1 Ne mpindiewu biakalua ne makenga avua mapîshibua pa ekelezia kudi bantu bavua kabayi ne ditabuija akalua mapita bikola mu mushindu ne bena mu ekelezia bakabanga kunungana, ne kudilakangana kudi balombodi babu bitangila bualu ebu; ne bakadilakangana kudi Alama. Ne Alama wakaleja bualu kudi mfumu wabu, Mosiya. Ne Mosiya wakebeja bakuidi benda.

2 Ne biakalua ne mfumu Mosiya wakatuma dimanyisha mu bulaba bua ku mpenga yonsu bua muntu udi kayi ne ditabuija nansha umua kakengesha muntu nansha umua wa bavua mu ekelezia wa Nzambi to.

3 Ne kuvua mukenji mukola mu ma’ekelezia onsu ne kakuikadi dikengeshangana munkatshi muayi to, ne bantu bonsu bikala dia tshimua munkatshi muabu;

4 Ne kabalekedi diditambisha anyi diambu disalakaja ditalala diabu to; ne muntu yonsu ananga mukuenda bu mudiye mudinanga, ne benza mudimu ne bianza biabu nkayabu bua didikuatshisha diabu.

5 Eyowa, ne bakuidi ne balongeshi babu bonsu benza mudimu ne bianza biabu bua didikuatshisha diabu, mu malu onsu amu pa kumbusha mu bubêdi, anyi mu dikenga; ne pakenzabu bintu ebi, bakavulangana mu ngâsa wa Nzambi.

6 Ne kuakabanga kuikala kabidi ditalala dia bungi mu bulaba; ne bantu bakabanga kuikala ba bungi, ne bakabanga kutangalaka kula pa mpala wa buloba, eyowa, ku node ne ku sude, kudi esete ne ku wesete, bâsa bimenga binena ne misoku minena mu matengu onsu a bulaba.

7 Ne Mukalenga wakabakumbula ne wakabalubuluja, ne bakalua bantu ba bungi ne babanji.

8 Mpindiewu bana ba baluma ba Mosiya bavua babadibua munkatshi mua bavua kabayi ne ditabuija to; ne umua wa bana ba baluma ba Alama uvua penda ubadibua munkatshi muabu, ne uvua ubikidibua ne Alama, bu muvua tatuenda; nansha nanku, wakalua muntu mubi ne mutendeledi wa mpingu. Ne uvua muntu wa mêyi a bungi, ne uvua wakula ne lubombu lua bungi kudi bantu; bua nanku uvua ulombola bantu ku mushindu wa malu enda mibi.

9 Ne wakalua tshikandaminu tshinena bua dilubuluka dia ekelezia wa Nzambi; uvua upambula mitshima ya bantu; uvua wenzeja matapuluka a bungi munkatshi mua bantu; uvua upesha muena lukuna wa Nzambi njila wa kuenzela bukola buenda pa mutu pabu.

10 Ne biakalua ne pavuaye wendakana bua kunyangakaja ekelezia wa Nzambi, bualu uvua wendakana mu musokoku ne bana ba baluma ba Mosiya mu kukeba bua kunyangakaja ekelezia, ne kupambula bantu ba Mukalenga, bishilangana ne mikenji ya Nzambi, anyi mena ya mfumu—

11 Ne bu mumvua munuambila, bu muvuabu bendakana mu kutombokela Nzambi, monayi, muanjelu wa Mukalenga wakabamuenekela; ne wakapueka bu munda mua divuba; ne wakakula bu ne dîyi dia dikubakuba, diakanyungusha buloba buvuabu bimanyina;

12 Ne bakapona pa buloba bualu dikema diabu divua dipita bikola, ne kabakumvua mêyi avuaye ubambila to.

13 Nansha nanku wakabila kabidi, wamba ne: Alama, juka ne semena, bua tshinyi udi ukengesha ekelezia wa Nzambi? Bualu Mukalenga uvua muamba ne: Ewu udi ekelezia wanyi, ne nemmushikika; ne tshintu nansha tshimua katshia kumutonkola to, amu pa kumbusha bua disambuka dia mikenji dia bantu banyi.

