1 Ne biakalua ne Limihi ne bantu benda bakapingana ku tshimenga tshia Nefi, ne bakabanga kusomba mu bulaba kabidi ne ditalala.

2 Ne biakalua ne kunyima kua matuku a bungi Bena Lamana bakabanga kabidi kusonsodibua ku ku difikila Bena Nefi tshiji, ne bakabanga kulua mu mikalu ya bulaba bua ku mpenga yonsu.

3 Mpindiewu kabakakima kubashipa to, bua mutshipu uvua mfumu wabu mutshipa kudi Limihi, kadi bavua babatûta mapi pa matama, ne bavua benzela bukôkeshi pa mutu pabu; ne bakabanga kuteka majitu makola pa nyima yabu, ne kubasaka bu mudi mpunda wa kamama—

4 Eyowa, bionsu abi bivua bienzeka bua dîyi dia Mukalenga dikumbajibua.

5 Ne mpindiewu ntatu ya Bena Nefi ivua mikola, ne kakuvua mushindu nansha umua wa kudipatuisha mu bianza biabu to, bualu Bena Lamana bavua babanyungulula ku luseka lonsu.

6 Ne biakalua ne bantu bakabanga kunungana kudi mfumu bua ntatu yabu; ne bakabanga kujinga kuya kubaluisha mvita. Ne bakatatshisha mfumu bikola ne madilakangana abu; bua nanku wakabanyishila bua benza bilondeshila ku majinga abu.

7 Ne bakadisangisha pamua kabidi, ne kuvuala biluilu, ne kuya kuluisha Bena Lamana bua kubipata mu bulaba buabu.

8 Ne biakalua ne Bena Lamana bakabatamba, ne bakabapingaja panyima, ne bakashipa bangi babu.

9 Ne mpindiewu kuvua madilu a bungi ne muadi munkatshi mua bantu ba Limihi, mukaji mukamba udila bayenda, muana wa baluma ne muana wa bakaji badila tatuabu, ne bana ba baluma bua bana babu ba baluma.

10 Mpindiewu kuvua bakaji bakamba ba bungi mu bulaba, ne bakabila ne bukitu ku dituku ne ku dituku, bualu bôwa bukola bua Bena Lamana buvua bubakuata.

11 Ne biakalua ne mbila yabu ya munanunanu yakasonsola tshishadi tshia bantu ba Limihi ku tshiji bua Bena Lamana; ne bakaya kabidi ku mvita, kadi bakabapingaja panyima kabidi, ne bakapeta dijimija dia bantu ba bungi.

12 Eyowa, bakaya kabidi mena musangu muisatu, ne bakapeta dijimija dia momumua; ne bavua kabayi bashipibua to bakapingana kabidi ku tshimenga tshia Nefi.

13 Ne bakadipuekesha mena tô ne ku lupuishi, badibatshika ku tshikokedi tshia bupika, bakôkela bua kutûtshibua, ne bua kuendeshibua eku ne eku, ne bambuishibua majitu, bilondeshila ku majinga a bena lukuna babu.

14 Ne bakadipuekesha mena mu ndondu ya didipuekesha; ne bakabila ne bukitu kudi Nzambi; eyowa, mena dituku dijima bakabila kudi Nzambi bua kubapatuishaye mu ntatu yabu.

15 Ne mpindiewu Mukalenga uvua ne lujoku bua kumvua lubila luabu bua malu mabi abu; nansha nanku Mukalenga wakateleja mbila yabu, ne wakabanga kutekesha mitshima ya Bena Lamana muakabangabu kupepeja majitu abu; kadi Mukalenga kakamona bikumbana bua kubapatuisha mu bupika to.

16 Ne biakalua ne bakabanga kulubuluka ku kakesa ku kakesa mu bulaba, ne kubanga kudima nteta mipita bungi, ne kumuna bisumbu bia bimuna bikesa, ne bia bimuna binena, ne kabakafua ne nzala to.

17 Mpindiewu kuvua bungi bunena bua bantu bakaji, kupita bantu baluma bavuaku; bua nanku mfumu Limihi wakela mukenji ne muntu muluma yonsu afila bimua bia ku bintu bienda bua dikuatshisha dia bakaji bakamba ne bana babu, bua kabafu bua nzala to; ne bakenza nanku bua bungi bunena bua bavua bashipibua.

18 Mpindiewu bantu ba Limihi bashala pamua mu tshisumbu tshimua mushindu onsu uvuaku, ne bakalama nteta yabu ne bisumbu bia bimuna biabu;

19 Ne mfumu yeya muina kavua upatuka pambelu pa bimanu bia tshimenga to, amu yeya muya ne balami benda bakubi, bualu uvua utshina ne uvua mua kupona ku mushindu kampanda mu bianza bia Bena Lamana.

