1 Ināianei ā i pahawa ake, nā, i te kakenga ake o Ihu ki roto i te rangi, ka wehewehe atu te whakaminenga, ā, ka mau atu ia tangata, ia tangata ki tana hoawahine me āna tamariki, ā, ka hoki atu ki tōna ake kāinga.

2 Ā, ka hau wawe te rongo ki waenganui i te iwi, i mua i te pōtanga o te rā, kua kite te whakaminenga i a Ihu, ā, kua minita ia ki a rātou, ā, ka whakakite anō atu ia i a ia ake anō ki te whakaminenga hei te āpōpō.

3 Āe rā, haere ana te rongo ā-awatea noa e pā ana ki a Ihu; nā konei he tokomaha ngā tāngata i tonoa ai e rātou, āe rā, he tino tokomaha rawa atu, i mahi ai i te roanga atu o taua pō, kia tae ai rātou i te aonga ake o te rā ki te wāhi e whakakite atu ai a Ihu i a ia anō ki te whakaminenga.

4 Ā, i pahawa ake i te aonga ake o te rā, i te wā i huitahi ai te whakaminenga, nana, ko Nīwhai rāua ko tana teina nāna nei i mairanga ake i te mate, ko Tīmoti tōna ingoa, me tana tama anō hoki, ko Honahi tōna ingoa, me Mationi anō hoki, me Mationiha, tana teina, me Kumene, me Kumenohi, me Heremaia, me Hemono, me Honahi, me Terekia, me Ihāia—nā, koinei ngā ingoa o ngā apataki i kōwhiria nei e Ihu—ā, i pahawa ake, nā, ka haere atu rātou, ā, ka tū ki waenganui i te whakaminenga.

5 Ā nana, i te nui o te whakaminenga, ka meinga e rātou kia wehewehea rātou kia tekau mā rua ngā rōpū.

6 Ā, i whakaako te tekau mā rua i te whakaminenga; ā nana, i mea ai rātou kia tūturi iho te whakaminenga ki runga i te mata o te whenua me te inoi ki te Matua i runga i te ingoa o Ihu.

7 Ā, i inoi ake anō ngā apataki ki te Matua i runga i te ingoa o Ihu. Ā, i pahawa ake, nā, ka tū ake rātou, ā, ka minita atu ki te iwi.

8 Ā, i te wā kua oti i a rātou te minita atu i aua kupu anō i kōrerotia ake nei e Ihu—kāore i kōtiti noa atu i ngā kupu i kōrerotia ai e Ihu—nana, ka tūturi iho anō rātou, ā, ka inoi ake ki te Matua i runga i te ingoa o Ihu.

9 Ā, i inoi ake rātou mō taua mea i tino hiahiatia nuitia e rātou; ā, i hiahia rātou kia hoatu ai te Wairua Tapu ki a rātou.

10 Ā, mutu ana tā rātou inoi ka haere iho rātou ki te taha o te wai, ā, ka whai atu te whakaminenga i a rātou.

11 Ā, i pahawa ake, nā, ka heke iho a Nīwhai ki roto i te wai, ā, ka rumakina.

12 Ā, ka puta ake ia i te wai, ā, ka tīmata ki te rumaki. Ā, i rumakina e ia aua hunga katoa i kōwhiria nei e Ihu.

13 Ā, i pahawa ake i te wā kua rumakina rātou katoa, ā, kua puta ake i te wai, ka taka iho te Wairua Tapu ki runga i a rātou, ā, ka kī rātou i te Wairua Tapu me te ahi.

14 Ā nana, i te karapotia rātou me te mea nei ki te ahi; ā, i heke iho i te rangi, ā, i kite katoa te whakaminenga, ā, i whakaatuhia anō hoki; ā, ka heke iho ngā anahera mai i te rangi, ā, ka minita atu ki a rātou.

15 Ā, i pahawa ake, nā, i ngā anahera e minita ana ki ngā apataki, nana, ka haere mai a Ihu, ā, ka tū ki waenganui, ā, ka minita atu ki a rātou.

16 Ā, i pahawa ake, nā, ka kōrero atu ia ki te whakaminenga, ā, ka whakahaua rātou kia tūturi iho ki runga i te whenua, ā, kia tūturi iho āna apataki anō hoki ki runga i te whenua.

17 Ā, i pahawa ake, nā, i te wā kua tūturi iho rātou katoa ki runga i te whenua, ka whakahau ia i āna apataki kia inoi rātou.

18 Ā nana, ka tīmata rātou ki te inoi; ā, ka inoi ki a Ihu, e kīa ana ko ia tō rātou Ariki me tō rātou Atua.

19 Ā, i pahawa ake, nā, ka wehe atu a Ihu i waenganui i a rātou, ā, ka haere ki pahaki tata atu i a rātou, ā, ka tuohu iho i a ia anō ki te whenua, ā, ka kī ake ia:

20 E te Matua, e whakawhetai atu ana au ki a koe mōu i homai te Wairua Tapu ki ēnei i whiriwhiria nei e ahau; ā, he mea nā tō rātou whakapono ki ahau i whiriwhiri ai au i a rātou i roto i te ao.

