1 Tan agawa ya onia met so inlabas na komasiamaplo tan lima a taon, tan saray totoo ginmapo a nalingwanan da la so saray agawa a pakapatnagan tan pakelaw a nadñgel da, tan ginmapo a manmelag la a manmelag so pankelaw da ed sakey a pakapatnagan odino sakey a pakelaw a nanlapu ed tawen, lapu ed saya ginmapo ya inmawet so saray puso ra, tan apereñgan so saray kanunotan da, tan ginapoan da la so ag manisia ed amin a nadñgel tan anengneng da—

2 Momotekteken da ed dili a puso ra so saray beñgatla ya andi-kana, a saraya so nanlapu ed totoo tan dia ed pakapanyari na demonyo, pian niarawi tan palikdoen da so puso na saray totoo; tan dia ed onia si Satanas kinayarian to lamet so puso na saray totoo, dia ed onia abulag to so saray mata ra tan sikara so iniarawi to a manisia a saray doctrina nen Cristo so sakey a makulang-kulang tan sakey ya andi-kana a beñgatla.

3 Tan agawa a saray totoo so ginmapo ra a binmiskeg ed karelmeñgan tan karumsisan; tan sikara so ag manisia a wala ni so saray niiter a pakapatnagan odino pakelaw; tan si Satanas so nanliber-liber, a mañgiaarawi ed puso na saray totoo, a sikara so tutuksoen to tan sosugsogan to a mangawa na baleg a karelmeñgan dia ed dalin.

4 Tan dia ed onia so inlabas na komasiamaplo tan anem a taon; tan ontan met ed komasiamaplo tan pito a taon; tan ontan met ed komasiamaplo tan walo a taon; tan ontan met ed komasiamaplo tan siam a taon;

5 Tan ontan met linmabas so sanlasus a taon manlapu ed saray agew nen Mosiah, a sikato so ari ed saray totoo na Nephite.

6 Tan anem a lasus tan siam a taon so linmabas la nanlapu ed intaynan nen Lehi ed Jerusalem.

7 Tan siam a taon la so linmabas nanlapu ed saman so panaon sanen say pakapatnagan so niiter, a saya so sinalita na saray profeta, a si Cristo so onsabi ed mundo.

8 Natan saray Nephite ginapoan da so mambilang na panaon manlapu ed say pakapatnagan so niiter, odino nanlapu ed insabi nen Cristo; dia ed ontan, siam a taon la so linmabas.

9 Tan si Nephi, ya ama nen Nephi, a sikato so añgimatalekan ed saray kasulatan, so ag la pinmawil ed dalin na Zarahemla, tan angapo la so pakarumogan ed sikato ed amin a dalin.

10 Tan agawa a saray totoo so nansiansia ni ed karelmeñgan, angaman dakerakel la so profesiya tan pulong so niiter ed limog da; tan onia met so inlabas na komasamplo a taon; tan say komalabinsakey a taon met so linmabas ed kaugsan.

11 Tan agawa ed komalabintalo a taon ginmapo so saray bakal tan baliñgaan ed lapag na dalin; lapu ed saray matatakew a Gadianton so nanmaliw ira a dakerakel, tan dakel so saray pinapatey da a totoo, tan ginawa ra ya andi-kakanaan so dakel a ciudad, tan intayak da so dakerakel a panagpatey tan dakel a panagpaterter na dala ed lapag na dalin, kanian nakaukolan ya amin a totoo, mandapag a Nephite tan Lamanite, ya alaen da so saray ayura ra sumpa ed sikara.

12 Dia ed ontan, amin a Lamanite ya apasimbalo ed Katawan so akiolop ed saray kaagian da, a Nephite, tan sikara so apasuotan, onkana ed pañgiagel da ed saray bilay da tan saray kaasawaan da tan saray anak da, ya alaen da so saray ayura ra sumpa ed saray matatakew a Gadianton, on, tan ontan met pian napagnayon da so pankatunoñgan da, tan saray pankanawnawa na simbaan da tan say panagpikasi ra, tan say kawayañgan tan inkabulos da.

13 Tan agawa a kasakbayan na saya a komalabintalo a taon so linmabas saray Nephite so ataktakot ed sigpot a kadederal lapu ed saya a bakal, a saya so nanmaliw a mapalalo ya ansakit.

14 Tan agawa a saraman so Lamanite ya akitipon ed saray Nephite so nibilang ed limog na saray Nephite;

15 Tan say inkaayew da so naekal ed sikara, tan say baog da so nanmaliw ya amputi a siñga saray Nephite;

16 Tan saray malangwer a lalaki tan saray bibii ya anak da so nanmaliw ira a malimgas, tan sikara so nibilang ed limog na saray Nephite, tan atawag ira a Nephite. Tan dia ed onia nansampot so komalabintalo a taon.

17 Tan agawa dia ed ingapo na komalabinapat a taon, say bakal ed baetan na saray matatakew tan saray totoo nen Nephi so nampatuloy tan nanmaliw a mapalalo ya ansakit; manwari ya ontan, saray totoo nen Nephi so akagamor na taluna ed saray matatakew, dia ed onia asunson ira ed dalin da a papawil ed saray kapalandeyan tan dia ed saray maamot a pasen da.

18 Tan dia ed onia nansampot so komalabinapat a taon. Tan dia ed komalabinlima a taon sikara lamet so linma sumpa ed saray totoo nen Nephi; tan makaseñgeg ed karelmeñgan na saray totoo nen Nephi, tan lapu ed dakel a baliñgaan tan gotgotan, saray matatakew a Gadianton so akagamor na baleg a taluna ed sikara.

19 Tan dia ed onia nansampot so komalabinlima a taon, tan dia ed onia saray totoo so wala ed kipapasen na doknal; tan say espada na kadederal so mambibitin ed petek da, dia ed onia ñgalñgali to ra bakbaken, tan saya so lapu ed karelmeñgan da.