1 Ne mpindiewu mfumu Mosiya wakenza ne bantu bonsu basangishibua pamua.

2 Mpindiewu bungi bua bana ba bantu ba Zalahemela, uvua kankanunuina ka Muleke, ne bakalua ne Zalahemela mu tshipela, buvua bua bungi bupita bungi bua bana ba Nefi, anyi bungi bua bavua tunkanunuina tua Nefi.

3 Ne bantu ba Nefi ne bantu ba Zalahemela kabavua ba bungi bu muvua bantu ba Bena Lamana to; eyowa, kabavua nansha bungi bua tshia bibidi tshia Bena Lamana to.

4 Ne mpindiewu bantu bonsu ba Nefi bavua basangila pamua, ne bantu bonsu ba Bena Zalahemela kabidi, ne bavua basangila pamua mu bisumbu bia bantu bibidi.

5 Ne biakalua ne Mosiya wakabala, ne wakabadisha, miandiku ya Zenife kudi bantu benda; eyowa, wakabala miandiku ya bantu ba Zenife, katshia ku tshikondu tshiakumbukabu ku bulaba bua Zalahemela tô ne pakapinganabu kabidi.

6 Ne wakabala kabidi mulubu wa Alama ne bana babu, ne ntatu yabu yonsu, katshia ku tshikondu tshiakumbukabu ku bulaba bua Zalahemela tô ne ku tshikondu tshiakapinganabu kabidi.

7 Ne mpindiewu, pakajikija Mosiya kubala miandiku, bantu benda bavua bashala mu bulaba bakakumibua ne dikema ne dikatshila.

8 Bualu kabakamanya tshia kuamba; bualu pakamonabu bavua bapatuishibua mu bupika bakuwula ne disanka dinena menamena.

9 Ne kabidi, pakelabu meji a bana babu bavua Bena Lamana bashipa bakuwula ntenta ne kanyinganyinga, ne bakapuekesha binsonji mena bia bungi bia kanyinganyinga.

10 Ne kabidi, pakelabu meji ku buimpa bua Nzambi nkayenda, ne bukola buenda bua kupatuisha Alama ne bana babu mu bianza bia Bena Lamana ne mu bupika, bakabandisha mêyi abu ne bakela Nzambi tuasakidila.

11 Ne kabidi, pakelabu meji a Bena Lamana, bavua bikala bana babu, bitangila ngikadilu wabu wa mibi ne wa bukoya, bakuwula ntenta ne dikenga ne dipampakana bua diakalengela dia anyima ya Bena Lamana.

12 Ne biakalua ne bavua bikala bana ba Amulona ne bana babu, bavua basela bana ba bakaji ba Bena Lamana, kabakasanka to bua ngenzelu wa batatuabu, ne kabakasua kubikidibua kabidi ku mêna a batatuabu to, bua nanku bakangatshila dîna dia Nefi, bua kubikidibuabu ne bana ba Nefi ne kubadibuabu munkatshi mua bavua babikidibua ne Bena Nefi.

13 Ne mpindiewu bantu ba Zalahemela bonsu bavua babadibua ne Bena Nefi, ne nanku bualu bukalenga kabuvua bua mbikila nansha umua to kadi amu bavua bikala tunkanunuina tua Nefi.

14 Ne mpindiewu biakalua ne pakajikija Mosiya kuakula ne kubadila bantu, wakajinga ne Alama akula penda kudi bantu.

15 Ne Alama wakakula kudibu, pavuabu badisangisha pamua mu bisumbu binena bia bantu, ne wakaya ku tshisumbu tshia bantu tshimua ne ku tshikuabu, uyisha bantu dikudimuna dia mutshima ne ditabuija kudi Mukalenga.

16 Ne wakakankamija bantu ba Limihi ne bana babu, bonsu bavua bapatuishibua mu bupika, ne bavuluka ne Mukalenga ki wakabapatuisha.

17 Ne biakalua ne kunyima kua Alama mulongesha bantu bintu bia bungi, ne mujikija kuakula kudibu, mfumu Limihi wakajinga bua kutambuishibuaye; ne bantu benda bonsu bakajinga kutambuishibua pabu.

18 Bua nanku, Alama wakabuela mu mâyi ne wakabatambuisha; eyowa, wakabatambuisha ku mushindu wa katambuishaye bana babu mu mâyi a Molomo; eyowa, ne bonsu bakatambuishaye bakalua bena ekelezia wa Nzambi; ne nanku bua ditabuija diabu ku mêyi a Alama.

19 Ne biakalua ne mfumu Mosiya wakanyishila Alama bua ne ashikika ma’ekelezia mu bulaba bonsu bua Zalahemela; ne wakamupesha bukôkeshi bua kujidila bakuidi ne balongeshi ku mutu kua ekelezia yonsu.

20 Mpindiewu ebi bivua bienzekibua bualu kumvua bantu ba bungi ne mulongeshi umua kavua mua kubalombola to; anyi kabavua bonsu mua kuteleja dîyi dia Nzambi mu tshisangilu tshimua to;

21 Bua nanku bakadisangisha pamua mu bisumbu bia bantu bishilangana, bivua bibikidibua ne ma’ekelezia; ekelezia yonsu uvua ne bakuidi benda ne balongeshi benda, ne muakuidi yonsu uvua uyisha dîyi bilondeshila muvuawu mumupesha ku mukana wa Alama.

22 Ne nanku, nansha muvuaku ma’ekelezia a bungi avua onsu ekelezia umua, eyowa, ekelezia wa Nzambi mena; bualu bakuidi kabavua bayisha tshintu mu ma’ekelezia onsu to pa kumbusha tshikala dikudimuna dia mutshima ne ditabuija kudi Nzambi.

23 Ne mpindiewu kuvua ma’ekelezia muanda muteketa mu bulaba bua Zalahemela. Ne biakalua ne bonsu bavua bajinga kuangata dîna dia Kilisto, anyi dia Nzambi, bakabuela mu ma’ekelezia a Nzambi;

24 Ne bavua babikidibua ne bantu ba Nzambi. Ne Mukalenga uvua wakabupumuina Nyuma wenda, ne Mukalenga wakababenesha, ne bakalubuluka mu bulaba.