1 Ināianei ā i pahawa ake, nā, i huihui tahi mai tētahi whakaminenga nunui, o te iwi o Nīwhai, taiāwhio noa i te temepara i tū ai i te whenua o Mōmona; ā, i te mīharo, ā, i te māharo rātou tētahi ki tētahi, ā, i te whakaatu atu rātou ki a rātou anō te whakarerekētanga nui whakamīharo kua heipū ake nei.

2 Ā, i te kōrerorero tahi rātou anō mō tēnei Ihu Karaiti, mōna nei, i homai ai te tohu e pā ana ki tōna matenga.

3 Ā, i pahawa ake, nā, i a rātou e kōrerorero tahi pēnei ana tētahi ki tētahi, ka rongo rātou i tētahi reo me te mea nei e ahu mai ana i te rangi; ā, ka whiu atu rātou i ō rātou karu huri noa, nā te mea kīhai rātou i mārama ki te reo i rangona ai e rātou; ā, ehara ia i te reo kaha, ehara rānei ia i te reo nui; heoi ahakoa he iti noa te reo, i werohia te hunga i rongo ai ki te pokapū, nā konā kāore he wāhi o ō rātou tīnana kīhai i meinga kia tūoioihia e te reo; āe rā, ka werohia rātou ki te tino wairua, ā, ka meinga ō rātou ngākau kia mumura ai.

4 Ā, i pahawa ake, nā, ka rongo anō rātou i te reo, ā, kīhai rātou i mārama.

5 Hei āpiti anō ka rongo anō rātou i te reo mō te wā tuatoru, ā, ka oko i ō rātou taringa kia rongo ai; ā, ka aro atu i ō rātou karu whakateputanga mai o tō reira reo; ā, ka mātai whakaterangi atu rātou, ki te wāhi i puta mai ai te reo.

6 Ā nana, ka mārama rātou ki te reo i rangona ai e rātou i te putanga tuatorutanga; ā, i mea atu nei ki a rātou:

7 Nana e taku Tama Aroha, ko tāku i āhuareka atu ai, nāna rā hoki i whai korōria ai tōku ingoa—whakarongo koutou ki a ia.

8 Ā, i pahawa ake, i a rātou e mārama ana ka whiua reretia ake ō rātou karu anō ki te rangi; ā nana, ka kite rātou i tētahi tangata e heke iho ana i te rangi; ā, he kahu mā tōna; ā, ka heke iho ia, ā, ka tū ki waenganui i a rātou; ā, kua aro katoa atu ngā karu katoa o te whakaminenga ki runga ki a ia, kāore rātou i māia kia puare i ō rātou māngai, tētahi ki tētahi anō, ā, kīhai i mōhio ki tōna tikanga, nā te mea i whakaaro ake rātou he anahera tērā kua puta mai ki a rātou.

9 Ā, i pahawa ake, nā, ka toro atu ia i tōna ringa, ā, ka kōrero atu ki te iwi, e mea ana:

10 Nana, ko Ihu Karaiti ahau, te mea i whakaatuhia mai nei e ngā poropiti e puta mai ai ki te ao.

11 Ā nana, ko au te māramatanga me te oranga o te ao; ā, kua inu au i te kapa kawa i homai ai e te Matua ki ahau, ā, kua whakakorōriatia te Matua i taku pikaunga ki runga i ahau ngā hara o te ao, i reira au mea ai i tā te Matua i pai ai i roto i ngā mea katoa mai i te tīmatanga.

12 Ā, i pahawa ake, nā, ka hinga iho te whakaminenga katoa ki te whenua i te kōrerotanga a Ihu i ēnei kupu; nā te mea i mahara rātou kua poropititia ki waenganui i a rātou, nā, ka whakakite te Karaiti i a ia anō ki a rātou whai muri iho i tana kakenga ake ki te rangi.

