1 Ne biakalua ne tuakabanga kabidi kushikika bukalenga ne tuakabanga kabidi kuasa mu bulaba mu ditalala. Ne ngakenzeja biluilu bia mvita bia mishindu yonsu, nanku bua ngikala ne biluilu bua bantu banyi bua kuluangana ne Bena Lamana diba dikalabu balua kuluisha bantu banyi.

2 Ne ngakateka balami ku mpenga ya bulaba yonsu, bua Bena Lamana kabatuluidi patudi katuyi bamanya ne batubutula; ne nanku ngakalamisha bantu banyi ne bisumbu bia bimuna bianyi, ne ngakabalama bua kabaponyi mu bianza bia bena lukuna betu.

3 Ne biakalua ne tuakapiana bulaba bua batatuetu bidimu bia bungi, eyowa, bua mutantshi wa bidimu makumi abidi ne bibidi.

4 Ne ngakadimisha baluma buloba, ne basashisha mishindu yonsu ya nteta ne mishindu yonsu ya mamuma a nkuaminu yonsu.

5 Ne ngakenzeja ne bakaji bonsu basala buanda, ne bakuata mudimu, ne benza mudimu wa mishindu yonsu ya lin muimpa, eyowa, ne bilulu bia mishindu yonsu, bua tuvuadika butaka buetu; ne nanku tulubuluka mu bulaba—nanku tuvua ne ditalala ditungunuka mu bulaba bua mutantshi wa bidimu makumi abidi ne bibidi.

6 Ne biakalua ne mfumu Lamana wakafua, ne muanenda wa baluma wakabanga kukôkesha pa muaba wenda. Ne wakabanga kusonsola bantu benda ku ditombokela bantu banyi; bua nanku bakabanga kulongolola mvita, ne kulua kuluisha bantu banyi.

7 Kadi ngakatuma batentekedi ku mpenga yonsu ya bulaba bua Shemelona, bua manyi bulongolodi buabu, bua ndilama kudibu, bua kabalu kuluila bantu banyi ne bababutula.

8 Ne biakalua ne bakaluila ku node kua bulaba bua Shiloma, ne misumba yabu ya bungi, baluma bambula mata, ne miketa, ne miela ya mvita, ne tuela tua mvita, ne mabua, ne bieledi; ne mitu yabu ivua mikungula mikala mitupu; ne bavua basuika mukaba wa tshiseba ku bimonu biabu.

9 Ne biakalua ne ngakasokokesha bakaji ne bana ba bantu banyi mu tshipela; ne ngakenzeja kabidi ne baluma bakola bonsu bavua mua kuambula biluilu, ne kabidi bansongaluma bonsu bavua bakumbana mua kuambula biluilu, badisangisha pamua bua kuya kuluangana ne Bena Lamana; ne ngakabateka ku mianzu yabu, muntu yonsu bilondeshila ku bidimu bienda.

10 Ne biakalua ne tuakabanda kuluangana ne Bena Lamana; ne mema, mema mena, mu bukulakaja buanyi, ngakabanda kuluangana ne Bena Lamana. Ne biakalua ne tuakabanda kuluangana ne bukola bua Mukalenga.

11 Mpindiewu, Bena Lamana kabavua bamanya tshintu tshitangila Mukalenga to, anyi makanda a Mukalenga to, bua nanku bavua beyemena ku makanda abu nkayabu. Kadi bavua bantu ba makanda, bu mudi makanda a bantu.

12 Bavua bantu badi kabayi ne nshidimukilu to, ne ba tshikisu, ne bakebi ba kumatshisha kua mashi, bitabuija ngikadilu wa batatuabu, udi nanku—Kuitabuija ne bavua bipatshibua ku bulaba bua Yelushalema bua mibi ya batatuabu, ne bavua babenzela bibi mu tshipela kudi bana babu, ne bavua babenzela bibi pavuabu basabuka mbuwa;

13 Ne kabidi, ne bavua babenzela bibi pavuabu ku bulaba bua diambedi bua bupianyi buabu, kunyima kua bobu basambuka mbuwa, ne bionsu ebi bualu bua Nefi uvua ne lulamatu lupita mu dilama mikenji ya Mukalenga—bua nanku uvua musuibua kudi Mukalenga, bualu Mukalenga wakumvua masambila enda ne waka’itaba, ne wakapita ku mpala bua kubaleja njila wa luendu wa mu tshipela.

14 Ne bana babu bakamufîkila tshiji bualu kabavua bumvua ngenzelu ya Mukalenga to; bakamufîkila tshiji kabidi pa mâyi bualu bakapapishila Mukalenga mitshima yabu.

15 Ne kabidi, bakamufîkila tshiji pakafikabu ku bulaba bulaya, bualu bakamba ne uvua mubanyenga bukôkeshi bua bantu mu bianza biabu; ne bakakeba mua kumushipa.

16 Ne kabidi, bakamufîkila tshiji bualu wakaya mu tshipela bu muvua Mukalenga mumuelela mukenji, ne wakangata miandiku ivua mikanunyibua pa bitata bia kalabi, bualu bakamba ne uvua mubinyenga.

17 Ne nanku bakalongesha bana babu ne babakina, ne babashipa, ne babanyenga ne babapawula, ne benza bionsu bidibu mua kuenza bua kubabutula; bua nanku badi ne lukinu lua tshiendelela kudi bana ba Nefi.

18 Bua bualu ebu mena mfumu Lamana, ku budimu buenda, ne dikazamuka dia mafi, ne malaya enda mimpa, wankandinga, bua abueja bantu banyi mu bulaba ebu, bua bababutula; eyowa, ne tuakakenga bidimu bia bungi mu bulaba.

19 Ne mpindiewu mema, Zenife, kunyima kua kuambila bantu banyi bintu bionsu ebi bitangila Bena Lamana, ngakabasaka bua kuya kuluangana ne bukola buabu, beyemena kudi Mukalenga; bua nanku, tuakakokangana nabu, mpala ne mpala.

20 Ne biakalua ne tuakabipita kabidi mu bulaba buetu; ne tuakabashipa ne dishibeya dikola, mena ba bungi bua ne katuakababala to.

21 Ne biakalua ne tuakapingana kabidi ku bulaba buetu nkayetu, ne bantu banyi bakabanga kabidi kudisha bisumbu bia bimuna biabu ne kudima buloba buabu.

22 Ne mpindiewu mema, ndi mukulakaja, ngakambikila umua wa bana banyi ba baluma bukalenga; bua nanku, ntshiena ngakula kabidi to. Ne Mukalenga abenesha bantu banyi. Amena.