14 Ne muanjelu wakamba kabidi ne: Mona, Mukalenga uvua mumvua masambila a bantu benda, ne kabidi masambila a muenda mudimu wenda Alama, udi tatueba; bualu uvua musambila ne ditabuija divula bikutangila bua ufikishibua ku dimanya dia bulelela; bua nanku, ndi mulua kukuitabujija bua kipatshila aka bitangila bukola ne bukôkeshi bua Nzambi, bua masambila a basadidi benda apeta diandamuna bilondeshila ku ditabuija diabu.

15 Ne mpindiewu mona, udi mua kuela bukola bua Nzambi mpata anyi? Bualu mona, dîyi dianyi kadiena dinyungusha buloba anyi? Ne kuena kabidi mua kummona kumpala kueba anyi? Ne ndi mutuma kudi Nzambi.

16 Mpindiewu ndi nkuambila: Ndâku, ne vuluka bukuatshibu bua batatueba mu bulaba bua Helama ne mu bulaba bua Nefi; ne vuluka bunena bua malu avuaye mubenzela; bualu bavua mu bupika, ne wakabapatuisha. Ne mpindiewu ndi nkuambila, Alama, ndâku lueba, ne kukebi kabidi bua kunyangakaja ekelezia to, bua ne masambila abu andamunyibua, ne nanku nansha biwasua nkayeba kuimanshibua.

17 Ne mpindiewu biakalua ne â avua mêyi a ndekelu akambila muanjelu Alama, ne wakaya.

18 Ne mpindiewu Alama ne bavua nenda bakapona kabidi pa buloba, bualu dikema diabu divua dikola; bualu bavua bamona muanjelu wa Mukalenga ne mesu abu; ne dîyi dienda divua bu mudi dikubakuba, diakanyungusha buloba; ne bavua bamanya ne kakuvua tshintu nansha tshimua tshivua mua kunyungusha buloba ne kubuzakeja bu ne buvua mua kupandika bipesa bibidi to amu pa kumbusha bukola bua Nzambi.

19 Ne mpindiewu Alama wakalua kamama bualu dikema dienda divua dipita bikola, mu mushindu ne kavua mua kunzulula mukana muenda to; eyowa, ne wakateketa, mu mushindu ne kavua mua kujula bianza bienda to; bua nanku bavua nenda bakamuangata, ne bakamuambula kayi mua kuenda to, mena tô ne pakamutekabu kumpala kua tatuenda.

20 Ne bakalondela tatuenda bionsu bivua bibenzekela; ne tatuenda wakasanka, bualu uvua mumanya ne tshivua bukola bua Nzambi.

21 Ne wakenza ne musumba wa bantu udisangisha pamua bua bamona tshivua Mukalenga muenzela muanenda wa baluma, ne bavua nenda pabu.

22 Ne wakenza ne bakuidi badisangisha pamua; ne bakabanga kujila, ne kusambila Mukalenga Nzambi wabu bua abulula mukana mua Alama, bua akula, ne bua bidimba bienda bipeta bukola buabi—bua mesu a bantu atabala bua bamona ne bamanya buimpa ne butumbi bua Nzambi.

23 Ne biakalua ne kunyima kua bobu bajila ne basambila bua mutantshi wa matuku abidi ne butuku bubidi, bidimba bia Alama biakapeta bukola buabio, ne wakimana kûlu ne wakabanga kuakula kudibu, ubambila bua basangala:

24 Bualu, wakamba ne, ndi mukudimuna mutshima ku mibi yanyi, ne musungidibua kudi Mukalenga; monayi ndi muledibua ku Nyuma.

25 Ne Mukalenga uvua mungambila ne: Kukemi to ne bukua bantu bonsu, eyowa, bantu baluma ne bantu bakaji, bisamba bionsu, bisa bionsu, miakulu yonsu, ne bantu bonsu, badi ne tshia kuledibua kabidi; eyowa, kuledibua kudi Nzambi, bumbuka ku ngikadilu wabu wa mu mubidi ne wa dipona, balua ku ngikadilu wa buakana, bikala basungidibua kudi Nzambi, balua bana benda ba baluma ne bana benda ba bakaji;

26 Ne nanku badi balua bifukibua bipia-bipia; ne amu bobu benza nanku, kabena nansha bishi mua kupiana bukalenga bua Nzambi to.

