1 Mpindiewu pakenza Mosiya nanku wakatuma dîyi mu bulaba bonsu, munkatshi mua bantu bonsu, ujinga bua kumanya disua diabu bitangila ne nganyi wikala mfumuabu.

2 Ne biakalua ne dîyi dia bantu diakalua, diamba ne: Tudi tujinga ne Alona, muaneba wa baluma ikala mfumuetu ne mukôkeshi wetu.

3 Mpindiewu Alona uvua muya ku bulaba bua Nefi, bua nanku mfumu kavua mua kumuambikila bukalenga to; anyi Alona kavua musua bua kuangata bukalenga to; anyi nansha umua wa ku bana ba baluma ba Mosiya kavua muitaba bua kuangata bukalenga to.

4 Bua nanku mfumu Mosiya wakatuma kabidi dîyi munkatshi mua bantu; eyowa, wakatuma kabidi mena muaku mufunda munkatshi mua bantu. Ne eyi ki miaku mifundibua, yamba ne:

5 Monayi, Ô nuenu bantu banyi, anyi bana betu, bualu ndi numona nanku, ndi njinga ne nuela meji pa bualu bundi nnulomba bua kuela meji—bualu nudi nujinga bua kuikala ne mfumu.

6 Mpindiewu ndi nnumanyisha ne yeya udi bukalenga buakanyina wabubengi, ne kakuangata bukalenga to.

7 Ne mpindiewu pikalaku mukuabu bua kusungudibua pa muaba wenda, monayi ndi ntshina ne makokangana ka’alu kujuka munkatshi muenu. Ne nganyi udi mumanya ne muananyi wa baluma, udi bukalenga buakanyina, walua kukudimuka bua kufîka tshiji ne wakoka tshitupa tshia bantu aba bua kumulondabu, tshidi bua kujula mvita ne makokangana munkatshi muenu, tshidi bua kuikala tshiena bualu tshia dimatshisha dia mashi a bungi ne dinyanga dia njila wa Mukalenga, eyowa, ne kufuisha anyima ya bantu ba bungi.

8 Mpindiewu ndi nnuambila ne tuikalayi ne lungenyi ne tuelayi meji pa bintu ebi, bualu katuena ne bunema bua kufuisha muananyi wa baluma to, anyi katuena ne bunema bua kufuisha muntu mukuabu pikalaye musungudibua pa muaba wenda to.

9 Ne pikala muananyi wa baluma mupinganyina kabidi diditambisha dienda ne bintu bia tshianana, neakudimuna bintu bivuaye muamba, ne kulombolola bunema buenda pa bukalenga, tshidi tshiamuenzeja yeya ne bantu aba kabidi mibi ya bungi.

10 Ne mpindiewu tuikalayi ne lungenyi ne tutangilayi kumpala bua bintu ebi, ne tuenzayi tshialuisha ditalala dia bantu aba.

11 Bua nanku nengikala mfumuenu matuku anyi a moyo adi mashala; nansha nanku, tusungulayi balumbuluishi, bua kulumbuluishabu bantu aba bilondeshila ku mikenji yetu; ne netulongolola mianda ya bantu aba mushindu mupia-mupia, bualu netusungula bantu ba lungenyi bu kuikalabu balumbuluishi, bua kulumbuluisha bantu aba bilondeshila ku mikenji ya Nzambi.

12 Mpindiewu bidi bimpa bua muntu alumbuluishibua kudi Nzambi pamutu pa kudi muntu, bualu bitungu bia Nzambi bidi biakana diba dionsu, kadi bitungu bia muntu kabiena biakana diba dionsu to.

13 Bua nanku, bu koku kuikala mushindu wa nuenu kuikala ne bantu baluma balulama mua kuikalabu ba mfumu benu, bashikika mikenji ya Nzambi, ne kulumbuluisha bantu aba bilondeshila ku mikenji yenda, eyowa, bu ba mfumu badi mua kuikalabu nabu mua kuikala bantu baluma badi bua kuenza muakenza tatuanyi Benyamina bua bantu aba—ndi nnuambila ne, bu biobi mua kuikala nanku diba dionsu apu bidi bikengedibua ne nuikala diba dionsu ne bamfumu bua banukôkesha.

14 Ne mema muina mvua muenza mudimu ne bukola bonsu ne meji onsu bimvua nabi, bua kunulongesha mikenji ya Nzambi, ne bua kushikika ditalala mu bulaba bonsu, bua kakuikadi mvita anyi makokangana, anyi buivi, anyi dipawula dia bintu dia bintu bia benda, anyi dishipa dia bantu, anyi malu mabi a mushindu nansha umua to;

15 Ne ewu yonsu uvua muenza bubi, mvua mumunyoka bilondeshila ku bubi buvuaye muenza, bilondeshila ku mikenji ivua batatuetu batupesha.

