1 Ā, i pahawa ake, nā, i ngā apataki a Ihu e haere ana, ā, e kauhau ana i ngā mea i rangona ai me ngā mea i kitea ai e rātou, ā, e rumakina ana i runga i te ingoa o Ihu, i pahawa ake, nā, i te huihui tahi ngā apataki i runga i te inoi kaha me te nohopuku kaha.

2 Ā, ka whakakite atu anō a Ihu i a ia anō ki a rātou, nā te mea i te inoi rātou ki te Matua i runga i tōna ingoa; ā, ka haere mai a Ihu, ā, ka tū i waenganui i a rātou, ā, ka kī atu ki a rātou: He aha tā koutou e pai nā kia hoatu ai e ahau ki a koutou?

3 Ā, ka kī atu rātou ki a ia: E te Ariki, e hiahia ana mātou kia kōrerotia mai e koe he aha te ingoa e karangatia ai e mātou tēnei hāhi; nā te mea he tautohetohenga kei waenganui i te iwi e pā ana ki tēnei take.

4 Ā, ka kī atu te Ariki ki a rātou: He pono, he pono tāku e mea atu nei ki a koutou, he aha te take e amuamu nei, e tautohetohe nei tēnei iwi nā tēnei mea?

5 Kāore anō rātou kia pānui i ngā karaipiture, e mea ana me tango ake e koutou te ingoa o te Karaiti ki runga i a koutou, koia tōku ingoa? Nā te mea mā tēnei ingoa karangatia ai koutou hei te rā whakamutunga;

6 Ā, ko te tangata e tango ake ana i tōku ingoa ki runga ki a ia, me te ū ki te mutunga, koia anō te mea e whakaorangia ai hei te rā whakamutunga.

7 Nō reira, ko ngā mea katoa e mea ai koutou, ka mahia e koutou i runga i tōku ingoa; nō reira ka karangatia e koutou te hāhi i runga i tōku ingoa; ā, ka karangatia ake e koutou te Matua i runga i tōku ingoa kia manaakitia e ia te hāhi mōku te take.

8 Ā, me pēhea e waiho ake hei hāhi māku ki te kore e karangatia ake ki tōku ingoa? Nā te mea mēnā ka karangatia tētahi hāhi ki te ingoa o Mohi, arā, ko tā Mohi hāhi tēnā; ki te karangatia rānei i runga i te ingoa o tētahi tangata, arā, ko te hāhi tēnā o tētahi tangata; engari mehemea ka karangatia ake i runga i tōku ingoa, arā, ko taku hāhi tēnā, mehemea ka hangaia ake i runga i taku rongopai.

9 He pono tāku e mea atu nei ki a koutou, nā, kua hangaia ake koutou i runga i taku rongopai; nō reira ka karangatia e koutou ngā mea katoa e karangatia ai e koutou, i runga i tōku ingoa; nō reira ki te karangatia ake te Matua, mō te hāhi, ki te pērā i runga i tōku ingoa ka rangona koutou e te Matua;

10 Ā, ki te mea ka oti te hāhi te hanga ki runga ki taku rongopai kātahi te Matua e whakakite atu i āna ake mahinga i roto rā.

11 Engari ki te mea ehara i te mea hanga ki runga ki taku rongopai, ā, kua hangaia ki runga i ngā mahinga a te tangata, ki runga rānei i ngā mahinga a te rēwera, he pono tāku e mea atu nei ki a koutou ka whaihari rātou i ā rātou mahinga mō tētahi tau, nāwai, nāwai ka tata mai te mutunga, ā, ka tuakina iho rātou, ā, ka makaia atu ki roto i te ahi, kāore he hokinga mai i reira.

12 Nā, ka aru tahi ā rātou mahinga i a rātou, nā te mea mō ā rātou mahinga i tuakina iho ai rātou; nō reira me mahara ki ngā mea kua kōrerotia atu nei e au ki a koutou.

13 Nana kua hoatu e au taku rongopai ki a koutou, ā, koinei te rongopai nāku noa nei i hoatu ki a koutou—nā, i haere mai au ki roto i te ao kia mahia ai tā te Matua i pai ai, nā te mea i tonoa au e te Matua.

14 Ā, i tonoa au e te Matua kia whakairia ake ai ahau ki runga i te rīpeka; ā, hei muri iho i taku whakairinga ake ki runga i te rīpeka, kia kūmea ai ngā tāngata katoa ki ahau, i te mea ka oti ahau te whakiri ake ki runga i te rīpeka i te tangata ka pērā pū anō te whakairinga ake o te tangata e te Matua, kia tū ai i tōku aroaro, kia whakawākia mō ā rātou mahinga, mehemea i pai, mehemea rānei i kino—

15 Ā, mō tēnei take whakairia ake ai au; nō reira, e rite ana ki te mana o te Matua ka kūmea e ahau ngā tāngata katoa ki ahau, kia whakawākia ai rātou e rite ana ki ā rātou mahinga.

16 Ā, ka pahawa ake, ka whakakīa te hunga katoa e rīpenetā ai, ā, e rumakina ai i runga i tōku ingoa; ā, ki te ū ia ki te mutunga, nana, ka whakaharakoretia ia e ahau i te aroaro o tōku Matua hei te rā e tū ai au ki te whakawā i te ao.