13 Ā, i pahawa ake, nā, ka kōrero atu te Ariki ki a rātou e mea ana:

14 Whakatika ake, ā, haere mai ki ahau, kia kuhua ai e koutou ō koutou ringaringa ki tōku kaokao, kia whāwhāngia anō hoki e koutou ngā ngaunga o ngā nēra i ōku ringaringa me ōku waewae, kia mōhio ai koutou ko au te Atua o Iharaira, me te Atua o te ao katoa, ā, kua whakamatea nei mō ngā hara o te ao.

15 Ā, i pahawa ake, nā, ka haere atu te whakaminenga, ā, ka kuhua atu ō rātou ringaringa ki tōna kaokao, ā, ka whāwhāngia ngā ngaunga o ngā nēra i ōna ringaringa me ōna waewae; ā, ka pēnei rātou, e haere takitahi atu ana tae noa atu ki te wā kua haere katoa atu rātou, ā, kua kite rātou ki ō rātou karu, ā, kua whāwhā ki ō rātou ringa, ā, kua mōhio tūturu rātou, ā, kua whakaatu atu, ko ia tēnā, i tuhituhia ai e ngā poropiti, e haere mai ai.

16 Ā, i te wā kua haere katoa atu rātou, ā, kua kitea mō rātou ake anō, ka karanga ngātahi atu rātou i te reo kotahi, e mea ana:

17 Ohana! Kia whakapaingia te ingoa o te Atua Runga Rawa! Ā, ka hinga iho rātou ki ngā waewae o Ihu, ā, ka koropiko ki a ia.

18 Ā, i pahawa ake, nā, ka kōrero ia ki a Nīwhai (nā te mea i waenganui a Nīwhai i te whakaminenga) ā, ka whakahau ia ki a ia kia haere mai ai ia ki mua.

19 Ā, ka whakatika ake a Nīwhai, ā, ka haere atu ki mua, ā, ka tuohu i a ia anō i te aroaro o te Ariki, ā, ka kihi i ōna waewae.

20 Ā, ka whakahau te Ariki i a ia kia whakatika ake ia. Ā, ka whakatika ake ia, ā, ka tū i tōna aroaro.

21 Ā, ka kī atu te Ariki ki a ia: Ka hoatu mana au ki a koe kia rumaki koe i tēnei iwi ina kake ake anō au ki roto i te rangi.

22 Ā, ka karanga anō te Ariki ki ētahi atu, ā, ka pērā anō tana meatanga ki a rātou; ā, ka hoatu e ia ki a rātou he mana hei rumaki. Ā, ka kī atu ia ki a rātou: Ka rumaki koutou i runga i tēnei āhuatanga; ā, kauaka hoki he tautohetohe i waenganui i a koutou.

23 He pono tāku e mea atu nei ki a koutou, ko te tangata e rīpenetā ai i ōna hara i runga i ā koutou kupu, me te hiahia kia rumakina i runga i tōku ingoa, ka rumaki koutou i a a ia i runga i tēnei āhuatanga—Nana, ka haere iho koutou ki raro kia tū ai i roto i te wai, ka rumaki koutou i a rātou i runga i tōku ingoa.

24 Ināianei ā nana, koinei ngā kupu e kōrero ai koutou, e karangahia ake ana rātou ki ō rātou ingoa, e mea ana:

25 Kua whakamanaia ahau e Ihu Karaiti, ka rumaki au i a koe i runga i te ingoa o te Matua, o te Tama, o te Wairua Tapu. Āmine.

26 Kātahi koutou ka rumaki iho i a rātou ki roto i te wai, ā, ka puta mai anō i te wai.

27 Ā, hei runga i tēnei ritenga tā koutou rumaki i runga i tōku ingoa; nana rā, he pono tāku e mea atu nei ki a koutou, nā, he kotahi tonu te Matua, me te Tama, me te Wairua Tapu; ā, kei roto au i te Matua, ā, kei roto te Matua i ahau, he kotahi tonu māua ko te Matua.

