1 Mpindiewu biakalua ne kuvua ba bungi ba ku lukongu lua bantu luvua lulua bavua kabayi mua kumvua mêyi a mfumu Benyamina to, bavua bikala bana bateketa diba divuaye wakula kudi bantu benda; ne kabavua bitabuija ngikadilu ya batatuabu to.

2 Kabavua bitabuija tshivua tshiamba bitangila dibika dia bafua to, anyi kabavua bitabuija bitangila dilua dia Kilisto to.

3 Ne mpindiewu bua dipanga ditabuija diabu kabavua mua kumvua dîyi dia Nzambi to; ne mitshima yabu ivua mipapisha.

4 Ne bakabenga kutambuishibua; anyi bakabenga kubuela mu ekelezia. Ne bavua bantu ba pa buabu bitangila ditabuija diabu, ne bakashala nanku kashidi, mena mu ngikadilu wabu wa mu mubidi ne mibi; bualu bakabenga kubikila Mukalenga Nzambi wabu.

5 Ne mpindiewu mu bumfumu bua Mosiya kabavua ba bungi bu mudi tshia bibidi tshia bungi bua bantu ba Nzambi to; kadi bakalua ba bungi bua matapuluka avua munkatshi mua bena mu Ekelezia.

6 Bualu biakalua ne bakadinga ba bungi ne mêyi abu a lubombu, bavua mu ekelezia, ne bakabenzeja mibi ya bungi; bua nanku biakakengedibua ne aba bavua benza mibi, bavua mu ekelezia, badimuishibua kudi ekelezia.

7 Ne biakalua ne bakalua nabu kumpala kua bakuidi, ne balongeshi bakafila kudi bakuidi; ne bakuidi bakalua nabu kumpala kua Alama, uvua muikala muakuidi munena.

8 Mpindiewu mfumu Mosiya uvua mupesha Alama bukôkeshi pa mutu pa ekelezia.

9 Ne biakalua ne Alama kavua mumanya bitangila buabu to, kadi kuvua bajadiki bakubatuisha ba bungi; eyowa, bantu bakimana ne bakajadika bia bungi bitangila malu abu mabi.

10 Mpindiewu tshintu tshia buena etshi katshivua tshianji kuenzeka mu ekelezia to; bua nanku Alama wakasumpakana ne meji enda; ne wakenza ne batuadibua kumpala kua mfumu.

11 Ne wakambila mfumu ne: Mona, ba bungi aba batudi batuala kumpala kueba, badi bana babu bafunda; eyowa, ne bavua bakuata benza malu mabi mashilangana. Ne kabena bakudimuna mutshima ku malu abu mabi to; bua nanku tudi balua nabu kumpala kueba, bua ubalumbuluisha bilondeshila mibi yabu.

12 Kadi mfumu Mosiya wakambila Alama ne: Mona, ntshiena mbalumbuluisha to; bua nanku ndi mbafila mu bianza bieba bua ubalumbuluisha.

13 Ne mpindiewu meji a Alama akasumpakana kabidi; ne wakaya ne wakebeja Mukalenga tshivuaye ne bua kuenza bitangila bualu ebu, bualu uvua utshina ne kalu kuenza bibi ku mesu a Nzambi.

14 Ne biakalua ne kunyima kua mulomba Nzambi ne anyima wenda mujima, dîyi dia Mukalenga diakalua kudiye, diamba ne:

15 Udi mubeneshibua, Alama, ne babeneshibua bobu bavua batambula mu mâyi a Molomo. Udi mubeneshibua, bua ditabuija dieba dipita ku mêyi nkayawu a musadidi wanyi Abinadi.

16 Ne babeneshibua bobu bua ditabuija diabu dipita ku mêyi nkayawu awuvua mubambila.

17 Ne udi mubeneshibua, bualu uvua mushikika ekelezia munkatshi mua bantu aba; ne nebashibua mpanda, ne nebikala bantu banyi.

18 Eyowa, bantu aba badi babeneshibua badi bitaba bua kuangata dîna dianyi; bualu nebabikidibua muu dîna dianyi; ne mbanyi.

19 Ne bualu uvua mungebeja bitangila musambuki wa mikenji, udi mubeneshibua.

20 Udi musadidi wanyi, ne ndi ngenza neba tshipungidi ne neupeta moyo wa tshiendelela; ne unsadila ne neuya kukuata mudimu wanyi mu dîna dianyi, ne neusangisha mikoku yanyi pamua.