20 Ne wakenzeja ne bantu benda batentekela bulaba bua ku mpenga yonsu, bua kukuatabu ku mushindu kampanda bakuidi bavua banyema mu tshipela, bavua bîba bana ba bakaji ba Bena Lamana, ne bavua bavuija dinyanguka dinena kudibu.

21 Bualu bavua bajinga kubakuata bua kubanyokabu; bualu bavua babuela mu bulaba bua Nefi butuku, ne bavua bambula nteta yabu ne bintu biabu bia mushinga mukola bia bungi; bua nanku bavua bakasokoma babindila.

22 Ne biakalua ne kakuvua kabidi disalu munkatshi mua Bena Lamana ne bantu ba Limihi to, mena tô ne diba diakalua Amona ne bana babu babuela bulaba.

23 Ne pavua mfumu muikala pambelu pa bibuelelu bia ku tshimenga ne balami benda, wakamona Amona ne bana babu; ne bualu wakatshinka ne bavua bakuidi ba Noa bua nanku wakabakuatshisha, ne wakabasuikisha, ne wakabelesha mu buloku. Ne bu bobu bikala bakuidi ba Noa uvua bua kubashipesha.

24 Kadi pakamanyaye ne kabavua bobu to, kadi ne bavua bana babu, ne bavua bafuma ku bulaba bua Zalahemela, wakuwula ntenta ne disanka dikola menamena.

25 Mpindiewu mfumu Limihi uvua mutuma, kumpala kua dilua dia Amona, tshisumbu tshikesa tshia baluma bua kukeba bulaba bua Zalahemela; kadi kabakabupeta to, ne bakajimina mu tshipela.

26 Nansha nanku, bulaba buvua ne bantu; eyowa, bulaba buvua buwula ne mifuba miuma; eyowa, bulaba buvua ne bantu ne buvua bubutuka; ne bualu bobu bakatshinka ne buvua bulaba bua Zalahemela, bakapingana ku bulaba bua Nefi, ne bakafika ku mikalu ya ku bulaba butuku bukesa kumpala kua dilua dia Amona.

27 Ne bakalua ne miandiku, mena miandiku ya bantu bena mifuba yakasanganabu; ne ivua mikanunyibua pa bitata bia tshimua.

28 Ne mpindiewu Limihi wakuwula kabidi ne disanka pakamanyaye ku mukana mua Amona ne mfumu Mosiya uvua ne dipa dia Nzambi, divuaye mua kuandamuna nadi miakulu ya mikanunu ya buena eyi; eyowa, ne Amona wakasanka penda.

29 Kadi Amona ne bana babu bavua buwula ne kanyinganyinga bualu bangi ba ku bana babu bavua bashipibua;

30 Ne kabidi bualu mfumu Noa ne bakuidi benda bavua benzeja bantu mibi ya bungi menamena ne malu mabi kumpala kua Nzambi; ne bakadila kabidi bua lufu lua Abinadi; ne kabidi bua diya dia Alama ne bantu bakaya nenda, bavua benza ekelezia wa Nzambi ku bukola ne bukôkeshi bua Nzambi, ne ditabuija ku mêyi avua Abinadi muakula.

31 Eyowa, bakadila bua diya diabu, bualu kabavua bamanya kuvuabu banyemena to. Mpindiewu bavua kuikala badisangisha nabu ne disanka, bualu bobu nkayabu bavua babuela mu tshipungidi ne Nzambi bua kumusadila ne ya kulama mikenji yenda.

32 Ne mpindiewu katshia ku dilua dia Amona, mfumu Limihi wakabuela penda mu tshipungidi ne Nzambi, ne bangi ba ku bantu benda pabu bakabuela mu tshipungidi ne Nzambi, bua kumusadila ne kulama mikenji yenda.

33 Ne biakalua ne mfumu Limihi ne bangi ba ku bantu benda bakajinga bua kutambuishibua; kadi kakuvua muntu nansha umua mu bulaba uvua ne bukôkeshi bufuma kudi Nzambi to. Ne Amona wakabenga bua kuenza mudimu ewu, bualu uvua mudimona bu musadidi udi kayi mukumbana to.

34 Bua nanku kabakadisangisha bu mudi ekelezia diba adi to, kadi bakindila Nyuma wa Mukalenga. Mpindiewu bavua bajinga kuluabu mena bu muvua Alama ne bana babu, bavua banyema mu tshipela.

35 Bavua bajinga kutambuishibua bu njadikilu ne bujadiki ne bavua bitaba bua kusadila Nzambi ne mitshima yabu yonsu; nansha nanku bakindila diba dia bobu kutambuishibua; ne mulubu wa ditambula diabu neufidibua panyima.

36 Ne mpindiewu meji onsu a Amona ne bantu benda, ne a mfumu Limihi ne bantu benda, avua bua kudipatuisha mu bianza bia Bena Lamana ne mu bupika.