Upoko 12
Ka karangatia, ā, ka whakamanaia ngā apataki tekau mā rua e Ihu—Ka tukuna atu tētahi kauhau e ia ki ngā Nīwhai e rite ana ki te Kauhautanga i runga i te Maunga—Ka kōrero ia i ngā Pearature—Kei kō noa atu āna whakaakoranga, ā, he nui ake te hiranga o āna whakaakoranga i tō te ture a Mohi—Ka whakahaua te tangata kia tino tika rawa atu pērā i a rāua ko Tōna Matua tika—Whakatauritetia a Matiu 5. Takiwā T.A. 34.
1 Ā, i pahawa ake, nā, i te kōrerotanga a Ihu i ēnei kupu ki a Nīwhai, ki te hunga anō hoki kua karangatia ake nei, (ko te tatauranga o te hunga i karangatia nei, ā, i whakawhiwhi ai ki te kaha me te mana ki te rumaki, arā, ko te tekau mā rua) ā nana, ka toro atu ia i tōna ringa ki te whakaminenga, ā, ka karanga atu ki a rātou, e mea ana: Ka manaakitia koutou mēnā ka whakarongo mai ki ngā kupu a te tekau mā rua kua kōwhiria ake nei i waenganui i a koutou kia minita ai ki a koutou, ā, kia mahi anō hei pononga mā koutou; ā, kua tukuna atu e au he kaha e rumaki ai rātou i a koutou ki te wai; ā, hei muri iho i tā koutou rumakitanga ki te wai, nana, māku koutou e rumaki ki te ahi me te Wairua Tapu; nō reira ka manaakitia koutou mēnā ka whakapono koutou i ahau, ā, mēnā ka rumakitia, whai muri iho i tā koutou kitenga i ahau, ā, e mōhio ana ko au anō tēnei.
2 Hei āpiti anō, ka manaakitia ake te hunga e whakapono ai ki ā koutou kupu nā te mea ka whakaatu atu koutou i tā koutou kitenga mai i ahau, ā, e mōhio ana koutou ko au anō tēnei. Āe rā, ka manaakitia te hunga e whakapono ai ki ā koutou kupu, me te heke iho ki roto i ngā hōhonutanga o te whakaiti, ā, kia rumakina ai, nā te mea ka torona atu koutou ki te ahi me te Wairua Tapu, ā, ka whiwhi ki tētahi murunga i ō rātou hara.
3 Āe rā, ka manaakitia te hunga e rawakore ana i roto i te wairua e haere mai ana ki ahau, nā te mea nō rātou hoki te kīngitanga o te rangi.
4 Hei āpiti anō, ka manaakitia te hunga katoa e tangi ana, nā te mea ka whakaāiotia rātou.
5 Ā, ka manaakitia te hunga māhaki, nā te mea nō rātou te whenua.
6 Ā, ka manaakitia te hunga katoa e hiakai ana, ā, e hiainu ana mō te tika, nā te mea ka whakakīngia rātou ki te Wairua Tapu.
7 Ā, ka manaakitia te hunga whakaaroha, nā te mea ka whiwhi rātou i te whakaaroha.
8 Ā, ka manaakitia te hunga katoa e ngākau mā ana, nā te mea ka kite rātou i te Atua.
9 Ā, ka manaakitia te hunga hohou rongo katoa, nā te mea ka karangatia rātou ko ngā tamariki a te Atua.
10 Ā, ka manaakitia te hunga katoa e whakatoia ana mō tōku ingoa, nā te mea nō rātou te kīngitanga o te rangi.
11 Ā, ka manaakitia koutou ina tāwaia koutou, ina whakatoia koutou, me te kōrero ake ki a koutou i ngā tūmomo kino teka, mōku te take;
12 Nā, ka whiwhi hoki koutou ki te hari me te koa nui, nā te mea ka nui tō utu i te rangi; nā, he pēnei anō tā rātou whakatoinga i ngā poropiti i mua i a koutou.