21 Ne wateleja dîyi dianyi neikala mukoku wanyi, ne yeya neumuakidila mu ekelezia, ne yeya nemmuakidila kabidi.

22 Bualu mona, ewu udi ekelezia wanyi; ewu yonsu udi mutambuishibua neatambuishibua bua dikudimuna dia mutshima. Ne udi wakidila neitabuija mu dîna dianyi; ne ne yeya nemmubuikidila tshianana.

23 Bualu mmema udi wangata mibi ya ba pa buloba; bualu mmema uvua mubafuka; ne mmema udi upesha udi witabuija tô ne ku ndekelu muaba ku diboku dia baluma dianyi.

24 Bualu mona, badi babikidibua mu dîna dianyi; ne bobu bammanya nebabika ne nebapeta tshiendelela muaba ku diboku dianyi dia baluma.

25 Ne nebilua ne pâdila mpungi muibidi apu, bavua kabayi bamanya nansha nebabika ne nebimana kumpala kuanyi.

26 Ne apu nebamanya ne ndi Mukalenga Nzambi wabu, ne ndi Musungidi wabu; kadi bakabenga kusungidibua.

27 Ne nebatonda kudibu ne tshitu mubamanya nansha to; ne nebaya mu kapia ka kashidi kavua kalongolola bua diabulu ne banjelu benda.

28 Bua nanku ndi nkuambila ne, ewu udi ubenga kuteleja dîyi dianyi to, yeya muina awu kuakumuakidila mu ekelezia wanyi to, bualu yeya ntshiakumuakidila ku dituku dia ndekelu to.

29 Bua nanku ndi nkuambila ne, Ndâku; ne ewu yonsu udi usambuka mikenji yanyi, umulumbuluisha bilondeshila mibi ivuaye muenza; ne yeya mutonda mibi yenda kumpala kueba ne kuanyi ne mukudimuna mutshima bulelela, neumubuikidila, ne nemmubuikidila panyi.

30 Eyowa, ne misangu yonsu idi bantu banyi bakudimuna mutshima nembabuikidila mapanga abu kundi.

31 Ne nenubuikidilangana penu muntu ne mukuenda mapanga enu; bualu bulelela ndi nkuambila ne, udi kayi ubuikidila mukuenda mapanga enda to padiye wamba wakudimuna mutshima, muina awu udi udituadila dipîshibua.

32 Mpindiewu ndi nkuambila ne: Ndâku; ne ewu yonsu udi kayi ukudimuna mutshima ku mibi yenda to, yeya muina kakubadibua munkatshi mua bantu banyi to; ne nebienzekibua nanku awu kubangila mpindiewu tô ne matuku onsu adi alua kunyima.

33 Ne biakalua ne pakumvua Alama mêyi â, waka’afunda bua yeya kuikala nawu, ne bua yeya kulumbuluisha bantu ba ekelezia awu bilondeshila ku mikenji ya Nzambi.

34 Ne biakalua ne Alama wakaya ne wakalumbuluisha bavuabu bakuata ne malu mabi bilondeshila ku dîyi dia Mukalenga.

35 Ne bonsu bakakudimuna mutshima ku mibi yabu ne bakayitonda, wakababala munkatshi mua bantu ba mu ekelezia;

36 Ne bavua babenga kutonda mibi yabu ne kukudimuna mutshima wabu ku malu mabi abu, aba bamua kabakabadibua munkatshi mua bantu ba mu ekelezia to, ne mêna abu akakupudibua.

37 Ne biakalua ne Alama wakateka mikandu bua malu onsu a mu ekelezia; ne bakabanga kupeta ditalala kabidi ne kulubuluka menamena mu malu a mu ekelezia, bavua benda ne didilama kumpala kua Nzambi, bakidila ba bungi, ne batambuisha ba bungi.

38 Ne mpindiewu Alama ne basadidi nenda bavua ku mutu kua ekelezia bakenza bintu bionsu ebi, benda ne dinanukila, balongesha dîyi dia Nzambi bitangila bintu bionsu, bakenga mishindu yonsu ya ntatu, bakengeshibua kudi bonsu bavua kabayi bena mu ekelezia wa Nzambi to.

39 Ne bakadimuisha bana babu; ne bavua pabu badimuishibua pabu, muntu yonsu kudi dîyi dia Nzambi, bilondeshila mibi yenda, anyi ku mibi ivuaye muenza, Nzambi mubapesha mukenji wa kusambila kakuyi dilekela to ne kuela Nzambi tuasakidila mu bintu bionsu.