1 Ne mpindiewu, biakalua ne kunyima kua mfumu Mosiya mupeta ditalala ditungunuka mu mutantshi wa bidimu bisatu, wakajinga kumanya bitangila bantu bakabanda bua kusomba mu bulaba bua Lehi-Nefi, anyi mu tshimenga tshia Lehi-Nefi; bualu bantu benda kabavua bumvua lumu luabu to katshia ku tshikondu tshiakumbukabu ku bulaba bua Zalahemela; bua nanku, bavua bamutshiokesha ne nkonku yabu.

2 Ne biakalua ne mfumu Mosiya wakafila dianyisha bua bantu dikumi ne basambombo ba ku bantu babu ba makanda babanda ku bulaba bua Lehi-Nefi, bua kumanya bitangila bana babu.

3 Ne biakalua ne pakatshiabu bakatuadija kubanda, bikala ne umua Amona, yeya uvua muntu wa makanda ne bukola, ne uvua kankanunuina ka Zalahemela; ne uvua kabidi mulombodi wabu.

4 Ne mpindiewu, kabavua bamanya luseka luvuabu ne bua kuyila mu tshipela bua kubanda ku bulaba bua Lehi-Nefi to; bua nanku bakatambakana matuku a bungi mu tshipela; bakatambakana mena matuku makumi anayi.

5 Ne pavuabu batambakana matuku makumi anayi, bakafika ku kakuna, kadi ku node kua bulaba bua Shiloma, ne bakâsa ntenta yabu.

6 Ne Amona wakangata basatu ba ku bana babu, ne mêna abu avua Amaleki, Heleme, ne Heme, ne bakapueka ku bulaba bua Nefi.

7 Ne monayi, bakasambakena ne mfumu wa bantu bavua mu bulaba bua Nefi, ne mu bulaba bua Shiloma; ne bakabanyungulula kudi balami ba mfumu, ne bakabakuata, ne bakabasuika, ne bakabela mu lukanu.

8 Ne biakalua ne pakavuabu mu lukanu matuku abidi bakabavuija kabidi kumpala kua mfumu, ne bakasulula mionji yabu; ne bakimana kumpala kua mfumu, ne bakapeta dianyisha, anyi bakabelela mukenji, bua bandamuna nkonku yabelaye.

9 Ne wakabambila: Monayi, ndi Limihi, muana wa Noa, uvua muana wa Zenife, wakapatuka mu bulaba bua Zalahemela bua kupiana bulaba ebu, buvua buikala bulaba bua batatuabu, uvua musungudibua mfumu bilondeshila dîyi dia bantu.

10 Ne mpindiewu, ndi njinga kumanya bualu bunudi ne dikima dia kuvua pabuipi ne bimanu bia tshimenga, pamvua, nkayanyi, ne balami banyi pambelu pa tshibuelelu?

11 Ne mpindiewu, bua bualu ebu mvua mulekela ne nulamibua, bua nuebeja, anyi tshianana mvua nnushipesha kudi balami banyi. Nudi banyishibua bua kuakula.

12 Ne mpindiewu, pakamona Amona ne uvua muanyishibua bua kuakula, wakaya kumpala ne wakinama kumpala kua mfumu; ne, pakajukaye, wakamba: Ô mfumu, ndi ngela Nzambi tuasakidila lelu bua muntshidi ne moyo, ne mundi muanyishibua bua kuakula; ne nengenza muanyi monsu bua kuakula ne dikima;

13 Bualu ndi mumanya ne bu wewa mummanya, kuvua ulekela ne nsuikibua ne mionji eyi to. Bualu ndi Amona, ne ndi kankanunuina ka Zalahemela, ne ndi mufuma ku bulaba bua Zalahemela bua kumanya bitangila bana betu, bavua Zenife mupatula ku bulaba ebu.

14 Ne mpindiewu, biakalua ne kunyima kua Limihi mumvua mêyi a Amona, wakasanka menamena, ne wakamba: Mpindiewu, ndi mumanya bulelela ne bana betu bavua ku bulaba bua Zalahemela batshidi ne moyo. Ne mpindiewu, nensanka; ne malaba nengenza ne bantu banyi basanka pabu.

15 Bualu monayi, tudi mu bupika kudi Bena Lamana, ne badi batufutshisha tshitadi tshidi tshikala tshikola bua kuitaba. Ne mpindiewu, monayi, bana betu nebatupatuisha mu bupika buetu, anyi mu bianza bia Bena Lamana, ne netuikala bapika babu; bualu bidi bimpa kuikala bapika ba Bena Nefi pa mutu pa kufuta mulambu kudi mfumu wa Bena Lamana.

16 Ne mpindiewu, mfumu Limihi wakela mukenji kudi balami benda bua kabasuiki kabidi Amona anyi bana babu to, ne wakenzeja ne baya ku kakuna kavua ku node kua Shiloma, ne balua ne bana babu mu tshimenga, nanku bua badia, ne banua, ne bikisha ku midimu ya luendu luabu; bualu bavua bakenga bintu bia bungi; bavua bakenga nzala, nyota, ne dipungi.

17 Ne mpindiewu, biakalua ne pakatshiabu mfumu Limihi wakatuma dimanyisha kudi bantu benda bonsu, nanku bua badisangisha pamua ku ntempelo bua kumvua mêyi abambilaye.

