1 Ne mpindiewu biakalua ne pakajikija Abinadi mêyi â, mfumu wakafila mukenji ne bakuidi bamukuata ne bamushipesha.

2 Kadi kuvua muntu umua munkatshi muabu uvua ne dîna dia Alama, yeya muikala kabidi kankanunuina ka Nefi. Ne uvua nsongaluma, ne wakitabuija mêyi avua Abinadi muamba, bualu uvua mumanya malu mabi abu avua Abinadi mujadika; bua nanku wakabanga kusengelela mfumu bua kafîkidi Abinadi tshiji to, kadi amulekela bua aya mu ditalala.

3 Kadi mfumu wakafîka tshiji tshipita, ne wakenza ne Alama ipatshibua munkatshi muabu, ne wakatuma basadidi benda bua bamulonda bua bamushipa.

4 Kadi yeya wakanyema kumpala kuabu ne wakadisokoka bua kabamupetshi to. Ne muvuaye musokoma matuku a bungi wakafunda mêyi onsu avua Abinadi muamba.

5 Ne biakalua ne mfumu wakanyunguluja ne wakukuatshisha Abinadi kudi balami benda; ne bakamusuika mionji ne bakamuela mu lukanu.

6 Ne kunyima kua matuku asatu, ne mumana kuyikilangana ne bakuidi benda, wakenzeja ne balua nenda kumpala kuenda.

7 Ne yeya wakamuambila ne: Abinadi, tudi bapeta difunda kûdi, ne udi mukumbanyina lufu.

8 Bualu wewa uvua muamba ne Nzambi nkayenda nealua panshi munkatshi mua bana ba bantu; ne mpindiewu, bua bualu ebu neushipibua, amba amu wewa mukudimuna mêyi mabi onsu awuvua muakula mbitangila mema ne bantu banyi.

9 Mpindiewu Abinadi wakamuambila ne: Ndi nkuambila ne, ntshiakukudimuna mêyi amvua mukuambila bitangila bantu aba to, bualu adi malelela; ne bua wewa kumanya bushua buawu mema ndi mudilekela bua kudifila mu bianza bieba.

10 Eyowa, nenkenga mena tô ne ku lufu, ne ntshiakukudimuna mêyi anyi to, ne neashala bu bujadiki budi bunupîsha. Ne wewa mmushipa neumatshisha mashi a muntu udi kayi ne tshilema to, ne etshi netshishala kabidi bu bujadiki bua dipîla dienu ku dituku dia ndekelu.

11 Ne mpindiewu mfumu Noa uvua pabuipi ne kumulekela, bualu bua wakatshina mêyi enda; bualu wakatshina ne bitungu bia Nzambi nebilua pa mutu penda.

12 Kadi bakuidi bakabandisha mêyi abu bamubenga, ne bakabanga kumubanda, bamba ne: Yeya uvua mupenda mfumu. Bua nanku mfumu wakasonsodibua bua kumufîkilaye tshiji, ne wakamufila bua bamushipa.

13 Ne biakalua ne bakamuangata ne bakamusuika mionji, ne bakamunyasula mubidi wenda ne bisumbu bia minyasu, eyowa, mena ne ku lufu.

14 Ne mpindiewu pakabanga ndimi ya kapia kumôsha, wakabila kudibu, wamba ne:

15 Monayi, mena bu nudi bangenza, ki muafikabi ne ndelanganyi yenu nebakengesha ba bungi ne makenga andi nkenga, makenga mena a lufu ku kapia; ne ebi bualu badi bitabuija lupandu lua kudi Mukalenga Nzambi wabu.

16 Ne nebilua ne nenutatshishibua ne mishindu yonsu ya mabêdi bua bualu bua malu mabi enu.

17 Eyowa, ne nenutûtshibua ku nseka yonsu, ne nenuipatshibua ne nenutangalajibua eku ne eku, mena bu mudi tshisumbu tshia nyama ya dîtu tshipatshibua kudi nyama ya dîtu ne ya tshikisu.

18 Ne mu dituku adi nebanuipatakaja, ne tshianza tshia bena lukuna benu netshinukuata, ne pashisha nenukenga makenga a lufu ku kapia, bu mundi nkenga.

19 Nanku Nzambi neenza disombuela dienda pa mutu pa badi bashipa bantu benda. Ô Nzambi, angata anyima wanyi.

20 Ne mpindiewu, pakamba Abinadi mêyi â, wakapona, muikala mukenga lufu ku kapia; eyowa, muikala mushipibua bualu bua wakabenga kuvila mikenji ya Nzambi, muikala mujadika bulelela bua mêyi enda ku lufu luenda.