16 Mpindiewu ndi nnuambila ne, bualu bantu bonsu kabena balulama to, kabiena bikengedibua ne nuikala ne mfumu anyi bamfumu bua kunukôkesha to.

17 Bualu monayi, bu mudiwu a bungi malu mabi adi mfumu mubi umua wenzeja, eyowa, ne dinyanguka kayi bunenadi!

18 Eyowa, vulukayi mfumu Noa, bubi buenda ne malu mapita bubi enda, ne kabidi bubi ne malu mapita bubi bia bantu benda. Monayi dinyanguka kayi bunenadi diakabaluila; ne bakatuadibua mu bupika bua malu mabi abu kabidi.

19 Ne bu kabivua bua diambuluisha dia Mufuki wa lungenyi lonsu wabu, ne nanku bua dikudimuna dilelela dia mitshima yabu to, bavua ne tshia kushala mu bupika kakuyi diepuka tô ne mpindiewu.

20 Kadi monayi, wakabapatuisha bualu bakadipuekesha kumpala kuenda; ne bualu bakabila ne bukitu kudiye, yeya wakabapatuisha mu bupika; ne nanku ki mudi Mukalenga wenza ne bukola buenda mu malu onsu munkatshi mua bana ba bantu, wôluela badi bamueyemena diboku dia lusa.

21 Ne mpindiewu monayi, ndi nnuambila ne, kanuena mua kumbusha mfumu wa malu mabi ku nkuasa wa bukalenga to amu pa kumbusha ku dikokangana divula, ne dimatshisha dia mashi a bungi.

22 Bualu monayi, udi ne balunda benda badiye wenza nabu malu mabi, ne udi ne balami benda pabuipi nenda; ne udi ukudimuna mikenji ya bavua bakôkesha mu buakana kumpala kuenda; ne udi udiatakaja mikenji ya Nzambi mu makasa enda;

23 Ne udi wela mikenji, ne udi uyituma munkatshi mua bantu benda, eyowa, mikenji ku mushindu wa bubi buenda nkayenda; ne udi ushipesha ewu yonsu udi kayi utumikila mikenji yenda to; ne udi utumina bonsu badi bamutombokela misumba yenda ya basalayi bua kubaluisha mvita, ne padiye mua kubashipa, udi ubashipa; ne ki mudi mfumu udi kayi muakana to unyangakaja njila ya buakana bonsu nanku.

24 Ne mpindiewu monayi ndi nnuambila ne, kabiena bikengedibua bua malu mapita bubi a buena â anufikila to.

25 Bua nanku, sungulayi balumbuluishi bilondeshila dîyi dia bantu aba, bua nulumbuluishibua bilondeshila ku mikenji ivua batatuetu banupesha, idi miakana, ne ivua mibapesha ku tshianza tshia Mukalenga.

26 Mpindiewu, pa tshibidilu dîyi dia bantu kaditu dijinga tshintu tshidi tshishilangana ne tshidi tshiakana to; kadi pa tshibidilu tshitupa tshikesa tshia bantu tshitu tshijinga tshidi katshiyi tshiakana to; bua nanku etshi ki tshinualonda ne tshinuenza mukenji wenu—bua kulombola malu enu bilondeshila ku dîyi dia bantu.

27 Ne pikala diba dilua dikala dîyi dia bantu disungula bubi, apu ki diba dialua bitungu bia Nzambi pa mutu pabu; eyowa, apu ki diba dianukumbulaye ne dibutuka dinena mu mushindu mudiye mukumbula bulaba ebu kumpala kua mpindiewu.

28 Ne mpindiewu nenu ne balumbuluishi, ne kabayi banulumbuluisha bilondeshila ku mikenji ivua mipeshibua to, nudi mua kubalumbuluishisha kudi mulumbuluishi mukulu.

29 Pikala balumbuluishi bakulu benu kabayi balumbuluisha ne bitungu biakana to, nenuenza ne bungi bukesa bua balumbuluishi bashadila benu badisangisha pamua, ne nebalumbuluisha balumbuluishi bakulu benu, bilondeshila ku dîyi dia bantu.

30 Ne ndi nuelela mukenji bua kuenza bintu ebi bua ditshina dia Mukalenga; ne ndi nuelela mukenji bua kuenza bintu ebi, ne bua kanuikadi ne mfumu to; bua pikala bantu aba benza mibi ne malu mabi dipîla nedikala pa mitu yabu nkayabu.

31 Bualu monayi ndi nnuambila ne, mibi ya bantu ba bungi ivua mienjibua bua malu mabi a bamfumu babu; bua nanku dipîla dia ku malu mabi abu nedikala pa mitu ya bamfumu babu.