18 Ne biakalua ne pakadisangishabu pamua wakabambila mushindu ewu, wamba ne: Ô nuenu, bantu banyi, ambululayi mitu yenu ne nusambibua; bualu monayi, diba didi pabuipi, anyi kadiena kula to, dituikala katuyi kabidi mu bubatshika bua bena lukuna betu, nansha ntatu yetu mikala ya bungi, ivua ya tshianana; kadi ndi mumanya ne kutshidi lutatu lumua lua kutufikila lua tshipeta.

19 Bua nanku, julayi mitu yenu, ne sankayi, ne eyemenayi kudi Nzambi, bu mudiyi Nzambi uvua Nzambi wa Abalahama, ne Isaka, ne Yakoba; ne kabidi, ne Nzambi wakapatula bana ba Isalele mu bulaba bua Ejipitu, ne wakabendesha munkatshi mua Mbuwa Mukunza pa buloba bûma, ne wakabadisha ne mana a mu diûlu bua kabafu mu tshipela; ne wakenza bintu bikuabu bia bungi buabu.

20 Ne kabidi, Nzambi umua awu wakapatula batatuetu mu bulaba bua Yelushalema, ne wakalama ne wakakuba bantu benda tô ne mpindiewu; ne monayi, mbua mibi yetu ne malu mapita bubi etu ki bua kanuvuijaye mu bupika.

21 Ne bonsu nudi bajadiki lelu ewu ne, Zenife, uvua musungudibua bua kuikalaye mfumu wa bantu aba, bualu uvua ne lukunukunu lupita bua kupiana bulaba bua batatuetu, bua nanku muikala mudingibua kudi budimu ne dikazamuka bia mfumu Lamana, ne wakatua ndondu ne mfumu Zenife, ne wakafila tshitupa tshia bulaba mu bianza bienda bua asamu, anyi mena tshimenga tshia Lehi-Nefi, ne tshimenga tshia Shiloma; ne bulaba bua ku mpenga yabi yonsu—

22 Ne wakenza bionsu ebi, bua kipatshila kamua ka kuvuija bantu aba mu bubatshika anyi mu bupika. Ne monayi, tuetu mpindiewu tudi tufuta mulambu kudi mfumu wa Bena Lamana, tô ne pankatshi-nkatshi pa matala etu, orge wetu, ne mena nteta yetu yonsu ya mishindu yonsu, ne pankatshi-nkatshi pa divulangana dia bisumbu bia bimuna bikesa bietu ne bia bimuna binena bietu; ne mena mfumu wa Bena Lamana udi utulomba pankatshi-nkatshi pa bitudi nabi, anyi udi utulomba mioyo yetu.

23 Ne mpindiewu, ebi kabiena bikola bua kuitaba anyi? Ne lutatu luetu elu nki lunena anyi? Mpindiewu monayi, bu mudibu bunena bualu butudi ne bua kudidila.

24 Eyowa, ndi nnuambila, malu etu adi manena bua tuetu kudila; bualu monayi bana betu ba bungi mbashipibua, ne mashi abu adi mitshikijibua bua tshianana, ne bionsu ebi malu mabi.

25 Bualu bu bantu aba kabayi bapona mu disambuka dia mikenji to, Mukalenga kavua ulekela ne bubi bunena ebu bubaluila to. Kadi monayi, bakabenga kumvuila mêyi enda; kadi kuakajuka makokangana munkatshi muabu, mena mapita bungi mu mushindu wa ne bakadimatshisha mashi munkatshi muabu.

26 Ne bakashipa muambi wa Mukalenga; eyowa, muntu musungula wa Nzambi, wakabambila bubi buabu ne malu mapita bubi abu, ne wakamba ku Nyuma malu a bungi âlua, eyowa, mena dilua dia Kilisto.

27 Ne bualu wakabambila ne Kilisto udi Nzambi, Tatu wa bintu bionsu, ne wakamba ne neangata tshimfuanyi tshia muntu pa mutu penda, ne netshikala tshimfuanyi tshivua muntu mufukidibuaku ku mbangilu; anyi mu mêyi makuabu, wakamba ne muntu uvua mufukibua ku tshimfuanyi tshia Nzambi, ne Nzambi nealua panshi munkatshi mua bana ba bantu, ne neavuala musunyi ne mashi, ne neaya pa mpala wa buloba—

28 Ne mpindiewu, bualu wakamba nanku, bakamushipa; ne bakenza bintu bikuabu bia bungi biakavuija tshiji tshia Nzambi pa mutu pabu. Bua nanku, nganyi udi udiebeja bua tshinyi badi mu bupika, ne batûtshibua ne ntatu mikola?

29 Bualu monayi, Mukalenga wakamba: Ntshiakuambuluisha bantu banyi padibu basambuka mikenji to; kadi nenjika njila yabu bua kabalubuluki to; ne bienzedi biabu nebikala bu dibua dia ditetuka kumpala kuabu.

30 Ne kabidi, wakamba: Pakuna bantu banyi bukoya nebapola bisota biabu mu mvunda; ne tshipeta tshiabu tshidi mulungu.

31 Ne kabidi wakamba: Pakuna bantu banyi bukoya nebapola lupepela lua ku esete, ludi lutuala dinyangakaja dia katataka.

32 Ne kabidi, monayi, mulayi wa Mukalenga ukumbajibua, ne nutûtshibua ne nutatshishibua.

33 Kadi nuenu bapingana kudi Mukalenga ne mutshima mujima, ne nueyemena kudiye, ne numusadila ne dinanukila dionsu dia meji, bu nuenu nuenza nanku, neanupatuisha mu bupika, bilondeshila ku disua dienda nkayenda.