17 Ā, ko te tangata e kore nei e ū ki te mutunga, koia anō te mea e tuakina iho ai, ā, e makaia ai ki roto i te ahi, kāore he hokinga mai i reira, nā te tika a te Matua.

18 Ā, koinei te kupu kua homai nei e ia ki ngā tamariki a te tangata. Ā, mō tēnei take ia whakatutuki ai i ngā kupu nāna nei i homai, ā, kāore āna rūkahu, engari ka whakatutuki i āna kupu katoa.

19 Ā, kāore e taea ana e tētahi mea poke te tomo atu ki roto ki tōna kīngitanga; nō reira kāore tētahi mea e tomo atu ki tōna okiokinga hāunga te hunga kua horoia ō rātou kākahu i roto i ōku toto, nā tō rātou whakapono, me te rīpenetātanga o ō rātou hara katoa, me tō rātou whakapono tae atu ki te mutunga.

20 Nā, koinei te whakahaunga: E rīpenetā, e koutou e ngā tōpito katoa o te ao, ā, haere mai ki ahau, ā, kia rumakina i runga i tōku ingoa, kia whakatapua koutou e te whiwhinga ki te Wairua Tapu, kia tū kohakore ai koutou i tōku aroaro hei te rā whakamutunga.

21 He pono, he pono tāku e mea atu nei ki a koutou, koinei taku rongopai; ā, e mōhio ana koutou e mahi ai koutou i taku hāhi; nā te mea ko ngā mahi kua kitea nei e koutou ahau e mahi ana ka meinga anō hoki e koutou; nā te mea ko ngā mea i kite ai koutou i ahau e mahi ana ka meinga anō e koutou;

22 Nō reira, ki te mahi koutou i ēnei mea ka manaakitia koutou, nā te mea ka whakaarahia ake koutou hei te rā whakamutunga.

23 Tuhia ngā mea kua kitea, ā, kua rangona, hāunga ērā mea kua whakahaua kia kaua.

24 Tuhia ngā mahinga a te iwi, e takoto ake nei ki te ritenga o te mea ka oti nei te tuhituhi mō ngā mea kua oti noa.

25 Nana rā, mai i ngā pukapuka kua tuhia, me ngā mea ka tuhia, e whakawākia ai tēnei iwi, nā te mea mā konā whakamōhiotia atu ai ā rātou mahinga ki te tangata.

26 Ā nana, kua tuhia ngā mea katoa e te Matua; nō reira ka whakawākia te ao mai i ngā pukapuka e tuhia ai.

27 Ā, kia mōhio ai koutou ka tū koutou hei kaiwhakawā mō tēnei iwi, e rite ana ki te whakawākanga e hoatu nei e ahau ki a koutou, koia hei mea tika. Nō reira, hei tāne pēhea koutou e tika ai? He pono tāku e mea atu nei ki a koutou, kia rite ki ahau.

28 Ināianei ā ka haere atu au ki te Matua. Ā, he pono tāku e mea atu nei ki a koutou, ka tukuna atu ki a koutou ngā mea katoa e inoi ake nei ki te Matua i runga i tōku ingoa.

29 Nō reira, uia, ā, ka whiwhi koutou; pātukia, ā, ka huakina ki a koutou; nā te mea ko te tangata e uia, ka whiwhia; ā, ki te tangata e pātukia, ka huakina.

30 Ināianei ā, nana, he nui taku koa, kī tonu, mō koutou, mō tēnei whakatipuranga anō hoki; āe rā, kei te hari anō hoki te Matua, me ngā anahera tapu anō hoki, mō koutou me tēnei whakatipuranga; nā te mea kāore tētahi o rātou i ngaro.

31 Nana, e hiahia ana ahau kia mārama koutou; nā te mea ko tāku e mea nei ko te hunga o tēnei whakatipuranga e ora ana i tēnei wā; ā, kāore tētahi o rātou i ngaro; ā, he ranea taku hari i a rātou.

32 Engari nana, e pōuri ana au nā te whakatipuranga tuawhā o tēnei whakatipuranga, nā te mea kua ārahina mauheretia atu e ia, arā, ko te tama o te whakangaromanga pū anō; nā te mea ka hokona atu au e rātou mō te hiriwā me te kōura, ā, mō taua mea e pirau ai i te kōwenewene me ngā mea e whatia atu ai e ngā kaitāhae, ā, ka tāhaea atu. Ā, hei taua rā māku rātou e toro atu, ā, ka whakahokia ā rātou mahinga ki runga ki ō rātou ake māhunga.

33 Ā, i pahawa ake, nā, i te wā i whakakapia e Ihu ēnei kōrero ka kī atu ia ki ana apataki: Tomokia atu ki te tomokanga tōtika; nā te mea he tōtika te tomokanga, ā, he kūiti te huarahi e ārahina atu ana ki te oranga, ā, he ruarua noa te hunga e kitea ai, engari he whārahi te tomokanga, ā, he whānui anō te huarahi e ārahina atu ana ki te matenga, ā, he tokomaha te hunga e haere nei i reira, tae atu ki te taunga ihotanga o te pō, kāore e taea ana e tētahi te mahi i reira.