13 He pono, he pono, tāku e mea atu nei ki a koutou, ka hoatu au ki a koutou kia riro ai koutou hei tote mō te whenua; engari mēnā ka hemo te hā o te tote mā te aha e totengia ai te whenua? Ka riro te tote hei mea koretake, hei mea makaia noa iho ki waho, ā, hei mea takahia e ngā waewae o te tangata.
14 He pono, he pono, tāku e mea atu nei ki a koutou, ka hoatu au ki a koutou kia riro ai hei māramatanga mō tēnei iwi. Kāore e taea ana te huna i te pā e tū ana i runga i te puke.
15 Nana, ka whakakā te tangata i te kānara kātahi ka purua ki raro i tētahi ipu ine? Kāo, engari ka whakatūria ki runga i tētahi tūranga kānara, ā, ka tiaho atu ki ngā tāngata katoa i roto i te whare;
16 Nō reira kia tiaho tō koutou māramatanga i mua i tēnei iwi, kia kite ai rātou i ā koutou mahinga pai, ā, kia whakakorōria ai i tō koutou Matua i te rangi.
17 Kei whakaaro kua haere mai au ki te whakangaro i te ture, i ngā poropiti rānei. Kāore au i haere mai ki te whakangaro engari ki te whakatutuki;
18 Nā, he pono tāku e mea atu nei ki a koutou, kāore i pahemo atu tētahi tongi, tētahi tohu rānei i te ture, engari kua whakatutukihia ngā mea katoa i roto nei i ahau.
19 Ā nana, kua hoatu e au ki a koutou te ture me ngā whakahaunga a tōku Matua, kia whakapono ai koutou i ahau, ā, kia rīpenetā koutou i ō koutou hara, me te haere mai ki ahau i runga i te ngākau marū me te wairua iro. Nana, kei a koutou ngā whakahaunga i mua i a koutou, ā, kua whakatutukihia te ture.
20 Nō reira haere mai ki ahau, ā, kia whakaorangia ai koutou; nā, he pono tāku e mea atu nei ki a koutou, nā, ki te kore koutou e pupuri i aku whakahaunga, kua whakahaua nei koutou i tēnei wā, e kore rawa koutou e kuhu atu ki roto i te kīngitanga o te rangi.
21 Kua rongo koutou, nā, kua kōrerotia nei e te hunga onamata, ā, kua tuhia anō hoki i mua i tō koutou aroaro, kia kaua koutou e whakamate, ā, ka werewere iho te whakawākanga a te Atua ki runga i te tangata e whakamate ana;
22 Engari ko taku kupu tēnei ki a koutou, ka werewere iho tōna whakawākanga ki runga i te tangata e riri nei ki tana teina. Ā, ko te tangata e kī ake nei ki tana teina, Wairangi, ka werewere iho te rūnangatanga; ko te tangata e kī ai, He heahea koe, ka werewere iho te ahi o te ao rēwera.
23 Nō reira, ki te haere mai koutou ki ahau, ki te hiahia rānei kia haere mai ki ahau, ā, e mahara tonu ana kua hara tō teina ki a koe—
24 Haere i runga i tō huarahi ki tō teina, ā, me matua hohou i te rongo ki tō teina, kātahi ka haere mai ki ahau i runga i te hiahia katoa o te ngākau, ā, māku koe e whiwhi.
25 Kia hohoro tāu whakaae ki tō hoariri i a koe e haere tahi ana me ia i te huarahi, kei mau koe i a ia, ā, ka makaia atu koe ki roto i te whareherehere.
26 He pono, he pono, tāku e mea atu nei ki a koutou, e kore rawa koutou e puta mai i reira kia utua rā anō te henine whakamutunga. Ā, i a koe i roto i te whareherehere ka taea rānei e koe te henine kotahi noa iho te utu? He pono, he pono, tāku e mea atu nei ki a koutou, Kāo.
