1 Ne biakalua ne kunyima kua Mosiya mumana kuenza muvua tatuenda mumutuma, ne mumana kuenza dimanyisha mu bulaba bonsu, bua bantu badisangisha pamua mu bulaba bonsu, bua babanda ku ntempelo bua kumvua mêyi abambila mfumu Benyamina.

2 Ne kuvua bantu ba bungi, ba bungi mena ne kabavua ba bababala to; bualu bavua bavulangana menamena ne batanta bikola mu bulaba.

3 Ne bakangata banabuta ba mu bisumbu bia bimuna biabu, bua balambula dilambula ne milambu miôsha bilondeshila ku mikenji ya Mose;

4 Ne kabidi bua bela tuasakidila kudi Mukalenga Nzambi wabu, wakabapatula mu bulaba bua Yelushalema, ne wakabapatuisha mu bianza bia bena lukuna babu, ne wakasungula bantu balulama bua kuikala balongeshi babu, ne kabidi muntu mululama bua kuikala mfumu wabu, wakashikika ditalala mu bulaba bua Zalahemela, ne wakabalongesha mua kulama mikenji ya Nzambi, bua basanka ne bawula ne dinanga kudi Nzambi ne bantu bonsu.

5 Ne biakalua ne pakabandabu ku ntempelo, bakâsa ntenta yabu ku mpenga yonsu, muntu yonsu bilondeshila ku dîku dienda, dikala ne mukaji wenda, ne bana benda ba baluma, ne bana benda ba bakaji, ne bana babu ba baluma, ne bana babu ba bakaji, kubangila ku muana wa kumpala tô ne ku muana wa mukala, ne dîku dionsu dikala ditapuluka kudi dikuabu.

6 Ne bakâsa ntenta yabu ku mpenga ya ntempelo yonsu, muntu yonsu muikala ne tshibi tshia ntenta wenda tshitangila ku ntempelo, nanku bua basomba mu ntenta yabu ne bumvua mêyi abambila mfumu Benyamina;

7 Bu muvua musumba wa bantu muikala munena bikola mfumu Benyamina kavua mua ku balongesha bonsu munda mua bimanu bia ntempelo to, ki bualu kayi wakashisha kaleya, nanku bua bantu benda bumvua mêyi abambilaye.

8 Ne biakalua ne wakabanga kuakula kudi bantu benda muimanyina pa kaleya; ne kabavua bonsu mua kumvua mêyi enda to bua bunena bua musumba wa bantu; bua nanku wakafundisha mêyi akakulaye ne waka’atumisha kudi bonsu bavua kabayi bumvua dîyi dienda to, bua bapeta pabu mêyi enda.

9 Ne â adi mêyi akakulaye ne akafundishaye, wamba: Bana betu, nuenu bonsu badi badisangisha pamua, nuenu badi mua kumvua mêyi anyi anganuambila lelu ewu; bualu ntshiena munupesha mukenji bua nulua apa bua kupeja mêyi anganuambila to, kadi bua nuteleja kundi, ne nunzulula matshi enu bua numvua, ne mitshima yenu bua numvua, ne meji enu bua malu masokoka a Nzambi abuludibua ku mesu kuenu.

10 Ntshiena munupesha mukenji bua nulua apa bua nuenu kuntshina to, anyi bua nuela meji ne mema muina ndi mupita muntu wa tshifuaka to.

11 Kadi ndi bu nuenu mena, muikala ne mateketa a mubidi ne a meji a mishindu yonsu; kadi ndi musungudibua kudi bantu aba, ne mujididibua kudi tatuanyi, ne mulekedibua kudi tshianza tshia Mukalenga bua ngikala mukôkeshi ne mfumu pa bantu aba; ne tuvua balamibua ne bakubibua ku makanda enda adi kabuyi mua kufuanyikija, bua kunusadila ne makanda onsu, meji ne bukola bonsu budi Mukalenga mumpesha.

12 Ndi nnuambila ne bu mumvua mulekedibua bua kupitshisha matuku anyi mu disadila dienu, nansha tô ne lelu, ne ntshiena mukeba ngolo anyi mpalata anyi mabanji a mushindu nansha umua kunudi;

13 Ntshivua nansha mulekela bua nuedibua mu buloku, anyi nukuatanganayi bapika, anyi nushipa, anyi nuangata bintu bia bantu ku bukola, anyi nuiba, anyi nuenda masandi to; anyi ntshivua nansha mulekela bua nuenza bubi nansha bua mushindu umua to, ne mvua munulongesha ne nulama mikenji ya Mukalenga, mu bintu bionsu bivuaye munuelela mukenji—

14 Ne mema mena, nkayanyi, ngakuatshi mudimu ne bianza bianyi nkayanyi bua nnusadila, ne bua ne kanunemeshibua ne bujitu bua bitadi, ne bua ne tshintu katshinuluidi tshivua lutatu bua kuambula—ne bua bintu bionsu ebi bindi muamba, nuenu nkayenu nudi bajadiki lelu ewu.

