1 Ne biakalua ne Amulona wakasuibua ku mesu a mfumu wa Bena Lamana; bua nanku, mfumu wa Bena Lamana wakamuanyishila bua yeya ne bana babu bikala basungula balongeshi ba bantu benda, eyowa, mena ba bantu bavua mu bulaba bua Shemelona, ne mu bulaba bua Shiloma, ne mu bulaba bua Amulona.

2 Bualu Bena Lamana bavua bangata malaba onsu â; bua nanku, mfumu wa Bena Lamana wakateka bamfumu ku mutu kua malaba onsu â.

3 Ne mpindiewu dîna dia mfumu wa Bena Lamana divua Lamana, muinyikila tatuenda; ne bua nanku uvua ubikidibua ne mfumu Lamana. Ne uvua mfumu wa bantu ba bungi.

4 Ne wakasungula balongeshi munkatshi mua bana babu ne Amulona mu bulaba bonsu buvua bantu benda basamu; ne bakabanga nanku kulongesha muakulu wa Nefi munkatshi mua bantu bonsu ba Bena Lamana.

5 Ne bavua bantu ba bulunda munkatshi muabu; nansha nanku kabavua bamanya Nzambi to; anyi bana babu ne Amulona kabakabalongesha tshintu nansha tshimua bitangila Mukalenga Nzambi wabu to, anyi mikenji ya Mose to; anyi kabakabalongesha mêyi a Abinadi to;

6 Kadi bakabalongesha bua balama miandiku yabu, ne bafundilangana.

7 Ne nanku Bena Lamana bakabanga kukola mu mabanji, ne bakabanga kuendelangana mushinga ne kulua babanji, ne bakabanga kulua bantu ba budimu ne badimuka, mu didimuka dia ba pa buloba, eyowa, bantu bapita budimu, bansaka mu mishindu yonsu ya bubi ne dipawula dia bintu bia benda, pa kumbusha munkatshi mua bana babu.

8 Ne mpindiewu biakalua ne Amulona wakabanga kuenzela bukôkeshi pa mutu pa Alama ne bana babu, ne wakabanga kumukengesha, ne kuenzeja ne bana benda bakengesha bana ba Alama ne bana ba bana babu.

9 Bualu Amulona uvua mumanya Alama, ne uvua umua wa bakuidi ba mfumu, ne yeya uvua muitabuija mêyi a Abinadi ne bavua bamuipata kumpala kua mfumu, ne bua nanku wakamufîkila tshiji; bualu uvua ku bukôkeshi bua mfumu Lamana, kadi uvua wenzela bukôkeshi pa mutu pabu; ne wakabapesha midimu pa mutu pabu, ne wakabatekela tupita tua midimu.

10 Ne biakalua ne ntatu yabu avua mapita bukola bua ne bakabanga kubila ne bukitu kudi Nzambi.

11 Ne Amulona wakabelela mukenji bua balekela mbila yabu; ne wakatekela balami bua kubatentekelabu, bua ne ewu yonsu uvua usanganyibua ubikila Nzambi uvua ushipibua.

12 Ne Alama ne bantu benda kabakabandisha mêyi abu kudi Mukalenga Nzambi wabu to, kadi bakakudimuna mitshima yabu kudiye; ne uvua mumanya meji abu ne majinga a mitshima yabu.

13 Ne biakalua ne dîyi dia Mukalenga diakabaluila mu ntatu yabu, diamba ne: Ambululayi mitu yenu ne sangalayi, bualu ndi mumanya tshipungidi tshinuakenza nanyi; ne nengenza tshipungidi ne bantu banyi ne nembapatuisha mu bupika.

14 Ne nempepeja kabidi majitu adi mateka pa makaya enu, bua kanuwumvu mena pa nyima yenu to, mena panutshidi mu bupika; ne nengenza nanku bua kunyima nuikala bajadiki banyi, ne bua numanya bushuwa ne mema, Mukalenga Nzambi, ndi nkumbula bantu banyi mu ntatu yabu.

15 Ne mpindiewu biakalua ne majitu avua mateka pa mutu pa Alama ne bana babu akalua mapepela; eyowa, Mukalenga wakabakolesha bua bobu kuambulabu majitu abu kakuyi lutatu to, ne bakakôkela ku disua dionsu dia Mukalenga ne disanka ne ditukija.

16 Ne biakalua ne ditabuija diabu ne ditukija diabu bivua bipita binena, bua nanku dîyi dia Mukalenga diakabaluila kabidi, diamba ne: Sangalayi, bualu malaba nennupatuisha mu bupika.

17 Ne wakambila Alama ne: Neuya kumpala kua bantu aba, ne nenya neba ne nempatuisha bantu aba mu bupika.

18 Mpindiewu biakalua ne Alama ne bantu benda bakasangisha bisumbu bia bimuna biabu pamua butuku, ne kabidi imua ya nteta yabu; eyowa, bavua basangisha bisumbu bia bimuna biabu pamua mena butuku bonsu.

19 Ne mu dinda Mukalenga wakaladisha Bena Lamana tulu tukola, eyowa, ne tupita tuabu tonsu tua midimu tuvua tulala tulu tukola.

20 Ne Alama ne bantu benda bakaya mu tshipela; ne pakendabu luendu dituku dijima bakâsa ntenta yabu mu tshibanda, ne bakinyika tshibanda ne tshibanda tshia Alama, bualu uvua ulombola njila wabu mu tshipela.

21 Eyowa, ne mu tshibanda tshia Alama bakela Nzambi tuasakidila tuabu bualu uvua ne lusa kudibu, ne uvua mupepeja majitu abu, ne uvua mubapatuisha mu bupika; bualu bavua mu bupika, ne muntu nansha umua kavua mua kubapatuisha to pa kumbusha kabiyi Mukalenga Nzambi wabu.

22 Ne bakela Nzambi tuasakidila, eyowa, bantu baluma babu bonsu ne bantu bakaji babu bonsu ne bana babu bonsu bavua mua kuakula bakajula mêyi abu mu disamuna dia Nzambi wabu.

23 Ne mpindiewu Mukalenga wakambila Alama ne: Ambuluja ne patuka wewa ne bantu aba mu bulaba ebu, bualu Bena Lamana babiki ne badi bakulondakaja; bua nanku patuka mu bulaba ebu, ne nengimanyika Bena Lamana mu tshibanda etshi bua kabatungunuki kulondakaja bantu aba to.

24 Ne biakalua ne bakashiya tshibanda, ne bakâsa luendu luabu batangila mu tshipela.

25 Ne kunyima kua benza matuku dikumi ne abidi mu tshipela bakafika mu bulaba bua Zalahemela; ne mfumu Mosiya wakabakidila kabidi ne disanka.