1 Ā, i pahawa ake, nā, ka whakahau a Ihu i āna apataki kia haria mai he paraoa, he waina ki a ia.

2 Ā, i a rātou ka riro atu ki te tiki i te paraoa me te waina, ka whakahau ia i te whakaminenga kia noho iho rātou ki runga i te whenua.

3 Ā, i te wā i tae mai ngā apataki me te paraoa me te waina, ka mau ia ki te paraoa, ā, ka wāwāhia, ā, ka manaakitia; ā, ka hoatu e ia ki ngā apataki, ā, ka whakahaua rātou kia kai.

4 Ā, i te wā kua kai rātou, ā, kua mākona, ka whakahau ia kia hoatu ai ki te whakaminenga.

5 Ā, i te wā kua kai te whakaminenga, ā, kua mākona, ka kī atu ia ki ngā apataki: Nana ka whakamanaia tētahi i waenganui i a koutou, ā, ka hoatu mana au ki a ia kia wāwāhi paraoa ia, ā, kia manaakitia ērā me te hoatu ērā ki te iwi o te hāhi, ki te hunga katoa e whakapono ai, ā, ki te hunga katoa e rumakina ai i runga i tōku ingoa.

6 Ā, me ū katoa koutou ki te mahi pēnei, kia rite ki tāku i mahi ai, pēnei rawa i taku wāwāhitanga i te paraoa me taku manaakitanga i ērā me taku hoatutanga atu ki a koutou.

7 Ā, ka meatia tēnei e koutou hei maumaharatanga ake ki tōku tīnana, kua whakakitea atu nei e au ki a koutou. Ā, ka riro ia hei whakaaturanga ki te Matua, nā, kei te maumhara tonu koutou ki a au. Ā, ki te maumahara tonu koutou ki ahau i ngā wā katoa ka riro i a koutou tōku Wairua.

8 Ā, i pahawa ake, nā, i tana kōrerotanga ake i ēnei kupu, ka whakahau ia i āna apataki kia tīkina ake te waina o te kapu me te inu, ā, kia hoatu anō ki te whakaminenga e inu anō ai rātou.

9 Ā, i pahawa ake, nā, ka pērātia e rātou, ā, i inumia, ā, i mākona; ā, ka hoatu rātou ki te whakaminenga, ā, ka inumia e rātou, ā, ka mākona rātou.

10 Ā, i te wā i pēneitia e ngā apataki i tēnei, ka kī atu a Ihu ki a rātou: Kua manaakitia koutou mō tēnei mea kua mahia nei e koutou, nā te mea kei te whakatutuki tēnei i aku whakahaunga, ā, kei te whakaatu atu tēnei ki te Matua, nā, kei te hiahia koutou ki te mahi i tāku i whakahau atu nei ki a koutou.

11 Ā, ka meatia tonutia tēnei e koutou ki te hunga e rīpenetā ana, e rumakina ana i runga i tōku ingoa; ā, ka mea koutou i tēnei hei whakamaharatanga ake ki ōku toto, kia whakaatu atu koutou ki te Matua, nā, kei te mahara tonu koutou ki ahau. Ā, ki te maumhara tonu koutou ki a au i ngā wā katoa ka riro i a koutou tōku Wairua.

12 Ā, ka hoatu au ki a koutou tētahi whakahaunga kia mahia ēnei mea. Ā, ki te pēnei tonutia ēnei mea e koutou ka manaakitia koutou, nā te mea kua hangaia koutou i runga i tōku kāmaka.

13 Engari ko te hunga e nui ake ana, ā, e iti iho rānei te meatanga ake i ēnei mea, nā, kāore ēnei e hangaia ake ana ki runga i tōku kāmaka, engari kua hangaia ake nei ki runga i te tūāpapa oneone; ā, ina heke iho te ua, ā, ina tau mai ngā waipuke, ā, ina pūpuhi ngā hau, ā, ina haua iho ēnā ki runga ki a rātou, ka hinga rātou, ā, kua tūwhera kē ngā kūaha o te ao rēwera kia whakawhiwhia ai rātou.

14 Nō reira kua manaakitia koutou ki te pupuri i aku whakahaunga, kua whakahau mai nei te Matua ki ahau kia hoatu au ki a koutou.

15 He pono, he pono, taku kupu tēnei ki a koutou, me mataara, ā, me inoi koutou i ngā wā katoa, kei whakawaia koutou e te rēwera, ā, kei ārahina hereheretia atu e ia.

16 Ā, ka rite ki tāku i inoi ai i waenganui i a koutou tā koutou e inoi ai i roto i tōku hāhi, i waenganui i tōku iwi e rīpenetā ai, ā, e rumakina ai i runga i tōku ingoa. Nana ko au te māramatanga; kua whakatakotohia e au te tauira mō koutou.

17 Ā, i pahawa ake, nā, i te wā i kōrero atu a Ihu i ēnei kupu ki āna apataki, ka tahuri atu anō ia ki te whakaminenga, ā, ka kī atu ia ki a rātou:

18 Nana, he pono, he pono, taku kupu tēnei ki a koutou, me mataara, ā, me inoi koutou i ngā wā katoa kei tomo atu koutou ki roto i te whakawainga; nā te mea e hiahia ana a Hātana kia mau ki a koutou, kia tātaria koutou e ia anō nei he wīti.

19 Nō reira me inoi koutou i ngā wā katoa ki te Matua i runga i tōku ingoa;

20 Ā, ko te mea e inoi ake ai koutou ki te Matua i runga i tōku ingoa, e tika ana, e whakapono ana ka whiwhi koutou, nana, ka hoatu ki a koutou.