15 Kabidi, bana betu, ntshiena muenza bintu ebi bua mema kuditambisha to, anyi ntshiena nnuambila bintu ebi bua kunubanda to; kadi ndi nnuambila bintu ebi bua numanya ne ndi mua kuimana ne meji matalala kumpala kua Nzambi lelu ewu.

16 Monayi, ndi nnuambila ne bualu mvua munuambila ne mvua mupitshisha matuku anyi mu disadila dienu, ntshiena musua kuditambisha to, bualu mvua amu mu disadila dia Nzambi.

17 Ne monayi, ndi nnuambila malu â bua ne nupeta lungenyi; bua nulonga ne panudi mu mu disadila dia bakuenu, nudi amu mu disadila dia Nzambi wenu.

18 Monayi, nudi numbikila mfumuenu; ne bu mema, unudi nubikila mfumu wenu, ndi ngenzelangana mudimu bua kunusadila, nanku kanuena mua kuenzelangana mudimu bua kusadilangana anyi?

19 Ne monayi kabidi, bu mema, unudi nubikila mfumu wenu, udi mupitshisha matuku anyi mu disadila dienu, ne kadi muikala amu mu disadila dia Nzambi, ndi nkumbana kusakidila kuenu, Ô bu munudi ne bua kusakidila Mfumu wenu wa mu diûlu!

20 Ndi nnuambila, bana betu, ne bu nuenu bela tuasakidila tonsu ne butumbi budi anyima wenu mujima muikala ne bukola bua kuikala nabu, kudi Nzambi awu uvua munufuka, ne uvua munulama ne munukuba, ne uvua munusankisha, ne muanyisha ne nuikala ne ditalala pankatshi pa muntu ne muenenda—

21 Ndi nnuambila ne bu nuenu bamusadila yeya uvua munufuka kumbukila ku mbangilu, ne udi unukuba ku dituku ne ku dituku, unusombesha mupuya, bua nuikala ne moyo ne nuenda ne nuenza bilondeshila ku disua dienu nkayenu, ne mena unuambuluisha ku musangu ne ku musangu—Ndi ngamba, bu nuenu bamusadila ne anyima yenu yonsu nutshidi amu basadidi balembakana.

22 Ne monayi, tshionsu tshidiye unulomba tshidi kulama kua mikenji yenda; ne uvua munulaya ne bu nuenu mua kulama mikenji yenda nenulubuluka mu bulaba; ne katu ukudimuka ku mêyi avuaye muamba kashidi; bua nanku, panuikala nulama mikenji yenda neanubenesha ne ne anulubuluja.

23 Ne mpindiewu, diambedi, uvua munufuka, ne munuanyishila ne nuikala ne mioyo, ki bua tshinyi nudi ne dibanza kudiye.

24 Ne tshibidi, udi ulomba ne nuenza bu mudiye nuelela mukenji; ki bua tshinyi nuenu batumikila, udi unubenesha katataka; ne bua nanku wakanufuta. Ne nutshidi ne dibanza kudiye, ne nudi, ne nenuikala, bua kashidi ne kashidi; pa nanku, nudi nuditambisha bua tshinyi?

25 Ne mpindiewu ndi ngebeja, nudi mua kuamba ne nudi ne tshintu nansha tshimua ku bokola buenu nkayenu anyi? Ndi nuandamuna, Nansha. Kanuena mua kuamba ne nudi nansha diatshimua ne lupuishi lua mu buloba to; kadi nuvua nuvua bafuka ne lupuishi lua mu buloba; kadi monayi, ludi luenda yeya wakanufuka.

26 Ne mema, mena mema, unudi nubikila ne mfumuenu, ntshiena mulenga kunupita to; bualu ndi panyi wa ku lupuishi. Ne nudi numona ne ndi mukulakaja, ne ndi pabuipi ne kupingaja mubidi wa tshifuaka ewu kudi mamu wawu buloba.

27 Bua nanku, bu mungakanuambila ne mvua munusadila, ndi ngenda ne meji matalala kumpala kua Nzambi, nansha mena diba edi ndi munusangishisha nkayenu pamua, bua ntshipidi to, ne bua mashi enu ka’ikadi kundi, pangimana bua kulumbuluishibua kudi Nzambi bua bintu bivuaye mungelela mukenji buenu.

28 Ndi nnuambila ne ndi munusangishisha nkayenu pamua bua ngumbusha mashi enu ku bilamba bianyi, diba edi pandi pabuipi ne kupueka mu lukita luanyi, bua mpuekamu ne ditalala, ne nyuma wanyi udi kayi ufua asambakena ne bisumbu bia bimbi ba misambu mûlu mu kuimba butumbi bua Nzambi mululama.

