Mukanda wa Mosiya

1 Ne mpindiewu kakuvua kabidi dikokangana mu bulaba bujima bua Zalahemela, munkatshi mua bantu bonsu bavua ba mfumu Benyamina, bua ne mfumu Benyamina uvua ne ditalala ditungunuka mu matuku enda onsu avua mashala.

2 Ne biakalua ne wakapeta bana ba baluma basatu; ne wakabapesha mêna a Mosiya, ne Helolume, ne Helamana. Ne wakenzeja ne balongeshibua muakulu onsu wa batatuenda, nanku bua balua bantu ba ngumvuilu; ne bua bamanya bitangila mambi avua mamba mukana mua batatuabu, avua mabapesha ku tshianza tshia Mukalenga.

3 Ne wakabalongesha kabidi bitangila miandiku ivua mikanunyibua pa bitata bia kalabi, wamba: Bana banyi ba baluma, ndi musua ne nuvuluka ne bu kabuyi bikala bua bitata ebi, bidi ne miandiku eyi ne mikenji eyi, tuvua ne tshia kuikala bashala mu dipanga dia meji, nansha mu tshikondu etshi, katuyi bamanya malu masokoka a Nzambi to.

4 Bualu kakuvua mushindu bua tatuetu, Lehi, kuvuluka bintu bionsu ebi, bua kubilongesha bana benda, pa kumbusha bikala bua diambuluisha dia bitata ebi; bualu yeya uvua mulongeshibua mu muakulu wa Bena Ejipitu uvua mua kubala mikanunu eyi, ne kuyilongesha bana benda, nanku bua bavua mua kuyilongesha kudi bana babu, ne nanku bakumbaja mikenji ya Nzambi, mena tô ne ku tshikondu etshi.

5 Ndi nnuambila, bana banyi, ne bu kabuyi bua bintu ebi, bivua bikala bilama ne bikuba kudi tshianza tshia Nzambi, bua tuetu kubala ne kumvua malu masokoka enda, ne tuetu kuikala ne mikenji yenda diba dionsu ku mesu etu, ne nansha batatuetu bavua bua kushinguluka mu dipanga dia ditabuija, ne tuvua bua kuikala bu mudi bana betu, Bena Lamana, badi kabayi bamanya tshintu bitangila bintu ebi to, anyi mena kabena babitabuija padibu babalongeshabi to, bua ngikadilu ya batatuabu, idi kayiyi miakana to.

6 Ô bana banyi ba baluma, ndi musua ne nuvuluka ne mêyi â adi malelela, ne kabidi miandiku eyi idi milelela. Ne monayi, kabidi bitata bia Nefi, bidi ne miandiku ne mêyi a batatuetu katshia ku tshikondu tshiakumbukabu ku Yelushalema tô ne mpindiewu, ne bidi bilelela; ne tudi mua kumanya bushuwa buabi bualu tudi nabi ku mesu etu.

7 Ne mpindiewu, bana banyi ba baluma, ndi musua ne nuvuluka bua kubikebulula ne dinanukila bua nupetamu tshipeta tshimpa; ne ndi musua bua nulama mikenji ya Nzambi, bua numona mua kulubuluka mu bulaba bilondeshila milayi ivua Mukalenga mulaya batatuetu.

8 Ne mfumu Benyamina wakalongesha bana benda ba baluma bintu bikuabu bia bungi, bivua kabiyi bifunda mu mukanda ewu.

9 Ne biakalua ne kunyima kua mfumu Benyamina mujikija kulongesha bana benda ba baluma, ne mulua mununu, ne wakamona ne uvua ne tshia kuya katataka ku njila bantu bonsu; bua nanku, wakela meji ne bivua bikengedibua ne ambikila umua wa bana benda ba baluma bukalenga.

10 Bua nanku wakavuija Mosiya kumpala kuenda; ne â adi mêyi akamuambilaye, wamba: Muananyi wa baluma, ndi musua ne wenza dimanyisha mu bulaba bonsu ebu mu bantu bonsu aba, anyi bantu ba Zalahemela, ne bantu ba Mosiya badi basomba mu bulaba, nanku bua badisangisha pamua; bualu malaba nemmanyisha bantu banyi aba ku mukana muanyi nkayanyi ne udi mfumu ne mukôkeshi pa bantu aba, bavua Mukalenga Nzambi wetu mutupesha.

11 Ne menamena kabidi, ne mpesha bantu aba dîna, bua nanku bikala basunguludibua kupita bantu bonsu bavua Mukalenga Nzambi mupatula mu bulaba bua Yelushalema; ne ndi ngenza nanku bualu bavua bantu bananukidi mu dilama dia mikenji ya Mukalenga.

12 Ne ndi mbapesha dîna didi kadiyi mua kukupudibua nansha, pa kumbusha ku disambuka dia mikenji.

13 Eyowa, ne menamena kabidi, ndi ngamba kunudi, ne biapona bantu abu basuibua bikola kudi Mukalenga mu disambuka mikenji, ne kulua bantu babi ne ba masandi, Mukalenga neabafila, nanku bua balua bateketa bu mudi bana babu; ne kakubakuba kabidi ku bukola buenda budi kabuyi kufuanyikija ne bua dikema, bu mudiye mukuba batatuetu tô ne apa to.

14 Bualu ndi nkuambila ne, bu yeya kayi môlola diboku dienda bua kukuba batatuetu to, bavua ne tshia kupona mu bianza bia Bena Lamana, ne kulua kukenga bua lukinu luabu.

15 Ne biakalua ne kunyima kua mfumu Benyamina mujikija kuambila muanenda mêyi â, wakamupesha bujitu bua malu onsu a bukalenga.

16 Ne menamena kabidi, wakamupesha kabidi bujitu bua miandiku ivua mikanunyibua pa bitata tshiamua tshia kalabi ne kabidi bitata bia Nefi; ne kabidi, muela wa mvita wa Labana, ne dibulungu, anyi tshileji njila, tshiakalombola batatuetu mu tshipela, tshivua tshilongolola kudi tshianza tshia Mukalenga bua bamona mua kolombodibua kuditshi, muntu yonsu bilondeshila ntema ne dinanukila bivuabu bafila kudiye.

17 Bua nanku, bu muvuabu kabayi ne lulamatu to kabakalubuluka anyi kuya kumpala mu luendu luabu to, kadi bavua bapingajibua panyima, ne badikebela dibungama dia Nzambi; ne bua nanku, bavua batûtshibua ne tshiyola ne ntatu mikola, bua kubasonsola ku divuluka dia mudimu wabu.

18 Ne mpindiewu, biakalua ne Mosiya wakaya ne kuenza muakamupeshela tatuenda mikenji, ne wakamanyisha bantu bonsu bavua mu bulaba bua Zalahemela, nanku bua badisangisha pamua, bua kubanda ku ntempelo bua kumvua mêyi abambila tatuenda.