21 E te Matua, e inoi ake ana au ki a koe kia hoatu e koe te Wairua Tapu ki ngā tāngata katoa e whakapono ai ki ā rātou kupu.

22 E te Matua, kua homai nei e koe te Wairua Tapu ki a rātou nā tō rātou whakapono ki ahau; ā, kei te kite koe e whakapono ana rātou i ahau nā te mea e rongo ana koe i a rātou, ā, kei te inoi rātou ki ahau; ā, kei te inoi mai rātou ki ahau nā te mea kei tō rātou taha ahau.

23 Ināianei ā e te Matua, kei te inoi ake au ki a koe mō rātou, mō te hunga katoa anō hoki e whakapono ai ki ā rātou kupu, kia whakapono rātou i ahau, kia āhei au i roto i a rātou pērā me koe, e te Matua, i roto i ahau, kia kotahi ai tātou.

24 Ā, i pahawa ake, nā, i te wā kua inoi pēnei a Ihu ki te Matua, ka haere mai ia ki āna apataki, ā nana, hono tonu tā rātou, kāore i mutu, ki te inoi ake ki a ia; ā, kīhai rātou i whakarea i ngā kupu maha, nā te mea i whakamōhiotia rātou he aha ngā mea e inoia ai e rātou, ā, ka whakakīa rātou ki te hiahia.

25 Ā, i pahawa ake, nā, ka manaakitia rātou e Ihu i a rātou e inoi ana ki a ia; ā, ka menemene tōna āhua ki runga i a rātou, ā, ka tiaho te māramatanga o tōna āhua ki runga i a rātou, ā nana he rite tō rātou mā ki te āhua me ngā kākahu o Ihu; ā nana kei tua noa atu tō reira mā i ngā mea mā katoa, āe rā, kāore e taea ana tētahi mea i runga i te whenua kia rite ki tō reira mā.

26 Ā, ka kī atu a Ihu ki a rātou: Inoi tonu; ā, kīhai i mutu tā rātou inoi.

27 Ā, ka tahuri atu anō ia i a rātou, ā, ka haere ki pahaki tata atu, ā, ka tuohu iho i a ia anō ki te whenua; ā, ka inoi ake anō ia ki te Matua, e mea ana:

28 E te Matua, e whakawhetai ana au ki a koe nā te mea kua mā i a koe ēnei i whiriwhiri ai ahau, nā tō rātou whakapono, ā, kei te inoi ake au mō rātou, mō te hunga anō hoki e whakapono ai ki ā rātou kupu, kia mā ai rātou i ahau, i runga i te whakapono ki ā rātou kupu, kia pērā ana me rātou e mā ana i ahau.

29 E te Matua, kāore au i te inoi mō te ao, engari mō te hunga kua homai nei e koe ki ahau mai i te ao, nā tō rātou whakapono, kia mā ai rātou i ahau, kia āhei au i roto i a rātou pērā i a koe, e te Matua, kei roto i ahau, kia kotahi anō tātou, kia whakakorōriatia ahau i roto i a rātou.

30 Ā, i te kōrerotanga a Ihu i ēnei kupu ka haere mai anō ia ki āna apataki; ā nana e pūmau ana tā rātou inoi, kīhai i mutu, ki a ia; ā, ka menemene anō ia ki runga i a rātou; ā nana he mā rātou, e pērā ana i a Ihu.

31 Ā, i pahawa ake, nā, ka haere ki pahaki tata atu anō ia, ā, ka inoi ake ki te Matua;

32 Ā, tē taea e te arero ngā kupu i inoi ai ia te whakapuaki, tē taea rānei ngā kupu i inoi ai ia te tuhituhi.

33 Ā, i rongo ai, ā, i whakaatu ai te whakaminenga; ā, i tūwhera ō rātou ngākau, ā, i mārama rātou i roto i ō rātou ngākau ngā kupu i inoi ai ia.

34 Hei aha koa, anō te nui whakamīharo o ngā kupu i kōrerotia nei e ia tē taea te tuhituhi, tē taea rānei te whakapuaki e te tangata.

35 Ā, i pahawa ake, nā, mutu ana i a Ihu tana inoi ka haere mai anō ia ki ngā apataki, ā, ka kī atu ki a rātou: Kāore anō au kia kite atu i te whakapono pēnei te nui i waenganui i ngā Hūrai katoa; nā reira kāore i āhei i a au te whakakite atu ki a rātou i ngā merekara pēnei te nui, he mea nā tō rātou whakaponokore.

36 He pono tāku e mea atu nei ki a koutou, kāore rawa tētahi o rātou i kite i ngā mea nunui kua kite nā koutou; kāore rawa rānei rātou i rongo i ngā mea nunui kua rongo nā koutou.