29 Ne menamena kabidi, ndi nnuambila ne ndi munusangishisha nkayenu pamua, bua numanyisha ne ntshiena mua kuikala kabidi mulongeshi wenu, anyi mfumu wenu to;

30 Bualu nansha mpindiewu, mubidi wanyi onsu udi uzakala menamena pandi ngidikija kuakula nenu; kadi Mukalenga Nzambi udi unkuatshisha, ne uvua mundekela ne ngakula kunudi, ne uvua mumpesha mukenji bua nnumanyisha lelu ewu, ne muananyi wa baluma Mosiya udi mfumu ne mukôkeshi pa mutu penu.

31 Ne mpindiewu, bana betu, ndi musua ne nuenza bu munuvua benza tô ne mpindiewu. Bu mu munuvua balama mikenji yanyi, ne kabidi mikenji ya tatuanyi, ne nuvua balubuluka, ne nuvua bepula ku dipona mu bianza bia bena lukuna benu, momumua nuenu balama mikenji ya muananyi wa baluma, anyi mikenji ya Nzambi yanupeshaye, nenulubuluka mu bulaba, ne bena lukuna benu kabakuikala ne makanda kunudi to.

32 Kadi, Ô bantu banyi, dimukayi tshianana dikokangana nedijuka munkatshi muenu, ne nuitaba bua kutumikila nyuma mubi, uvua tatuanyi Mosiya muamba.

33 Bualu monayi, kudi diakabi diela kudi muntu udi witaba bua kutumikila nyuma awu; bualu bu yeya muitaba bua kumutumikila, ne ushala ne ufua ne mibi yenda, yeya udi unua dipîshibua bua anyima wenda nkayenda; bualu dienda difutu didiyi upeta ndinyoka dia kashidi, bu muvuaye musambuka mikenji ya Nzambi kushilangana ne dimanya dienda nkayenda.

34 Ndi nnuambila, ne kakuena umua munkatshi muenu, pa kumbusha bana benu bateketa bavua kabayi balongesha bintu ebi to, kadi nudi bamanya ne nudi ne tshiendelela ne dibanza kudi Tatuenu wa mu diûlu, bua kumupingajila bionsu binudi nabi ne binudi; ne bavua kabidi balongesha ne miandiku idi ne mambi avua makula kudi bambi bansantu, nansha tô ne ku tshikondu tshiakumbuka tatuetu, Lehi, ku Yelushalema;

35 Ne kabidi, bionsu abi bivua biakula kudi batatuetu tô ne mpindiewu. Ne monayi, kabidi, bakakula abi bivua bibelela mukenji kudi Mukalenga; bua nanku, bidi bilulama ne bilelela.

36 Ne mpindiewu, ndi nnuambila, bana betu, ne kunyima kua nuenu bamanya ne balongeshibua bintu bionsu ebi, bu nuenu basambuka mikenji ne benda kushilangana ne biakakudibua, bua nuenu kudiumbusha kudi Nyuma wa Mukalenga, bua kikadi ne muaba munda muenu bua kunulombola mu njila ya lungenyi bua kunubenesha, kunulubulula, ne kunukuba—

37 Ndi nnuambila, ne muntu udi wenza nanku, yeya udi utombokela Nzambi patoka; bua nanku udi witaba kutumikila nyuma mubi, ne ulua muena lukuna wa buakana bonsu; bua nanku, Mukalenga kena ne muaba munda muenda, bualu kena usomba mu ntempelo idi kayiyi ya tshijila to.

38 Bua nanku muntu awu yeya kayi mukudimuna mutshima wenda to, ne yeya mushala muena lukuna wa Nzambi ne yeya mufua nanku, milombu ya bululama bua Nzambi neibisha anyima wenda udi kayi ufua ku dimanya dilelela dia dipîla dienda nkayenda, didi dimupingaja panyima kumpala kua Mukalenga, ne didi diwuja munda muenda ne dipîla, ne dikenga, ne dipampakana, bidi bu kapia kadi kakayi kajima, ka ndimi idi ibanda mûlu bua kashidi ne kashidi.

39 Ne mpindiewu ndi nnuambila ne lusa kaluena ne bunema pa mutu pa muntu awu to; bua nanku dinyoka dienda dia ndekelu didi dia kukenga mpaji kayiyi ijika nansha.

40 Ô, nuenu bantu bonsu bakulumpa, ne nuenu kabidi bansongaluma, ne nuenu bana bakesa badi mua kumvua mêyi anyi, bualu ndi munuambila patoka bua numvua, ndi nsambila bua nubika bua kuvuluka mushindu mubi mupita wa bobu bavua bapona mu disambuka dia mikenji.

41 Ne menamena kabidi, ndi musua bua nuela meji bua ngikadilu mubeneshibua ne wa musangelu wa badi balama mikenji ya Nzambi. Bualu monayi, badi babeneshibua mu bintu bionsu, bia mubidi ne bia nyuma; ne biashalabu ne lulamatu ne ku ndekelu nebakididibua mu diûlu, nanku bua basombamu ne Nzambi mu ngikadilu wa disanka didi kadiyi dijika tshiendelela. Ô vulukayi, vulukayi ne bintu ebi bidi bilelela; bualu Mukalenga Nzambi uvua mubiamba.