27 Nana, kua tuhia nei e rātou te hunga onamata, kia kaua koe e mahi pūremu;
28 Engari ko taku kupu tēnei ki a koutou, ko te tangata e titiro atu ana ki runga i tētahi wahine, he mate kanehe atu ki a ia, kua mahi pūremu atu ia i tōna ngākau.
29 Nana, kei te hoatu nei e au tētahi whakahaunga ki a koutou, kia kaua e tuku tētahi o ēnei mea kia kuhu ai ki roto i ō koutou ngākau;
30 Nā te mea he pai ake kia whakakahoretia atu e koutou ēnei mea, hei konei amohia ake e koutou ō koutou rīpeka, i te tuku kia makaia atu koutou ki roto i te ao rēwera.
31 Kua tuhia nei, ko te tangata e whakarere nei i tana hoawahine, tukuna ia kia hoatu ai e ia tētahi tuhinga whakarere.
32 He pono, he pono, tāku e mea atu nei ki a koutou, ko te tangata e whakarere i tana hoawahine, hāunga te take pūremu, e mea ana ia i te wahine kia pūremu; ā, ka pūremu te tangata e mārena ai ki a ia.
33 Hei āpiti anō kua tuhia nei, kaua koe e oati teka, engari me whakamahi āu oati ki te Ariki;
34 Engari he pono, he pono, tāku e mea atu nei ki a koutou, kaua rawa e oati; kaua rānei mā runga i te rangi, nā te mea koia te torona o te Atua;
35 Kaua rānei mā runga i te whenua, nā te mea koia tōna tūrangawaewae;
36 Kaua rānei koutou e oati mā runga i tō māhunga, nā te mea tē taea e koutou te mea kia mangu, kia mā rānei te makawe kotahi;
37 Engari tukuna tēnei hei kupu mā koutou Āe rā, āe rā; Kāo, kāo; nā te mea he kino ngā mea i tua atu i ēnei.
38 Ā nana, kua tuhia, he karu mō te karu, ā, he niho mō te niho;
39 Engari ko taku kupu tēnei ki a koutou, nā, kaua koutou e whakauaua atu i te kino, engari ko te tangata e papaki iho i tō pāpāringa matau, hurihia atu tētahi atu ki a ia anō hoki;
40 Mehemea ka hāmene tētahi tangata i a koe me te tango atu i tō koti, tukuna ia kia mau ki tō koti anō hoki;
41 Ā, ko te tangata e tono atu nei i a koe kia haere kotahi maero, haere tahi me ia mō ngā mea e rua.
42 Hoatu ki te tangata e tono ana i a koe, ā, kaua anō e tahuri atu i te tangata e hiahia ana ki te tono taonga tārewa i a koe.
43 Ā nana kua tuhia anō hoki, kia aroha atu koe ki tō kiritata, ā, kia mauāhara ki tōu hoariri;
44 Engari nana ko taku kupu tēnei ki a koutou, kia arohaina ō koutou hoariri, kia manaakitia te hunga e kangaia nei koutou, kia mahi pai ki te hunga e mauāhara nei ki a koutou, ā, kia inoi mō te hunga e whakamahia kinotia ana koutou, ā, e whakatoi ana i a koutou;
45 Kia riro koutou hei tamariki nā tō koutou Matua i te rangi; nā te mea ka mea ia i tana rā kia whiti iho ai ki runga i te hunga kino me te hunga pai.
46 Nō reira ko aua mea nō onamata, i raro iho nei i te ture, kua whakatutukihia ērā mea katoa i roto i ahau.
47 Kua whakakorea atu ngā mea tawhito, ā, kua meinga houhia ngā mea katoa.
48 Nō reira e hiahia ana ahau kia tika rawa atu koutou pērā i ahau, pērā rānei i tō koutou Matua kei roto nei i te rangi e tika rawa atu ana.