1 Ne mpindiewu, biakalua ne pakakula mfumu Benyamina nanku kudi bantu benda, wakatuma munkatshi muabu, usua kumanya kudi bantu benda bikalabu ne bavua bitabuija mêyi avuaye mubambila.

2 Ne bakabila bonsu ne dîyi dimua, bamba: Eyowa, tudi bitabuija mêyi onsu awudi mutuambila; ne kabidi, tudi bamanya dishindama ne bulelela buawu, bua Nyuma wa Mukalenga wa Bukola Bonsu, udi muenza dishintuluka dikola kutudi, anyi mu mitshima yetu, ne katuena kabidi ne dijinga dia kuenza malu mabi to, kadi dia kuenza malu mimpa diba dionsu.

3 Ne tuetu, nkayetu, kabidi, mu njila wa buimpa bua Nzambi budi kabuyi ndekelu, ne ku mamuenesha a Nyuma wenda, tudi bamona malu manena alualua; ne bu bikala ne dikuatshisha, tuvua mua kuamba ku Nyuma bintu bionsu.

4 Ne didi ditabuija dituvua nadi mu bintu bivua mfumu wetu mutuambila didi ditutuadila dimanya dinena edi, kudidi tudi tusanka ne disanka dipita.

5 Ne tudi bitaba bua kubuela mu tshipungidi ne Nzambi wetu bua kuenza disua dienda, ne bua kutumikila mikenji yenda mu bintu bionsu biatuelelaye mukenji, mu matuku etu onsu adi mashala pa buloba, bua katudivuidi mpaji kayiyi ijika nansha pa mitu yetu, bu muakamba muanjelu, bua katunu dikopu dia tshiji tshia Nzambi.

6 Ne mpindiewu, â ki mêyi avua mfumu Benyamina mujinga afuma kudibu; ne bua nanku wakabambila ne: Nuambi mêyi amvua njinga; ne tshipungidi tshinudi benza tshidi tshipungidi tshiakana.

7 Ne mpindiewu, bualu bua tshipungidi tshinudi benza nenubikidibua bana ba Kilisto, bana benda ba baluma, ne bana benda ba bakaji; bualu monayi, lelu ewu wanuledi mu nyuma; bualu nudi nuamba ne mitshima yenu yakudimuki ku njila wa ditabuija mu dîna dienda; bua nanku, nudi baledibua kudiye ne nualu bana benda ba baluma ne bana benda ba bakaji.

8 Ne ku mushindu ewu nuenjibu badikadila, ne kakuena mushindu mukuabu udi mua kunuvuija badikadila to. Kakuena dîna dikuabu difidibua kudi lupandu mua kuvuila; bua nanku, ndi musua ne nuangata dîna dia Kilisto, nuenu bonsu badi babuela mu tshipungidi ne Nzambi bua nuikala batumikidi tô ne ku nshikidilu wa matuku enu.

9 Ne nebilua ne ewu yonsu wenza nanku neasanganyibua ku tshianza tshia baluma tshia Nzambi, bualu neamanya dîna didiye ubikidibua; bualu neabikidibua mu dîna dia Kilisto.

10 Ne mpindiewu nebilua ne, ewu yonsu wapanga kuangata dîna dia Kilisto udi ne tshia kubikidibua mu dîna dikuabu; bua nanku, neadisangana ku tshianza tshia bakaji tshia Nzambi.

11 Ne ndi musua ne nuvuluka kabidi, ne edi ndîna dimvua muamba ne nennupesha ne kadiakukupudibua nansha, pa kumbusha ku disambuka dia mikenji; bua nanku, dimukayi bua kanusambuki mikenji to, bua dîna kadikupudibu mu mitshima yenu to.

12 Ndi nnuambila, ndi musua ne nuvuluka bua kulama dîna difunda mu mitshima yenu diba dionsu, bua kanusanganyibu ku tshianza tshia bakaji tshia Nzambi, kadi bua numvua ne numanya dîyi dianubikila, ne kabidi, dîna dianubikilaye.

13 Bualu munyi mudi muntu mua kumanya mukalenga udiye kayi musadila to, ne udi muenyi kudiye, ne udi kula ne meji ne majinga a mutshima wenda?

14 Ne kabidi, muntu udi mua kuangata mpunda wa mukuenda, ne kumulama anyi? Ndi nnuambila ne, Nansha; kakulekela nansha ne adia munkatshi mua bisumbu bia bimuna bienda to, kadi neamuipata, ne neamukupa pambelu. Ndi nnuambila, nebienzeka mena nanku munkatshi muenu bu nuenu kanuyi bamanya dîna dianubikilabu.

15 Bua nanku, ndi musua ne nuikala basuminyinyi ne kanuyi nunyunga, nuvulangana mu midimu mimpa diba dionsu, bua ne Kilisto, Mukalenga Nzambi wa Bukitu Bonsu, anusuika benda, bua ne nutuadibua mu diûlu, bua ne nupeta lupandu lua kashidi ne moyo wa tshiendelela, ku njila wa lungenyi, ne bukola, ne bululama, ne lusa lua yeya wakafuka bintu bionsu, mu diûlu ne pa buloba, udi Nzambi pa mutu pa bionsu. Amena.