27 Ndi nkuambila ne, biobi kabiyi nanku to, badi ne tshia kuimanshibua; ne ndi mumanya nanku, bualu mvua pabuipi ne kuimanshibua.

28 Nansha nanku, kunyima kua kupututuka mu mpaji ya bungi, pamvua mukudimuna mutshima pabuipi ne lufu, Mukalenga mu lusa luenda uvua mumona bikumbana bua kundopola lukasa mu diôshika dia kashidi, ne ndi muledibua kudi Nzambi.

29 Anyima wanyi uvua musungidibua ku kanyonga ka bululu ne mionji ya malu mabi. Mvua mu tshina tshila tshia mîdima mikola mipita; kadi mpindiewu ndi mmona bukenka bua dikema bua Nzambi. Anyima wanyi uvua musumpakana ne mpaji ya tshiendelela; kadi ndi mulopodibua lukasa, ne anyima wanyi katshiena ukengeshibua kabidi nansha.

30 Mvua mubenga Musungidi wanyi, ne mvua muvila bivua batatuetu bamba; kadi mpindiewu bua ne kumona ku mpala ne nealua, ne ne udi uvuluka tshifukibua tshionsu tshiakafukaye, ne adileja kudibu bonsu.

31 Eyowa, tshinu tshionsu netshitua panshi, ne ludimi lonsu ne lutonda kumpala kuenda. Eyowa, mena ku dituku dia ndekelu, pimana bantu bonsu bua kulumbuluishibua kudiye, apu nebitonda ne udi Nzambi; pashisha bonsu badi kabayi ne Nzambi pa buloba to, nebitaba ne tshitungu tshia dinyoka dia kashidi tshidi pa mutu pabu tshidi tshiakana: ne nebakanka, ne nebazakala, ne nebapingana panyima muinshi mua ditua dia disu dienda didi dimona bionsu.

32 Ne biakalua ne Alama wakabanga katshia ku diba adi kulongesha bantu, ne bavua ne Alama pakabamuenekela muanjelu bakabanga pabu kulongesha bantu, benza luendu mu bulaba bonsu, bamanyisha bantu bonsu bintu bivuabu bamona ne bumvua, ne bayisha dîyi dia Nzambi ne mpaji ya bungi, babakengesha bikola kudi bavua kabayi ne ditabuija to, ne babatûta kudi ba bungi babu.

33 Kadi nansha muvuaku bionsu ebi, bakafila disamba dia bungi mu ekelezia, bakolesha ditabuija diabu, ne bavua ne bulekelelu ne bavua benza mudimu bikola bua kubakankamija bua kulama mikenji ya Nzambi.

34 Ne banayi ba babu bavua bana ba baluma ba Mosiya; ne mêna abu avua Amona, ne Alona, ne Omenele, ne Himini; â avua mêna a bana ba baluma ba Mosiya.

35 Ne bakenza luendu mu bulaba bua Zalahemela bonsu, ne munkatshi mua bantu bonsu bavua ku bumfumu bua mfumu Mosiya, badikolesha ne busuminyini bua kuakaja mibi yonsu ivuabu benza mu ekelezia, batonda mibi yabu yonsu, ne bamanyisha bintu bionsu bivuabu bamona, ne bumvuija bantu bonsu bavua bajinga kubateleja mambi ne mifundu ya Nzambi.

36 Ne bavua nanku biamua bia mudimu mu bianza bia Nzambi bua kuluisha bangi ku dimanya dia bulelela, eyowa, ku dimanya dia Musungidi wabu.

37 Ne bu mudibu babeneshibua! Bualu bavua batangalaja ditalala; bavua batangalaja lumu luimpa lua buimpa; ne bavua bamanyisha bantu ne Mukalenga udi ukôkesha.