28 Ā, ka rumaki koutou kia rite ai ki tāku i whakahau ai i a koutou. Ā, me kaua he tautohetohenga i waenganui i a koutou, pērā i mua; me kaua anō he tautohetohenga i waenganui i a koutou e pā ana ki ngā tikanga o tōku akoranga, pērā i mua.

29 Nā te mea he pono, he pono tāku e mea atu nei ki a koutou, ehara nōku te tangata kei a ia te wairua tautohetohe, engari nō te rēwera kē, ko ia te matua o te tautohetohenga, ā, kei te whakaohooho ake ia i ngā ngākau o te tangata kia tautohetohe atu i runga i te riri, tētahi ki tētahi.

30 Nana, ehara tēnei i taku akoranga, ki te whakaohooho ake i ngā ngākau o te tangata, tētahi ki tētahi; engari koinei taku akoranga, kia whakakorehia atu ngā mea pērā.

31 Nana, he pono, he pono, tāku e mea atu nei ki a koutou, māku taku akoranga e whakapuaki atu nei ki a koutou.

32 Ā, koinei taku akoranga, koia hoki te akoranga i homai ai e tōku Matua ki ahau; ā, kei te whakaatu atu au mō te Matua, ā, kei te whakaatu atu te Matua mōku, ā, kei te whakaatu atu te Wairua Tapu mō māua ko te Matua; ā, kei te whakaatu atu au, nā, kua whakahau te Matua i ngā tāngata katoa, i ngā wāhi katoa, kia rīpenetā, ā, kia whakapono mai i ahau.

33 Ā, ko te tangata e whakapono ai i ahau, ā, ka rumakina, koia anō te mea e whakaorangia ai; ko rātou anō te hunga e whiwhi ai ki te kīngitanga o te Atua.

34 Ā, ko te tangata e kore nei e whakapono i ahau, ā, e kore nei e rumakina, ka pāpunihia.

35 He pono, he pono, tāku e mea atu nei ki a koutou, nā, koinei taku akoranga, ā, kei te whakaatu atu au mō te Matua; ā, ko te tangata e whakapono ai i ahau e whakapono ana anō i te Matua; ā, ka whakaatu atu te Matua ki a ia mōku, nā te mea ka toro atu ia ki a ia ki te ahi me te Wairua Tapu.

36 Ā, pēnei ka whakaatu te Matua mōku, ā, ka whakaatu atu te Wairua Tapu mō māua ko te Matua; nā te mea he kotahi tonu te Matua, mātou ko te Wairua Tapu.

37 Hei āpiti anō ko taku kupu tēnei ki a koutou, me rīpenetā koutou, ā, kia rite ki tētahi tamaiti nohinohi, ā, kia rumakina i runga i tōku ingoa, e kore rānei koutou e whiwhi nei i ēnei mea.

38 Hei āpiti anō ko taku kupu tēnei ki a koutou, me rīpenetā koutou, ā, kia rumakina i runga i tōku ingoa, ā, kia rite hoki ki tētahi tamaiti nohinohi, e kore rānei e āhei i a koutou te whiwhi ki te kīngitanga o te Atua.

39 He pono, he pono, tāku e mea atu nei ki a koutou, nā, koinei taku akoranga, ā, ko te tangata e hanga nei i runga i tēnei, e hanga anō hoki i runga i tōku kāmaka, ā, e kore rātou e taea nei e ngā kūaha o te ao rēwera.

40 Ā, ko te tangata e nui ake, e iti iho rānei tana whakapuaki i tēnei, me tana whakapūmau i tēnei mō taku akoranga, nō te kino anō ia, ā, ehara hoki i te mea hanga ki runga i tōku kāmaka; engari kei te hanga ake ia ki runga i tētahi tūāpapa oneone, ā, kei te tūwhera ngā kūaha o te ao rēwera kia whiwhi ai i ngā mea pērā ina tae mai ngā waipuke, ā, ina āki hoki ngā hau ki runga ki a rātou.

41 Nō reira, haere atu ki tēnei iwi, ā, whakapuakina atu ngā kupu kua kōrerotia nei e au, ki ngā tōpito katoa o te ao.