32 Ne mpindiewu ndi njinga bua dishilangana edi kadikadiku kabidi mu bulaba ebu nansha, nangananga munkatshi mua bantu banyi aba; kadi ndi njinga ne bulaba ebu buikala bulaba bua budishikaminyi, ne muntu yonsu asanka bua manema enda ne diakalengela dienda momumua, diba dionsu didi Mukalenga mumona ne tudi mua kuikala ne moyo ne kupiana bulaba, eyowa, mena diba dionsu dikalaku kushala nansha muntu umua wa ku ndelanganyi yetu pa mpala wa bulaba.

33 Ne mfumu Mosiya wakabafundila bintu bia bungi kabidi, ubajunguluila matêta ne masumpakana onsu a mfumu muakana, eyowa, makenga onsu a anyima wenda bua bantu benda, ne kabidi manunganyi a bantu bua mfumu wabu; ne wakabumvuijabi bionsu.

34 Ne wakabambila ne bintu ebi kabivua ne bua kuikalaku to; kadi ne bujitu budi ne bua kulua pa mutu pa bantu bonsu, bua muntu yonsu ambula buenda bujitu.

35 Ne wakabajungulula kabidi bubi bonsu buvuabu ne bua kupetangana nabu, bua kuikala ne mfumu udi kayi muakana to ubakôkesha;

36 Eyowa, malu mabi ne malu mapita bubi enda onsu, ne mvita yonsu, ne makokangana, ne dimatshisha dia mashi, ne buivi, ne dipawula dia bintu bia benda, ne dienda dia masandi, ne mishindu yonsu ya malu mabi adi kâyi kubala mêna to—ubambila ne bintu ebi kabivua mua kuikalaku to, ne bivua bishilangana patoka ne mikenji ya Nzambi.

37 Ne mpindiewu biakalua ne, kunyima kua mfumu Mosiya mutuma bintu ebi munkatshi mua bantu, bakitabujijibua bulelela bua miaku yenda.

38 Bua nanku bakalekela majinga abu a kuikala ne mfumu, ne kabavua ne dikisha to amu bua ne muntu yonsu apeta mushindu wa momomua mu bulaba bonsu, eyowa, ne muntu yonsu wakaleja ditaba dia kuambula bujitu bua mibi yenda.

39 Bua nanku, biakalua ne bakadisangisha pamua mu bisumbu bia bantu mu bulaba bonsu, bua kufila mêyi abu bitangila bavua bikala balumbuluishi babu, bua kubalumbuluisha bilondeshila ku mikenji ivua mibapesha; ne bakasanka menamena bua budishikaminyi buvua bubapesha.

40 Ne bakakolakana mu dinanga kudi Mosiya; eyowa, bakamuanyisha kupita muntu mukuabu yonsu; bualu kabavua bamumona bu mudi mfumu mubi uvua ukeba makasa to, eyowa, dinanga dia biuma didi dinyanga anyima; bualu kavua ubenzeja bua kumupesha mabanji abu to, anyi kavua usanka bua dimatshisha dia mashi to; kadi uvua wakashikika ditalala mu bulaba, ne wakanyishila bantu benda ne bapatuishibua mu mishindu yonsu ya bupika; bua nanku bakamuanyisha, eyowa, menamena, kupita tshipimu.

41 Ne biakalua ne bakasungula balumbuluishi bua kubakôkesha, anyi bua kubalumbuluisha bilondeshila ku mikenji; ne bakenza nanku mu bulaba bonsu.

42 Ne biakalua ne Alama wakasungudibua bua kuikala mulumbuluishi munena wa kumpala, ne uvua kabidi muakuidi munena, ne tatuenda muikala mumuambika mudimu ewu, ne muikala mumupesha bujitu bitangila mianda yonsu ya ekelezia.

43 Ne mpindiewu biakalua ne Alama wakenda mu njila ya Mukalenga, ne wakalama mikenji yenda, ne wakalumbuluisha ne bitungu biakana; ne kuvua ditalala ditungunuka mu bulaba.

44 Ne ki muakabanga dikôkesha dia balumbuluishi nanku mu bulaba bonsu bua Zalahemela, munkatshi mua bantu bonsu bavua babikidibua ne Bena Nefi; ne Alama uvua mulumbuluishi wa kumpala ne mulumbuluishi munena.

45 Ne mpindiewu biakalua ne tatuenda wakafua, pavuaye muikala ne bidimu makumi muanda mukulu ne bibidi, ne wakakumbaja mikenji ya Nzambi pavuaye ne moyo.

46 Ne biakalua ne Mosiya wakafua penda, mu tshidimu tshia makumi ne tshisatu tshia bumfumu buenda, ne uvua ne bidimu makumi asambombo ne bisatu; bivua bienza mu bionsu, bidimu nkama itanu ne tshitema katshia ku tshikondu tshiakumbuka Lehi ku Yelushalema.

47 Ne ki muakajika dikôkesha dia bamfumu pa mutu pa bantu ba Nefi nanku; ne ki muakajika matuku a Alama, uvua muashi wa ekelezia wabu nanku.