñgel so simbañgen da.

9 Tan dia ed saman ya agew, lapu ed siak say Ama kimeyan to so sakey a kimey, a saya so sakey a makana tan makapakelaw a kimey ed limog da; tan wala ed limog da so saray ag manisia ed saya, angaman sakey a too so mañgibaga na saya ed sikara.

10 Balet nia, say bilay na igangan ko wala ed limak; dia ed ontan sikato so ag da sakitan, angaman sikato so nasakitan lapu ed sikara. Iñgen sikato so tambalen ko, lapu ed labay ko ya ipanengneng ed sikara a say kakabatan ko so balbaleg nen say kasiliban na demonyo.

11 Dia ed ontan nagawa a siopaman ya ag manisia ed saray salitak, a siak si Jesu Cristo, a ginangan na Ama a siak so mañgawit ed saray Gentiles, tan iter to ed sikato so pakapanyari pian saraya so awiten to ed saray Gentiles, (saya so nagawa angan unong ed imbaga nen Moises) sikara so nataksing ed limog na saray totook a wala ed paknaan.

12 Tan saray totook a sikara so nakdaan ed si Jacob so wala ed limog na saray Gentiles, on, dia ed otel da a siñga sakey a leon ed limog na saray monanakap ed katakelan, siñga sakey a malangwer a leon ed limog na olop na saray karnero, a saya, no sikato so onselek mandapag a gatinan to ra tan pisay-pisayen to ra ya ankekelag, tan angapo so mañgiagel.

13 Saray lima ra so itagey da ed saray kalaban da, tan amin a saray kabusol da so nataksing.

14 On, abagey so saray Gentiles likud no sikara so mambabawi; tan nagawa ed saman ya agew, inkuan na Ama, a pateyen ko so saray kabayom a manlapu ed otel mo, tan deralen ko so saray karwahem;

15 Tan deralen ko so saray ciudad ed dalin mo, tan ibantak ko ya amin so saray salimbeñgan mo;

16 Tan taksiñgen ko so silib na manananem ed dalin mo, tan angapo la so saray manamarles;

17 Taksiñgen ko met so saray talintaom, tan saray akatalindeg a talintao ed otel mo, tan ag mo la igalang so kimey na saray limam;

18 Tan batañgen ko so saray kakiewan ed otel mo; tan deralen ko so saray ciudad mo.

19 Tan nagawa ya amin a panagtila, tan panagpalikdo, tan panagibeg, tan busolan, tan kasiliban na sacerdote, tan inkabalangkantis, so naandi.

20 Tan nagawa, inkuan na Ama, a dia ed saman ya agew siopaman ya ag mambabawi tan ondago ed Inararok ya Anak, sikara so taksiñgen ko manlapu ed limog na saray totook, O kailalakan na Israel;

21 Tan gawaen ko so panagbales tan sanok ko ed sikara, angan siñga dia ed saray ag-abiniagan, a siñga ag ni nadñgel.

22 Balet no sikara so mambabawi tan ondeñgel ed saray salitak, tan ag da paaweten so saray puso ra, iletneg ko so simbaan ko ed limog da, tan sikara so onloob ed paknaan tan nibilang ira ed limog na saya a nakdaan nen Jacob, a dia ed sikara so añgiteran ko ed saya a dalin a tawiren da;

23 Tan tuloñgan da so saray totook, say nakdaan nen Jacob, tan ontan met no kaonoñgan kinarakel ed kailalakan na Israel so onsabi, pian ipaalagey da so sakey a ciudad, a saya so natawag a Balo a Jerusalem.

24 Tan dia ed ontan sikara so ontulong ed saray totook pian sikara so natipon, saraman so nitaytayak ed amin a tapew na dalin, dia ed loob na Balo a Jerusalem.

25 Tan dia ed ontan say pakapanyari na tawen onlasur ed limog da, tan Siak met so wala ed limog da.

26 Tan dia ed ontan, ongapo so kimey na Ama ed saman ya agew, angan sano saya ya evangelio so nipulong ed limog na nakdaan ed saya a totoo. Tua ikuan ko ed sikayo, dia ed saman ya agew say kimey na Ama ongapo ed limog na amin ya ataytayak a totook, on, angan saray tribo ya abalang, a sikara so inwanwan na Ama ya ompaway ed Jerusalem.

27 On, say kimey ongapo ed limog na saray ataytayak a totook, a kaiba so Ama a mañgiparaan na dalan pian dia ed saya sikara komon so ondago ed siak, pian ontawag ira ed Ama dia ed ñgaran ko.

28 On, tan dia ed ontan say kimey so ongapo, a kaiba so Ama ed limog na amin a bansa a mañgiparaan na dalan pian dia ed saya saray totoo so natipon ya onsempet ed dalin a tawir da.

29 Tan sikara so ompaway manlapu ed amin a bansa; tan sikara so ag maganat ya ompaway, odino ombatik, lapu ed siak so onla ed unaan da, inkuan na Ama, tan siak so wala ed benegan da.