1 Ne mpindiewu, mfumu Benyamina wakela meji ne bivua bikengedibua, kunyima kua kujikija kuakula kudi bantu, ne angata mêna a bonsu bavua babuela mu tshipungidi ne Nzambi bua kulama mikenji yenda.

2 Ne biakalua ne kakuvua muntu nansha umua, pa kumbusha bana bateketa, bavua kabayi babuela mu tshipungidi ne kabayi bangata dîna dia Kilisto kudibu.

3 Ne kabidi, biakalua ne pavua mfumu Benyamina mujikija bintu bionsu ebi, ne mujidila muanenda wa baluma Mosiya bua kuikala mukôkeshi ne mfumu pa bantu benda, ne mumupesha bujitu bonsu budi butangila bukalenga, ne kabidi uvua muteka bakuidi bua kulongesha bantu, nanku bua bumvua ne bamanya mikenji ya Nzambi, ne bua kubasonsola ku divuluka dia mutshipu uvuabu badiela, wakapingaja tshisumbu tshia bantu, ne bakapingana, bantu bonsu, bilondeshila mêku abu, ku nzubu yabu nkayabu.

4 Ne Mosiya wakabanga kukôkesha pa muaba wa tatuenda. Ne wakabanga kukôkesha mu bidimu makumi asatu a matuku enda, bienza mu bionsu, pabuipi ne bidimu nkama inayi ne makumi muanda muteketa ne bisambombo katshia tshikondu tshivua Lehi mumbuka ku Yelushalema.

5 Ne mfumu Benyamina wakasomba bidimu bisatu ne wa kafua.

6 Ne biakalua ne mfumu Mosiya wakenda mu njila ya Mukalenga, ne wakalama mêyi enda ne mikandu yenda, ne wakalama mikenji mu bintu bionsu bivuaye bimuelela mikenji.

7 Ne mfumu Mosiya wakadimisha bantu benda buloba. Ne yeya kabidi, nkayenda, wakadima buloba, nanku bua kalu bujitu kudi bantu benda, bua kuenzaye muvua tatuenda muenza mu bintu bionsu. Ne kakuvua dikokangana munkatshi mua bantu benda bonsu bua mutantshi wa bidimu bisatu.