21 Inoi koutou i ō whānau ki te Matua i runga i tōku ingoa i ngā wā katoa, kia manaakitia ā koutou hoawahine me ā koutou tamariki.

22 Ā nana, kia putuputu tonu ā koutou huihuinga; ā, kia kaua hoki e whakakore i te haerenga mai o tētahi tangata ina huihui ngātahi ai koutou, engari tukuna rātou kia haere mai ai ki a koutou, ā, kaua e whakakorehia atu rātou;

23 Engari me inoi koutou mō rātou, ā, kaua e makaia atu rātou ki waho; ā, ki te putuputu tā rātou haere mai ki a koutou me inoi koutou mō rātou ki te Matua, i runga i tōku ingoa.

24 Nō reira, hāpaingia ake tō koutou māramatanga kia tiaho atu ai ki te ao. Nana ko au te māramatanga e hāpaingia ake ai e koutou—ērā mea kua kite nei koutou i a au e mea ana. Nana kua kite koutou kua inoi ake au ki te Matua, ā, kua kitea e koutou katoa.

25 Ā, kua kite koutou kāore au i whakahau atu ki tētahi o koutou kia haere atu ai, engari kē kua whakahaua kia haere mai ai koutou ki ahau, kia whāwhā koutou, ā, kia kite koutou; waihoki ka pēneitia atu e koutou ki te ao; ā, ko te tangata e whati i tēnei whakahaunga, e tukua ana ia e ia anō kia ārahina ki roto i te whakawainga.

26 Ā, ināianei ā i pahawa ake i te kōrerotanga a Ihu i ēnei kupu, ka tahuri atu ōna karu ki runga i ngā apataki kua kōwhiria e ia, ā, ka kī atu ki a rātou:

27 Nana he pono, he pono, taku kupu tēnei ki a koutou, kei te hoatu au i tētahi atu whakahaunga ki a koutou, kātahi au me haere ki tōku Matua kia whakatutuki au i ētahi atu whakahaunga kua homai nei e ia ki ahau.

28 Ināianei ā nana, koinei te whakahaunga e hoatu nei au ki a koutou, kia kaua koutou e tuku i tētahi kia kai ai, ā, kia inu ai i tōku kiko me ōku toto i runga i ō rātou hē, ina minitatia atu e koutou;

29 Nā te mea ko te tangata e kai ana i tōku kiko, e inu ana i ōku toto i runga i ō rātou hē, e kai ana, e inu ana i te whakawākanga ki tōna wairua; nō reira mēnā kei te mōhio koutou kāore e tika ana tētahi tangata ki te kai, ki te inu i tōku kiko me ōku toto ka whakakorea ia e koutou.

30 Hei aha koa, kaua e makaia atu ia e koutou i waenganui i a koutou, engari me minita ki a ia, ā, kia inoi ki te Matua mōna, i runga i tōku ingoa; ā, ki te rīpenetā ia, ā, ki te rumakina ia i runga i tōku ingoa, kātahi koutou ka whakawhiwhi i a ia, ā, ka minita atu i tōku kiko me ōku toto ki a ia.

31 Engari ki te kore ia e rīpenetā, kua kore ia e tatauria i waenganui i tōku iwi, kia kore ai ia e whakangaro i tōku iwi, nana rā e mōhio ana au ki aku hipi, ā, kua tatauria rātou.

32 Hei aha koa, e kore koutou e maka atu i a ia i ō koutou wharekarakia, i ō koutou wāhi koropiko rānei, nā, kāore koutou e mōhio ana mehemea rānei ka tahuri mai rātou me te rīpenetā, me te haere mai ki ahau i runga i te hiahia katoa o te ngākau, ā, māku rātou e mahu; ā, ka waiho ko koutou hei mea kawe atu i te whakaoranga ki a rātou.

33 Nō reira, puritia ēnei kīanga kua whakahaua koutou e ahau kia kore ai koutou e whakahēngia; nā te mea auē te mate mō te tangata e whakahēngia ai e te Matua.

34 Ā, kei te hoatu e au ki a koutou ēnei whakahaunga nā ngā tautohetohenga i waenganui i a koutou. Ā, kua manaakitia koutou mēnā kāore he tautohetohenga i waenganui i a koutou.

35 Ināianei ā kei te haere atu au ki tōku Matua, nā te mea e tika ana kia haere atu au ki tōku Matua mō koutou te take.

36 Ā, i pahawa ake, nā, i te wā i whakakapi a Ihu i ēnei kīanga, ka pā atu ki tōna ringa ngā apataki nāna nei i kōwhiri, he mea takitahi, tae atu pū anō ki te wā kua pāngia katoatia rātou, ā, ka kōrero atu ki a rātou i a ia e pā atu ana ki a rātou.

37 Ā, kīhai te whakaminenga i rongo i ngā kupu i kōrerotia nei e ia, nō reira kāore rātou i whakaaturia atu; engari kei te whakaatu ngā apataki, nā, i hoatu mana e ia kia tukua atu ai te Wairua Tapu. Ā, māku koutou e whakakite atu he mea pono tēnei whakaaturanga.

38 Ā, i pahawa ake, nā, i te wā i pā atu a Ihu ki a rātou katoa, ka tau mai tētahi kapua, ā, ka taumarumaruhia te whakaminenga nā konei tē taea e rātou te kite i a Ihu.

39 Ā, i a rātou e taumarumaruhia ana ka māwehe atu ia i a rātou, ā, ka kake ake i te rangi. Ā, i kite ngā apataki, ā, i whakaatu mai rātou mō tana kakenga ake anō i te rangi.